ഹിന്ദുക്കളല്ലാത്ത 44 ജീവനക്കാരെ ക്ഷേത്രവുമായി ബന്ധപ്പെട്ട ജോലിയില്‍ നിന്ന് മാറ്റാന്‍ തിരുമല തിരുപ്പതി ദേവസ്ഥാനം നടപടി തുടങ്ങി. ഇതിന്റെ ഭാഗമായി ജീവനക്കാരോട് വിശദീകരണം ആവശ്യപ്പെട്ടിട്ടുണ്ട്. ഇവരെ തുല്യമായ സേവന വേതനവ് അവസ്ഥകളില്‍ മറ്റു സര്‍ക്കാര്‍ വകുപ്പുകളിലേക്ക് മാറ്റി നിയമിക്കും. 1989 വരെ തിരുപ്പതിയില്‍ ജീവനക്കാരെ നിയമിക്കാന്‍ നിയന്ത്രണങ്ങളുണ്ടായിരുന്നില്ല. 89 നും 2007 നും ഇടയില്‍, അനദ്ധ്യാപക തസ്തികയിലേക്കു മാത്രം അഹിന്ദുക്കളെ നിയമിക്കാമെന്ന ഭേദഗതി വന്നു.

2007 മുതല്‍ അദ്ധ്യാപക, അനദ്ധ്യാപക തസ്തികകളില്‍ ഹിന്ദുക്കളെ മാത്രമേ നിയമിക്കാവൂ എന്നു വീണ്ടും ഭേദഗതിയുണ്ടായി. ബാലാജിയില്‍ ( തിരുപ്പതി ദേവന്‍ ) വിശ്വസിക്കുന്നുവെന്ന് എഴുതി ഒപ്പിട്ടു നല്‍കുന്നവര്‍ക്കു മാത്രമേ തിരുപ്പതി ദേവസ്വം ജോലി നല്‍കുന്നുള്ളൂ.

തിരുപ്പതി ദേവസ്വം വിജിലന്‍സിന്റെ റിപ്പോര്‍ട്ട് അനുസരിച്ച് ദേവസ്വത്തിന്റെ വിവിധ വിഭാഗങ്ങളിലായി സ്ത്രീകളും പുരുഷന്മാരുമടക്കം 44 അഹിന്ദു ജീവനക്കാരാണ് ജോലി ചെയ്യുന്നത്. ഇതില്‍ 39 പേര്‍ 1989 നും 2007 നും ഇടയില്‍ ജോലിയില്‍ പ്രവേശിച്ചവരാണ്.