മദ്യനയവുമായി ബന്ധപ്പെട്ട കള്ളപ്പണം വെളുപ്പിക്കല് കേസ്... ഡല്ഹി മുഖ്യമന്ത്രി അരവിന്ദ് കെജ്രിവാളിന് ഇടക്കാല ജാമ്യം നല്കി സുപ്രീം കോടതി
മദ്യനയവുമായി ബന്ധപ്പെട്ട കള്ളപ്പണം വെളുപ്പിക്കല് കേസില് ഡല്ഹി മുഖ്യമന്ത്രി അരവിന്ദ് കെജ്രിവാളിന് ഇടക്കാല ജാമ്യം നല്കി സുപ്രീം കോടതി. ജൂണ് ഒന്ന് വരെയാണ് ജാമ്യം നല്കിയിരിക്കുന്നത്. കര്ശന ജാമ്യ വ്യവസ്ഥകളോടെ നിരവധി ഉപാധികളും ഇടക്കാല ജാമ്യത്തില് നിലനില്ക്കുന്നു.
ഡല്ഹി മുഖ്യമന്ത്രിയ്ക്ക് തിരഞ്ഞെടുപ്പ് പ്രചരണം നടത്താനാണ് ഇടക്കാല ജാമ്യം അനുവദിച്ചത്. ഡല്ഹി മദ്യനയക്കേസില് തന്റെ അറസ്റ്റിനെ ചോദ്യം ചെയ്തും ലോക്സഭാ തിരഞ്ഞെടുപ്പിന്റെ പ്രചാരണത്തില് പങ്കാളിയാകാന് ഇടക്കാല ജാമ്യത്തിനുള്ള അപേക്ഷയുമാണ് കെജ്രിവാള് സമര്പ്പിച്ച ഹര്ജിയിലാണ് വിധി.
കെജ്രിവാളിന്റെ ഇടക്കാല ജാമ്യത്തെ ഇഡി വ്യാഴാഴ്ച എതിര്ത്തിരുന്നു. തിരഞ്ഞെടുപ്പ് പ്രചാരണത്തിനുള്ള അവകാശം അടിസ്ഥാനപരമല്ലെന്ന് അന്വേഷണ ഏജന്സി സുപ്രീം കോടതിയില് സമര്പ്പിച്ച സത്യവാങ്മൂലത്തില് പറഞ്ഞു. 'തിരഞ്ഞെടുപ്പിനായി പ്രചാരണം നടത്താനുള്ള അവകാശം മൗലികമോ ഭരണഘടനാപരമോ നിയമപരമോ അല്ല. ED യുടെ അറിവില്, ഒരു രാഷ്ട്രീയ നേതാവിനും താന് മത്സരിക്കുന്ന സ്ഥാനാര്ത്ഥിയല്ലെങ്കിലും പ്രചാരണത്തിന് ഇടക്കാല ജാമ്യം നല്കിയിട്ടില്ല.' സത്യവാങ്മൂലത്തില് പറയുന്നു.
മാര്ച്ച് 21 നാണ് ഡല്ഹി മദ്യനയ കേസില് കെജ്രിവാളിനെ അദ്ദേഹത്തിന്റെ ഔദ്യോഗിക വസതിയില് നിന്നും ഇഡി അറസ്റ്റ് ചെയ്തത്. ഈ അഴിമതിക്ക് പിന്നിലെ രാജാവ് അദ്ദേഹമാണെന്നും മദ്യവ്യവസായികളില് നിന്ന് അഴിമതി ആവശ്യപ്പെടുന്നതില് നേരിട്ട് പങ്കെടുത്തതായും കേന്ദ്ര അന്വേഷണ ഏജന്സി ആരോപിച്ചു.
https://www.facebook.com/Malayalivartha
