മണ്ണാര്‍ക്കാട് കോടതിപ്പടിയിലെ തുണിക്കടയില്‍ യുവാവ് കുത്തേറ്റ്​ മരിച്ചതിൽ പ്രതിഷേധിച്ച് ഇന്ന് രാവിലെ ആറുമുതല്‍ വൈകുന്നേരം ആറുവരെ മുസ്​ലിം ലീഗ് മണ്ണാര്‍ക്കാട് ഹർത്താലിനു ആഹ്വാനം ചെയ്​തു. കുന്തിപ്പുഴ സ്വദേശിയും മണ്ണാര്‍ക്കാട് നഗരസഭ കൗണ്‍സിലര്‍ വറോടന്‍ സിറാജുദ്ദീ​​ന്റെ മകനുമായ സഫീറാണ്​ (23) കുത്തേറ്റു മരിച്ചത്. ഇന്നലെ രാത്രി ഒമ്പതു മണിയോടെയാണ് കൊലപാതകം നടന്നത്. ഗുരുതരമായി പരിക്കേറ്റ സഫീറിനെ ഉടൻതന്നെ ആശുപത്രിയില്‍ പ്രവേശിപ്പിച്ചെങ്കിലും മരിക്കുകയായിരുന്നു.

വ്യാപാരി വ്യവസായി ഏകോപന സമിതി മണ്ണാര്‍ക്കാട്​ യൂനിറ്റും ഹര്‍ത്താല്‍ പ്രഖ്യാപിച്ചിട്ടുണ്ട്​. സഫീറിന്റെ ഉടമസ്​ഥതയിലുള്ള ന്യൂയോര്‍ക്ക്​ ജെന്‍ഡ്​സ്​ ഷോപ്പിലെത്തിയ മൂന്നംഗ സംഘമാണ് കുത്തിയത്. ഇവര്‍ ഓടിരക്ഷപ്പെട്ടു. സഫീര്‍ യൂത്ത് ലീഗ്-എം.എസ്.എഫ് പ്രവര്‍ത്തകനാണ്. കുന്തിപ്പുഴ മത്സ്യമാര്‍ക്കറ്റുമായി ബന്ധപ്പെട്ട്​ പ്രദേശത്ത്​ സി.പി.ഐ-മുസ്​ലിം ലീഗ് സംഘര്‍ഷം നിലനിന്നിരുന്നു.

നേരത്തേ സഫീറി​​ന്റെ വീടിനുനേരെ സ്ഫോടകവസ്തു എറിഞ്ഞ സംഭവമുണ്ടായിരുന്നു. കുന്തിപ്പുഴ നമ്പിയന്‍കുന്ന്​ സ്വദേശികളായ മൂന്നുപേരാണ്​ അക്രമത്തിന്​ പിന്നിലെന്നാണ് പ്രാഥമിക വിവരം. സ്ഥലത്ത്​ സംഘര്‍ഷാവസ്ഥയെത്തുടര്‍ന്ന്​ പൊലീസ് കാവലേര്‍പ്പെടുത്തി. യൂത്ത്​ലീഗ്​ പ്രവര്‍ത്തകര്‍ ദേശീയപാത ഉപരോധിച്ചു. മൃതദേഹം വട്ടമ്പലം സ്വകാര്യ ആശുപത്രി മോര്‍ച്ചറിയിലാണ്.