സര്‍ക്കാര്‍ ആശുപത്രികളില്‍ മികച്ച സൗകര്യങ്ങളൊരുക്കി രോഗീ സൗഹൃദവും മികവിന്റെ കേന്ദ്രങ്ങളുമാക്കി മാറ്റുക എന്ന ലക്ഷ്യത്തോടെ നടപ്പിലാക്കി വരുന്ന ആര്‍ദ്രം ദൗത്യത്തിന്റെ ഭാഗമായി മെഡിക്കല്‍ കോളേജുകള്‍ക്ക് 11.8666 കോടി രൂപ കൂടി അനുവദിച്ചതായി ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്‍. തിരുവനന്തപുരം മെഡിക്കല്‍ കോളേജ് 2 കോടി രൂപ, ആലപ്പുഴ മെഡിക്കല്‍ കോളേജ് 1.8766 കോടി, കോട്ടയം മെഡിക്കല്‍ കോളേജ് 1.99 കോടി, കോഴിക്കോട് മെഡിക്കല്‍ കോളേജ് 2 കോടി, തൃശൂര്‍ മെഡിക്കല്‍ കോളേജ് 2 കോടി, മഞ്ചേരി മെഡിക്കല്‍ കോളേജ് 1 കോടി, എറണാകുളം മെഡിക്കല്‍ കോളേജ് 1 കോടി എന്നിങ്ങനെയാണ് തുകയനുവദിച്ചത്. ഈ മെഡിക്കല്‍ കോളേജുകളില്‍ ആര്‍ദ്രം ദൗത്യത്തിന്റെ ഭാഗമായി നടന്നു വരുന്ന തുടര്‍ വികസന പ്രവര്‍ത്തനങ്ങള്‍ക്കാണ് ഈ തുക അനുവദിച്ചത്. ഉപകരണങ്ങള്‍ വാങ്ങുക, നിര്‍മ്മാണ പ്രവര്‍ത്തനങ്ങള്‍, പുനര്‍ നിര്‍മ്മാണ പ്രവര്‍ത്തനങ്ങള്‍, രോഗികള്‍ക്കായുള്ള അനൗണ്‍സ്‌മെന്റ് സംവിധാനം തുടങ്ങിയ ആവശ്യങ്ങള്‍ക്കായാണ് തുക അനുവദിച്ചതെന്നും മന്ത്രി വ്യക്തമാക്കി.

ആര്‍ദ്രം പദ്ധതിയുടെ ഭാഗമായി ഒ.പി. നവീകരണത്തിനായി രണ്ട് ഘട്ടങ്ങളിലായി എല്ലാ മെഡിക്കല്‍ കോളേജുകള്‍ക്കും തുക അനുവദിച്ചിരുന്നു. ആദ്യഘട്ടമായി 2016-17 ല്‍ 12.92 കോടി രൂപയും രണ്ടാം ഘട്ടമായി 2017-18ല്‍ 38.8984 കോടി രൂപയുമാണ് അനുവദിച്ചിരുന്നത്.

ആര്‍ദ്രം പദ്ധതിയുടെ പ്രവര്‍ത്തന പുരോഗതി വിലയിരുത്താനും വേഗത്തിലാക്കാനുമായി ആരോഗ്യ വകുപ്പ് മന്ത്രി തിരുവനന്തപുരം മെഡിക്കല്‍ കോളേജിലും ആലപ്പുഴ മെഡിക്കല്‍ കോളേജിലും തൃശൂര്‍ മെഡിക്കല്‍ കോളേജിലും നേരിട്ടെത്തിയിരുന്നു. മറ്റ് മെഡിക്കല്‍ കോളേജുകളില്‍ ഉടന്‍ സന്ദര്‍ശനം നടത്തുന്നതാണ്. എല്ലാ മെഡിക്കല്‍ കോളേജുകളിലേയും നിര്‍മ്മാണ പ്രവര്‍ത്തനങ്ങള്‍ എത്രയും വേഗം പൂര്‍ത്തിയാക്കാന്‍ മന്ത്രി കര്‍ശന നിര്‍ദേശവും നല്‍കിയിട്ടുണ്ട്.

