സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ എത്ര പച്ചക്കൊടി കാണിച്ചാലും കെ.എം മാണി എല്‍.ഡി.എഫിലുണ്ടാകില്ലെന്ന് സി.പി.ഐ കോട്ടയം ജില്ലാ സെക്രട്ടറി ശശിധരന്‍ വെല്ലുവിളിക്കുന്നു. ഗതികേട് കൊണ്ട് ആളുകള്‍ സി.പി.എം വിട്ടുപോവുകയാണ്. നിയമസഭയില്‍ മാണിയെ തുണിപൊക്കി പ്രതിഷേധിച്ചവര്‍ ഇന്ന് മഹത്വവത്കരിക്കുന്നു. മാണിയുടെ വിട്ടിലുണ്ടെന്ന് സി.പി.എം പറഞ്ഞ നോട്ടെണ്ണല്‍ മെഷീന്‍ ഇപ്പോള്‍ എവിടെയാണ്. സി.പി.എം കമ്യൂണിസ്റ്റ് പാര്‍ട്ടിയല്ലാതായികൊണ്ടിരിക്കുന്നു. നിലപാടുകളില്‍ നിന്ന് പിന്നോട്ട് പോയതാണ് ഇതിന് കാരണം. സി.പി.എമ്മിന്റെ സൗജന്യം കൊണ്ടല്ല സി.പി.ഐ ഇവിടെ വരെ എത്തിയത്. സി.പി.ഐ ഇല്ലാതെ ഇടതുമുന്നണിയില്ലെന്നും ശശിധരന്‍ പറഞ്ഞു. കേരളാ കോണ്‍ഗ്രസ് എമ്മിനെ ഇടതുമുന്നണിയിലെടുക്കാനുള്ള നീക്കത്തെ തുടര്‍ന്നാണ് സി.പി.ഐ കോട്ടയം മണ്ഡലം സമ്മേളനത്തില്‍ സി.പി.എമ്മിനെ സി.കെ ശശിധരന്‍ കടന്നാക്രമിച്ചത്. 

മന്ത്രി എം.എം മണി ഭൂമാഭിയയുടെ കസ്‌റ്റോഡിയനായി മാറിയെന്നും ശശിധരന്‍ വിമര്‍ശിച്ചു. വി.എസ് മുഖ്യമന്ത്രിയായിരുന്നപ്പോള്‍ കയ്യേറ്റം ഒഴിപ്പാക്കാന്‍ മൂന്നാറിലെത്തിയാല്‍ കയ്യും കാലും വെട്ടുമെന്നാണ് എം.എം മണി പറഞ്ഞത്. റവന്യൂ ഉദ്യോഗസ്ഥരെയും മന്ത്രിയെയും അധിക്ഷേപിക്കുകയാണ് എം.എം മണി. ശ്രീറാംവെങ്കിട്ടരാമന്‍ കോപ്പിയടിച്ച് ജയിച്ചതാണെന്നാണ് എസ്. രാജേന്ദ്രന്‍ ആക്ഷേപിക്കുന്നത്. പള്ളിക്കൂടത്തില്‍ പോകാത്തയാളാണ് ഇത് പറയുന്നതെന്ന് ഓര്‍ക്കണം. ഭരണം ഉപയോഗിച്ച് സി.പി.ഐ ആരെയും വിലയ്ക്ക് വാങ്ങില്ല. കോട്ടയത്ത് നമ്മളേക്കാള്‍ സുന്ദരന്‍മാര്‍ ഉണ്ടെങ്കില്‍ അവരെ സ്വന്തമാക്കാമെന്ന കോടിയേരിയുടെ മോഹം നടക്കില്ലെന്നും സി.പി.എമ്മിന് പല കാര്യങ്ങളിലും നിലപാടില്ലാതായെന്നും ശശിധരന്‍ ആരോപിച്ചു.

കേരളാ കോണ്‍ഗ്രസ് എല്‍.ഡി.എഫിലേക്ക് വരുന്ന കാര്യം ഉടന്‍ വ്യക്തമാക്കണമെന്ന് സി.പി.എമ്മിന്റെ കോട്ടയം സമ്മേളന വേദിയില്‍ വെച്ച് കോടിയേരി പറഞ്ഞിരുന്നു. സി.പി.എം പ്രവര്‍ത്തകരുടെ നിലപാടില്‍ സന്തേഷമുണ്ടെന്ന് കെ.എം മാണിയും വ്യക്തമാക്കി. തുടര്‍ന്നാണ് സി.പി.ഐ കോട്ടയം ജില്ലാ സെക്രട്ടറി രംഗത്തെത്തിയത്. കേരളാ കോണ്‍ഗ്രസിനെ മുന്നണിയിലെടുത്താന്‍ അത് സി.പി.ഐക്ക് വലിയ തിരിച്ചടിയാകും. അത് മുന്നില്‍ കണ്ട് സംസ്ഥാന സെക്രട്ടറി കാനംരാജേന്ദ്രന്‍ ആദ്യമേ നിലപാട് വ്യക്തമാക്കിയിരുന്നു. ജനതാദളിനെയും വീരേന്ദ്രകുമാറിനെയും മുന്നണിയില്‍ എടുക്കുന്നതിന് സി.പി.ഐ എതിരുമല്ല.