വനിതകളുമായി ബന്ധപ്പെട്ടതുള്പ്പെടെയുള്ള വിവിധ നിയമങ്ങളില് വരുത്തിയ ഭേദഗതികളെക്കുറിച്ച് പോലീസ് ഉദ്യോഗസ്ഥര്ക്ക് കൃത്യമായ അറിവുണ്ടാകണമെന്നും ഗവര്ണര്
ഐ. പി. സി 498 എ യുമായി ബന്ധപ്പെട്ടുള്ള വിധിയില് സ്ത്രീകളുടെ ആശങ്കകള് സുപ്രീംകോടതിയുടെ ശ്രദ്ധയില്പെടുത്താന് സംസ്ഥാന വനിതാ കമ്മീഷന് മുന്കൈയെടുക്കണമെന്ന് ഗവര്ണര് പി. സദാശിവം പറഞ്ഞു. സംസ്ഥാന വനിതാ കമ്മീഷന് വി. ജെ. ടി ഹാളില് സംഘടിപ്പിച്ച ഐ. പി. സി 498 എയുമായി ബന്ധപ്പെട്ടുള്ള സുപ്രീംകോടതി വിധിയും അനന്തര ഫലവും എന്ന സെമിനാര് ഉദ്ഘാടനം ചെയ്യുകയായിരുന്നു അദ്ദേഹം. സുപ്രീം കോടതിയുടെ വിധിക്കെതിരെ ഒരു സംഘടന സുപ്രീം കോടതി ചീഫ് ജസ്റ്റിസ് ഉള്പ്പെടുന്ന ബെഞ്ചിനെ സമീപിച്ചിട്ടുണ്ട്. വനിതാ കമ്മീഷന് ഈ കേസില് കക്ഷി ചേരാവുന്നതാണ്. ദേശീയ വനിതാ കമ്മീഷന് മുഖേന പ്രശ്നങ്ങള് സുപ്രീം കോടതി മുമ്പാകെ അവതരിപ്പിക്കാവുന്നതാണെന്നും ഗവര്ണര് നിര്ദ്ദേശിച്ചു.
ഈ വിഷയവുമായി ബന്ധപ്പെട്ട് ജില്ലാ കോടതികളിലും ഹൈക്കോടതിയിലും വനിതാ കമ്മീഷന് സെമിനാറുകളും ചര്ച്ചകളും സംഘടിപ്പിക്കണം. വനിതകളുമായി ബന്ധപ്പെട്ടതുള്പ്പെടെയുള്ള വിവിധ നിയമങ്ങളില് വരുത്തിയ ഭേദഗതികളെക്കുറിച്ച് പോലീസ് ഉദ്യോഗസ്ഥര്ക്ക് കൃത്യമായ അറിവുണ്ടാവണം. ഇത്തരം ഭേദഗതികള് മലയാളത്തിലാക്കി പൊലീസ് സ്റ്റേഷനുകളുടെ ചുമതലയുള്ള ഉദ്യോഗസ്ഥര്ക്ക് നല്കുന്നതിന് സംസ്ഥാന പോലീസ് മേധാവി നടപടിയെടുക്കണമെന്ന് ഗവര്ണര് പറഞ്ഞു. വനിതാ കമ്മീഷന് അദ്ധ്യക്ഷ എം. സി. ജോസഫൈന് അദ്ധ്യക്ഷത വഹിച്ചു. ജയില് ഡി. ജി. പി ആര്. ശ്രീലേഖ മുഖ്യപ്രഭാഷണം നടത്തി. വനിതാ കമ്മീഷന് അംഗങ്ങളായ ഇ. എം. രാധ, എം. എസ്. താര, ഷാഹിദ കമാല്, അഡ്വ. ഷിജി ശിവജി, സുപ്രീം കോടതി അഭിഭാഷകയായ കീര്ത്തിസിംഗ് എന്നിവര് പങ്കെടുത്തു.
എന്താണ് ഐ.പി.സി.498 എ
സ്ത്രീ സംരക്ഷണത്തിനുവേണ്ടി പാര്ലെമെന്റ് പാസാക്കിയ ഗാര്ഹിക പീഢന നിയമമാണ് ഐ.പി.സി 498 എ. മറ്റെല്ലാ കുറ്റകൃത്യങ്ങളിലും ആരോപണ സ്ഥാനത്തുള്ളയാള് കുറ്റം നടന്നുവെന്ന് തെളിയിക്കണം. കുറ്റം തെളിയും വരെ ആരോപിതനെ നിരപരാധിയായി പരിഗണിക്കും. എന്നാല് ഈ വകുപ്പ് പ്രകാരം താന് കുറ്റം ചെയ്തിട്ടില്ലെന്ന് തെളിയിക്കേണ്ട ബാധ്യത ആരോപിതന്റെ മേലാണ്. കുറ്റം തെളിയും വരെ അയാളെ സമൂഹവും നിയമവും കുറ്റവാളിയായി കാണുന്നു. ഒരു തെളിവും ഹാജരാക്കാതെ വെള്ളപേപ്പറിലെ പരാതിയോ, ബന്ധപെട്ട പോലീസ് ഉദ്യോഗസ്ഥന് മുന്നാലോ, മജിസ്ട്രേറ്റിനു മുന്പാകെയോ സ്ത്രീ മൊഴി നല്കിയാലും മതി. കേസ് രജിസ്റ്റര് ചെയ്യുവാനും, അറസ്റ്റ് ചെയ്യുവാനും പരാതി സത്യമോ വ്യാജമോ എന്ന് അന്വേഷണ ഉദ്യോഗസ്ഥന് അറിയേണ്ടതില്ല. അന്വേഷണം പിന്നീടാണ് നടക്കുക. കേസ് വ്യാജമാണെന്ന് കോടതിയില് തെളിഞ്ഞാലും കള്ളകേസുകൊടുത്ത് നിരപരാധിയെ മാനസികമായും മറ്റു തരത്തിലും സമൂഹത്തില് മാനംകെടുത്തിയ സ്ത്രീ ശിക്ഷിക്കപെടുന്നില്ല. ഇതുകാരണം സ്ത്രീ കുറ്റകൃത്യങ്ങള് കൂടിവരുന്നതിനു കാരണമാകുന്നു.
https://www.facebook.com/Malayalivartha
