നെടുമ്പാശേരി മനുഷ്യക്കടത്ത് കേസില്‍ ഒന്ന് മുതല്‍ ഏഴു വരെ പ്രതികള്‍ കുറ്റക്കാരെന്ന് എറണാകുളം സി.ബി.ഐ പ്രത്യേക കോടതി. തൃശൂര്‍ വലപ്പാട് ചന്തപ്പടി കൊണ്ടിയറ വീട്ടില്‍ കെ.വി. സുരേഷ്, കൊടുങ്ങല്ലൂര്‍ കരുമാത്തറ മഠത്തിവിലാകം ലിസി സോജന്‍ (45), കൊടുങ്ങല്ലൂര്‍ ലോകമലേശ്വരം അണ്ടുരുത്തിയില്‍ വീട്ടില്‍ സേതുലാല്‍ (49), തിരുവനന്തപുരം കരീകുളം വട്ടപ്പാറ വിശ്വവിഹാറില്‍ വി. അനില്‍കുമാര്‍ (43), കട്ടപ്പന സ്വദേശിനി ബിന്ദു (31), കൊല്ലം പുനലൂര്‍ സ്വദേശിനി ശാന്ത (49), കൊടുങ്ങല്ലൂര്‍ എറിയാട് അവനിത്തറയില്‍ എ.പി. മനീഷ് (33) എന്നിവരെയാണ് കുറ്റക്കാരായി കോടതി കണ്ടെത്തിയത്. ഇവര്‍ക്കുള്ള ശിക്ഷ 11.30 ന് കോടതി വിധിക്കും.
ലിസി സോജന്റെ ഡ്രൈവറായിരുന്ന മരട് ചമ്പക്കര പയ്യിള്ളില്‍ വീട്ടില്‍ വര്‍ഗീസ് റാഫേല്‍ എന്ന സന്തോഷ്, ചാവക്കാട് വെട്ടുകാട് തോട്ടിങ്ങല്‍ പണിക്കവീട്ടില്‍ പി.കെ. കബീര്‍ (55), തിരുവനന്തപുരം വക്കം തിരുവാതിരയില്‍ കെ. സുധര്‍മന്‍, തൃശൂര്‍ പാഴൂര്‍ വലിയകത്ത് വീട്ടില്‍ സിറാജ്, അഴീക്കോട് തോട്ടുങ്കല്‍ വീട്ടില്‍ ടി.എ. റഫീഖ്, എസ്. മുസ്തഫ, താഹിര്‍ എന്നിവരെ സി.ബി.ഐ പ്രത്യേക കോടതി വെറുതെ വിട്ടു. ചിറയിന്‍കീഴ് സ്വദേശിനിയെ 2012 ജൂണ്‍ 11ന് ദുബൈയില്‍ 25,000 രൂപ ശമ്പളത്തില്‍ ക്ലീനിങ് ജോലിക്കെന്ന പേരിലും 2011 ആഗസ്റ്റ് 17ന് കട്ടപ്പന സ്വദേശിനിയെയും കടത്തിയ സംഭവങ്ങളിലാണ് വിചാരണ നടന്നത്.

മസ്‌കത്തില്‍നിന്ന് തിരുവനന്തപുരത്തേക്ക് മടങ്ങവെ ചിറയിന്‍കീഴ് സ്വദേശിനി മുംബൈ വിമാനത്താവളത്തില്‍ പിടിക്കപ്പെട്ടതോടെയാണ് സുരേഷിന്റെ നേതൃത്വത്തില്‍ ഗള്‍ഫില്‍ പ്രവര്‍ത്തിക്കുന്ന വന്‍ റാക്കറ്റിനെക്കുറിച്ച വിവരം പുറത്തു വന്നത്.