കോണ്‍ഗ്രസുകാരെ വല്ലാത്തൊരു അവസ്ഥയിലെത്തിച്ചിരിക്കുകയാണ് യുവ എംഎല്‍എ വി.ടി. ബല്‍റാം. കയ്ചിട്ട് ഇറക്കാനും വയ്യ, മധുരിച്ചിട്ട് തുപ്പാനും വയ്യാത്ത അവസ്ഥയിലാണ് സംസ്ഥാന കോണ്‍ഗ്രസ് നേതൃത്വത്തിന്റെ അവസ്ഥ. എ.കെ.ജി.യെക്കുറിച്ചുള്ള വി.ടി.ബല്‍റാം എം.എല്‍.എയുടെ പരാമര്‍ശം ചൂടേറിയ വിവാദമായിരിക്കെ, എങ്ങനെ പ്രതികരിക്കണമെന്നറിയാതെ ആശയകുഴപ്പത്തിലാണ് നേതാക്കള്‍. ആരെങ്കിലും ബല്‍റാമിനെ ന്യായീകരിച്ചാല്‍ കോണ്‍ഗ്രസിന്റെ നേതാക്കളുടെ ചുറ്റിക്കളിയും പുറത്തെത്തിച്ച് നാറ്റിക്കാനാണ് സൈബര്‍ പോരാളികളുടെ ശ്രമം. 

മുതിര്‍ന്ന നേതാക്കള്‍ ബല്‍റാമിനെ പിന്തുണച്ചിട്ടില്ല. യൂത്ത് കോണ്‍ഗ്രസ് സംസ്ഥാന പ്രസിഡന്റ് ഡീന്‍കുര്യാക്കോസ് മാത്രമാണ് ബല്‍റാമിനെ അനുകൂലിച്ച് പരസ്യപ്രസ്താവന നടത്തിയത്. പ്രതിപക്ഷ നേതാവ് രമേശ് ചെന്നിത്തല ബല്‍റാമിന്റെ പ്രസ്താവനയെ എതിര്‍ത്തും ഒരു വേള ന്യായീകരിച്ചുമാണ് പ്രസ്താവന ഇറക്കിയത്. മുതിര്‍ന്ന നേതാക്കളെ അധിക്ഷേപിക്കുന്നതിനോട് യോജിക്കാനാവില്ലെന്നായിരുന്നു ഉമ്മന്‍ചാണ്ടിയുടെ പ്രതികരണം. കോണ്‍ഗ്രസുമായി ബന്ധപ്പെട്ട വിഷയങ്ങളില്‍ ഉള്‍ക്കരുത്തോടെ പ്രതികരിക്കുന്ന യുവ നേതാക്കള്‍ പലരും ഈ സംഭവത്തെക്കുറിച്ച് പ്രതികരണം തേടാനായി വിളിച്ചപ്പോള്‍ ഫോണ്‍ എടുക്കുക പോലും ചെയ്തില്ല.

പാര്‍ട്ടി നേതൃത്വത്തിലേക്ക് യുവനിര കടന്നുവരണമെന്ന് കുറെക്കാലം മുമ്പ് തുറന്നടിച്ച് കൈയടി നേടിയ ബല്‍റാമിന് ഉദ്ദേശിച്ച പിന്തുണ കിട്ടാഞ്ഞതിനാലാവണം തന്റെ പ്രസ്താവനയ്ക്ക് പിന്നീട് വിശദീകരണം നല്‍കേണ്ടിയും വന്നു. അതേസമയം സി.പി.എമ്മിന്റെ പ്രമുഖ നേതാക്കളെല്ലാം ബല്‍റാമിനെതിരെ ശക്തമായി രംഗത്ത് വന്നു. മുഖ്യമന്ത്രി പിണറായി വിജയന്‍, സി. പി. എം സംസ്ഥാന സെക്രട്ടറി കോടിയേരി ബാലകൃഷ്ണന്‍, മന്ത്രി ജി. സുധാകരന്‍ തുടങ്ങിയവര്‍ ശക്തമായാണ് പ്രതിഷേധിച്ചത്.

