വീട്ടമ്മയുടെ കഴുത്തില്‍ക്കിടന്ന സ്വര്‍ണമാല പിടിച്ചുപറിച്ചു കടന്ന മൂന്നംഗസംഘം അറസ്റ്റിലായി. നെടുമങ്ങാട് കരിപ്പൂര് മുഖവൂര്‍ ക്ഷേത്രത്തിനുസമീപം അംബിഭവനില്‍ സതീഷ് (30), ഇരുമരം തറട്ട അരുവിക്കുഴി ആയിരവില്ലി ക്ഷേത്രത്തിന് സമീപം തെക്കുംകര പുത്തന്‍വീട്ടില്‍ രാജു (45), തൊളിക്കോട് ഇരുത്തലമൂലമഠത്തില്‍ ഹൗസില്‍ രജിത് ബാബു (22) എന്നിവരെയാണ് വലിയമല പൊലീസ് അറസ്റ്റ് ചെയ്തത്.

നെടുമങ്ങാട് പുലിപ്പാറ തേവരുകുഴിയിലെ ബേക്കറി നടത്തുന്ന ആനാട് പാണ്ഡവപുരം ചന്ദ്രികാനിവാസില്‍ രവീന്ദ്രന്‍നായരുടെ ഭാര്യ ചന്ദ്രിക(55)യുടെ കഴുത്തില്‍ക്കിടന്ന സ്വര്‍ണമാലയാണ് പിടിച്ചുപറിച്ചത്. കഴിഞ്ഞ മാസം 22ന് വൈകുന്നേരമാണ് സംഭവം നടന്നത്.

ബിസ്‌ക്കറ്റ് വാങ്ങാനെന്ന വ്യാജേനെയാണ് സംഘം ബേക്കറിയിലെത്തിയത്. ആ സമയത്ത് ചന്ദ്രികയാണ് കടയിലുണ്ടായിരുന്നത്. ഒന്നാം പ്രതി രജിത്ബാബു ബിസ്‌ക്കറ്റ് ചോദിച്ച് മാല പിടിച്ചുപറിക്കാന്‍ ശ്രമിച്ചപ്പോള്‍ തടയാന്‍ നോക്കിയ ചന്ദ്രികയെ മര്‍ദ്ദിച്ചശേഷമാണ് മാലയുമായി ബൈക്കില്‍ രക്ഷപ്പെട്ടത്. രജിതിനെ കസ്റ്റഡിയിലെടുത്ത് ചോദ്യം ചെയ്തപ്പോഴാണ് സതീഷ്, രാജു എന്നിവരുടെ സഹായത്തോടെ മാല നെടുമങ്ങാട് വില്‍പ്പന നടത്തിയ വിവരം അറിഞ്ഞത്. വലിയമല എസ്.ഐ വി. അജേഷിന്റെ നേതൃത്വത്തിലെ പൊലീസ് സംഘം അറസ്റ്റ് ചെയ്ത പ്രതികളെ കോടതിയില്‍ ഹാജരാക്കി റിമാന്റ് ചെയ്തു.