വില്‍ക്കാന്‍ വച്ചിരിക്കുന്ന പാവ കണ്ടു വാശി പിടിച്ച കുഞ്ഞിന് അതു വാങ്ങിക്കൊടുത്തപ്പോള്‍ സംഭവിച്ച അബദ്ധമാണ് ഇപ്പോള്‍ ചര്‍ച്ചയയായിരിക്കുന്നത്. പാവയ്ക്കുള്ളില്‍നിന്നും ഇവര്‍ക്ക് ലഭിച്ചത് ആശുപത്രി മാലിന്യങ്ങള്‍ ആണ്.

വാങ്ങിയ പാവയ്ക്ക് ദുര്‍ഗന്ധം അനുഭവപ്പെട്ടതോടെയാണ് തങ്ങള്‍ അത് തുറന്നു നോക്കിയതെന്ന് ഫെയ്‌സ്ബുക്ക് ലൈവില്‍ ശ്രീമോള്‍ പറയുന്നു. തുറന്നു നോക്കിയപ്പോള്‍ ഉള്ളില്‍ രക്തവും മരുന്നും നിറഞ്ഞ പഞ്ഞികളും ബാന്‍ഡ് എയ്ഡും.

ആശുപത്രികളില്‍ രക്തം തുടയ്ക്കാനും മറ്റും ഉപയോഗിച്ച ശേഷം ഉപേക്ഷിച്ച പഞ്ഞിയാണ് ഇതെന്ന് ദൃശ്യങ്ങളില്‍ നിന്നും വ്യക്തമാണ്. തുറന്നതിന് ശേഷവും രൂക്ഷമായ ദുര്‍ഗന്ധമാണ് ഉള്ളതെന്നും കൈകൊണ്ട് തൊടാന്‍ പോലും ആകാത്തത്ര മാലിന്യങ്ങളാണ് പാവയ്ക്കുള്ളിലുള്ളതെന്നും ശ്രീമോള്‍ പറയുന്നു. പാവ വാങ്ങിയപ്പോള്‍ മുതല്‍ വീടിനുള്ളില്‍ ദുര്‍ഗന്ധമുണ്ടായിരുന്നതായി ശ്രീമോള്‍ പറയുന്നു.

അപ്പോഴൊന്നും പാവയെ സംശയിച്ചില്ല. ദുര്‍ഗന്ധത്തിന് മറ്റൊരു കാരണവും കണ്ടെത്താന്‍ കഴിയാത്തതിനെ തുടര്‍ന്നാണ് പാവ പരിശോധിച്ചത്. വയനാടിനും ഗൂഡല്ലൂരിനും ഇടയില്‍ ഒരു വഴിക്കച്ചവടക്കാരനില്‍ നിന്ന് 350രൂപ നല്കിയയാണ് വലുപ്പമുള്ള ടെഡി ബെയര്‍ വാങ്ങിയത്.