ഒരു മുന്നണിയെ മാത്രം താങ്ങി നില്‍ക്കുന്ന പാരമ്പര്യം തങ്ങളുടെ പാര്‍ട്ടിക്കില്ലെന്ന് ബാലകൃഷ്ണപിള്ള; മുന്നണി പ്രവേശനം സംബന്ധിച്ച് സി.പി.എം തീരുമാനം എടുക്കണമെന്നും പിള്ള
കേരളാ കോണ്‍ഗ്രസ് എമ്മിനെ മുന്നണിയിലെടുക്കാന്‍ ഓടി നടക്കുന്ന സി.പി.എം കേരളാ കോണ്‍ഗ്രസ് ബിയെ പരിഗണിക്കാത്തതില്‍ പാര്‍ട്ടി ചെയര്‍മാന്‍ ബാലകൃഷ്ണപിള്ളയ്ക്ക് അതൃപ്തി. ഒരു മുന്നണിയെ മാത്രം താങ്ങി നില്‍ക്കുന്ന പാരമ്പര്യം തങ്ങളുടെ പാര്‍ട്ടിക്കില്ലെന്ന് ബാലകൃഷ്ണപിള്ള വ്യക്തമാക്കി. മുന്നണി പ്രവേശനം സംബന്ധിച്ച കാര്യങ്ങളില്‍ പെട്ടെന്ന് തീരുമാനം ഉണ്ടാകണം. എങ്കിലേ അണികളെയും പ്രവര്‍ത്തകരെയും സജീവമാക്കാന്‍ കഴിയൂ. ലോക്‌സഭാ തെരഞ്ഞെടുപ്പിന് മുമ്പ് തീരുമാനം ഉണ്ടാകണം എന്നാണ് പാര്‍ട്ടി ആഗ്രഹിക്കുന്നത്. വീരേന്ദ്രകുമാറിന്റെ കാര്യത്തില്‍ സി.പി.എം പെട്ടെന്ന് അനുകൂല തീരുമാനം എടുത്തു.
ഒന്നര വര്‍ഷത്തിലധികമായി ഇടത്പക്ഷത്തിനൊപ്പം തുടര്‍ന്നിട്ടും അകത്ത് പ്രവേശിക്കാന്‍ അനുവദിക്കാത്തതില്‍ പ്രവര്‍ത്തകര്‍ക്ക് മാനസികമായി പ്രയാസമുണ്ടെന്ന് ബാലകൃഷ്ണപിള്ള വ്യക്തമാക്കി. മുന്നോക്ക ക്ഷേമവകുപ്പ് ചെയര്‍മാന്‍ സ്ഥാനവും ഒരു എം.എല്‍.എ സീറ്റും മാത്രമാണ് കേരളാ കോണ്‍ഗ്രസ് ബിക്ക് ഉള്ളത്. കൊല്ലം ജില്ലയിലെ കൊട്ടാരക്കര, പത്തനാപുരം, പുനലൂര്‍ എന്നിവിടങ്ങളില്‍ പാര്‍ട്ടിക്ക് നിര്‍ണായക സ്വാധീനമുണ്ട്. പിള്ളയുടെ പാര്‍ട്ടിയെ മന്ത്രിസഭയിലെടുത്താല്‍ മന്ത്രിസ്ഥാനം ഉള്‍പ്പെടെ നല്‍കേണ്ടിവരും. മാത്രമല്ല ലോക്‌സഭാ സീറ്റും ചോദിച്ചേക്കും. അതെല്ലാം ഒഴിവാക്കുന്നതിനാണ് മുന്നണി പ്രവേശനം സി.പി.എം ആലോചിക്കാത്തത്.
https://www.facebook.com/Malayalivartha