എ. കെ. ജിയെക്കുറിച്ചുള്ള വി. ടി ബല്‍റാം എം.എല്‍.എ പരാമര്‍ശം കോണ്‍ഗ്രസിന്റെ നിലപാടല്ലെന്ന് പ്രതിപക്ഷ നേതാവ് രമേശ് ചെന്നിത്തല ഫേസ് ബുക്കില്‍ വ്യക്തമാക്കി. നിജസ്ഥിതി അറിയാന്‍ താന്‍ ബല്‍റാമിനെ വിളിച്ച് സംസാരിച്ചു. സാമൂഹ്യമാദ്ധ്യമങ്ങളില്‍ കോണ്‍ഗ്രസ് നേതാക്കളെ മോശക്കാരായി ചിത്രീകരിച്ചപ്പോള്‍ താന്‍ പ്രതികരിച്ചതാണെന്നാണ് ബല്‍റാം പറഞ്ഞത്. കോണ്‍ഗ്രസിനെ തിരുത്താന്‍ ശ്രമിക്കുന്ന മുഖ്യമന്ത്രി പിണറായി വിജയന്‍ സ്വന്തം മന്ത്രിമാരെ നിലയ്ക്ക് നിര്‍ത്തണം.

ഏതു പാര്‍ട്ടിയുടേതായാലും നേതാക്കളെ അധിക്ഷേപിക്കുന്നതിനോട് യോജിക്കാനാവില്ലെന്ന് ഉമ്മന്‍ ചാണ്ടി പറഞ്ഞു. നേതാക്കളെ അധിക്ഷേപിക്കുന്നത് കോണ്‍ഗ്രസിന്റെ സംസ്‌കാരമല്ല. പക്ഷേ ഒരു ജനപ്രതിനിധിയുടെ ഓഫീസ് അടിച്ചു തകര്‍ക്കുന്നത് അംഗീകരിക്കാനാവില്ല.അത് നിയമം കൈയിലെടുക്കലാണ്.

തരംതാണ പ്രവര്‍ത്തനത്തിന് ബല്‍റാം മാപ്പുചോദിക്കണമെന്ന് മന്ത്രി സുധാകരന്‍. നെഹ്രു പ്രധാനമന്ത്രിയും എ.കെ.ജി പ്രതിപക്ഷ നേതാവുമായിരുന്നപ്പോള്‍ പ്രത്യയശാസ്ത്രപരമായ വ്യത്യാസം ഉണ്ടായിരുന്നെങ്കിലും ഇരുവരും ഒരുമിച്ച് ടെന്നീസ് കളിക്കുകയും ഭക്ഷണം കഴിക്കുകയും ചെയ്തിരുന്നു. വ്യക്തി ബന്ധവും രാഷ്ട്രീയവും അവര്‍ കൂട്ടിക്കുഴച്ചിരുന്നില്ല.

നെഹ്രുകുടുംബത്തെ അപമാനിച്ച കോടിയേരിയുടെ പരാമര്‍ശത്തില്‍ സി.പി.എം അഭിപ്രായം വ്യക്തമാക്കണമെന്നാണ് ഡീന്‍ കുര്യാക്കോസ് പറയുന്നത്. ബല്‍റാമിന്റേത് വ്യക്തിപരമായ അഭിപ്രായമാണ്. അതിന് മാപ്പ് പറയേണ്ടതില്ല. ബല്‍റാം മാപ്പു പറയണമെന്നു പറയുന്നവര്‍ ആദ്യം കോടിയേരിയെ കൊണ്ട് മാപ്പു പറയിക്കണം.

ഇതിനിടെ മന്ത്രി എംഎം മണിയുടെ നാടന്‍ പ്രയോഗങ്ങളും ഉയര്‍ത്തി ചില നേതാക്കളുടെ ഒറ്റപ്പെട്ട വാദങ്ങളും പുറത്തു വന്നു.