നിലവിലുള്ള ആശുപത്രികളെ രോഗീ സൗഹൃദമാക്കി മാറ്റാനുള്ള ശ്രമങ്ങളാണ് നടന്നു വരുന്നത്. കേരളത്തിലെ മാറിവരുന്ന ആരോഗ്യസ്ഥിതി കണക്കിലെടുത്ത് പ്രാഥമിക, ദ്വിതീയ, തൃതീയ ആരോഗ്യ സംവിധാനങ്ങളെ ശക്തിപ്പടുത്താനാണ് ആര്‍ദ്രം ദൗത്യത്തിലൂടെ സര്‍ക്കാര്‍ ലക്ഷ്യമിടുന്നത്. രോഗിക്ക് മനസിനും ശരീരത്തിനും സുഖം നല്‍കുന്ന ശാന്തമായ അന്തരീക്ഷം ഉണ്ടാക്കുകയാണ് രോഗീ സൗഹൃദത്തിന്റെ ഏറ്റവും പ്രധാനം. ഒരു രോഗി ആശുപത്രിയിലെത്തി ചികിത്സ കഴിഞ്ഞ് മടങ്ങി പോകുന്നതുവരെയുള്ള എല്ലാ കാര്യങ്ങളിലും രോഗീ സൗഹൃദമാക്കുന്ന തരത്തിലാണ് പ്രവര്‍ത്തനങ്ങള്‍ ഏകോപിപ്പിക്കുന്നത്.

ആര്‍ദ്രം പദ്ധതിയുടെ ഭാഗമായി രോഗീ സൗഹൃദമാക്കാനായുള്ള ഒ.പി. നവീകരണത്തിന്റെ പ്രവര്‍ത്തനങ്ങള്‍ എല്ലാ മെഡിക്കല്‍ കോളേജുകളിലും ദ്രുതഗതിയില്‍ പുരോഗമിക്കുന്നു. ആദ്യ ഘട്ടമായി തിരുവനന്തപുരം മെഡിക്കല്‍ കോളേജ് എസ്.എ.ടി. ആശുപത്രിയിലെ മാതൃശിശുമന്ദിരം രോഗീസൗഹൃദമാക്കിയിരുന്നു.

ക്യൂ സമ്പ്രദായം ഒഴിവാക്കുന്നതിന്റെ ഭാഗമായി ഓണ്‍ലൈന്‍ വഴി രോഗികളുടെ പേര് രജിസ്റ്റര്‍ ചെയ്യാവുന്ന സംവിധാനവും ഒരുങ്ങിവരുന്നു. ഇതനുസരിച്ച് വന്നാല്‍ ഒട്ടും കാലതാമസമില്ലാതെ ഡോക്ടറെ സന്ദര്‍ശിച്ച് മടങ്ങാം. ഇവിടെയെത്തുന്ന രോഗികള്‍ക്ക് മികച്ച വിശ്രമ സൗകര്യമായിരിക്കും ഒരുക്കുക. എല്ലാവര്‍ക്കും വിശ്രമിക്കാനായി കസേരകള്‍, വിശ്രമ സമയത്ത് ആരോഗ്യ വിദ്യാഭ്യാസ പരിപാടികള്‍ ആസ്വദിക്കാനുള്ള ടി.വികള്‍, മതിയായ കുടിവെള്ള സൗകര്യം, മികച്ച ശൗചാലയങ്ങള്‍, അംഗ പരിമിതിയുള്ളവര്‍ക്കായുള്ള പ്രത്യേക സൗകര്യങ്ങള്‍, വഴി തെറ്റാതിരിക്കാന്‍ പ്രത്യേക സൈനേജുകള്‍ എന്നിവയാണൊരുക്കി വരുന്നത്.

എല്ലാ മെഡിക്കല്‍ കോളേജുകളിലും ട്രോമകെയര്‍ സംവിധാനം വിപുലപ്പെടുത്തുന്നതിനുള്ള നിര്‍മ്മാണ പ്രവര്‍ത്തനങ്ങളും പുരോഗമിച്ചുവരുന്നു. ഇതോടൊപ്പം എമര്‍ജന്‍സി മെഡിസിന്‍ വിഭാഗവും തുടങ്ങുന്നതാണ്.