വിമര്ശനങ്ങള്ക്ക് ചുട്ട മറുപടിയുമായി യെച്ചൂരി... കേരള സഖാക്കള് പാര്ട്ടി പരിപാടി ഒന്നു കൂടി മനസ്സിലാക്കണം; കോണ്ഗ്രസ് മുഖ്യശത്രുവാകുന്നത് കേരളത്തില് മാത്രമാണ്, കോണ്ഗ്രസ് ഒപ്പം വേണമെന്ന് താനൊരിക്കലും പറഞ്ഞിട്ടില്ല
വിമര്ശനങ്ങള്ക്ക് ചുട്ട മറുപടിയുമായി സിപിഐഎം സംസ്ഥാന സമ്മേളനത്തില് പാര്ട്ടി ജനറല് സെക്രട്ടറി സീതാറാം യച്ചൂരി. സിപിഐഎം എന്നാല് കമ്യൂണിസ്റ്റ് പാര്ട്ടി ഓഫ് കേരള മാര്ക്സിസ്റ്റ് എന്നല്ലെന്ന് അദ്ദേഹം പറഞ്ഞു. ഏതെങ്കിലും സംസ്ഥാനത്തെ സാഹചര്യം നോക്കിയല്ല പാര്ട്ടി തീരുമാനമെടുക്കുന്നത്. രാജ്യത്തെ പൊതുസാഹചര്യമാണു കണക്കിലെടുക്കാറുള്ളത്. കേരള സഖാക്കള് പാര്ട്ടി പരിപാടി ഒന്നു കൂടി മനസ്സിലാക്കണം. എ.എന്.ഷംസീറിനും മുഹമ്മദ് റിയാസിനും പേരെടുത്തു പറഞ്ഞായിരുന്നു യച്ചൂരിയുടെ വിമര്ശനം.
കോണ്ഗ്രസ് മുഖ്യശത്രുവാകുന്നത് കേരളത്തില് മാത്രമാണെന്നു യച്ചൂരി പറഞ്ഞു. എന്നാല് രാജ്യം മുഴുവന് അതല്ല സാഹചര്യം. കോണ്ഗ്രസ് ഒപ്പം വേണമെന്ന് താനൊരിക്കലും പറഞ്ഞിട്ടില്ല. തിരഞ്ഞെടുപ്പില് അടവുനയം സ്വീകരിക്കണമെന്നാണു പറഞ്ഞത്. താന് പറഞ്ഞ കാര്യങ്ങളല്ല സംസ്ഥാന സമ്മേളനത്തില് ചര്ച്ച ചെയ്തതെന്നും യച്ചൂരി വ്യക്തമാക്കി.
കോണ്ഗ്രസുമായി ഒരു ബന്ധവും പാടില്ലെന്നായിരുന്നു കഴിഞ്ഞ ദിവസത്തെ ചര്ച്ചയില് ഉയര്ന്ന പൊതുവികാരം. കേരളത്തില് പാര്ട്ടി വളരെ ശക്തമാണ്. അതിനെ ദുര്ബലമാക്കുന്ന നിലപാടു പാടില്ല. ദേശീയതലത്തില് നയം രൂപീകരിക്കുമ്പോള് കേരളത്തിലെ സാഹചര്യം കണക്കിലെടുത്തേ പറ്റൂ. വര്ഗീയതയ്ക്കെതിരെ പ്രാദേശിക കക്ഷികളുമായി യോജിപ്പ് ആവാം. സിപിഎം അതിനു നേതൃത്വം നല്കുകയാണു വേണ്ടതെന്നും നിര്ദേശം വന്നു.
https://www.facebook.com/Malayalivartha
