ഐഎന്‍എക്സ് മീഡിയ കേസില്‍ കോണ്‍ഗ്രസ് നേതാവ് പി.ചിദംബരത്തിന്റെ മകന്‍ കാര്‍ത്തി ചിദംബരത്തിന്റെ അറസ്റ്റില്‍ പ്രതികരണവുമായി അഡ്വ.ജയശങ്കര്‍. ചിദംബരത്തിന്റെ മകന്‍ ഏതോ ഒരു മുഖര്‍ജിയോട് വെറും പത്തു ലക്ഷം കൈപ്പറ്റി എന്ന് പറയുന്നത് ശുദ്ധ അസംബന്ധമാണെന്ന് ജയശങ്കര്‍ ഫെയ്സ്ബുക്ക് പോസ്റ്റില്‍ പറയുന്നു.

രാജകുമാരനാണ് ചിദംബരം. സുപ്രീംകോടതിയിലെ മുന്‍നിര അഭിഭാഷകന്‍. കുടുംബ സ്വത്ത് കടലോളം; ധനമന്ത്രി ആയിരുന്നപ്പോള്‍ അടിച്ചു മാറ്റിയത് മഹാസമുദ്രം. സിബിഐ ലക്ഷ്യം വെക്കുന്നത് കാര്‍ത്തിയെയല്ല, ചിദംബരത്തെയാണ്. ഇനി ഏതെങ്കിലും ബിപിഎല്‍ കാര്‍ഡുകാരനോട് നൂറു രൂപ ചോദിച്ചുവാങ്ങി എന്ന ആരോപണം ഉന്നയിച്ചിട്ടാവും ചിദംബരത്തെ അറസ്റ്റു ചെയ്യാന്‍ പോകുന്നതെന്നും അദ്ദേഹം പറയുന്നു.

അഡ്വ.ജയശങ്കറിന്റെ ഫേസ്ബുക്ക് പോസ്റ്റ്

മാന്യന്മാരെ അപമാനിക്കുന്ന വിധം ഇതാണ്.

മുതിർന്ന കോൺഗ്രസ് നേതാവും മുൻ ധനകാര്യ മന്ത്രിയുമായ പളനിയപ്പൻ ചിദംബരത്തിൻ്റെ മകൻ കാർത്തിയെ സിബിഐ അറസ്റ്റുചെയ്തു, ഒരു ദിവസത്തേക്കു കസ്റ്റഡിയിൽ വാങ്ങി.

പീറ്റർ മുഖർജി- ഇന്ദ്രാണി മുഖർജി ദമ്പതികളുടെ ഐഎൻഎക്സ് മീഡിയക്ക് വഴിവിട്ട സഹായം ചെയ്തുകൊടുത്തതിന് പത്തു ലക്ഷം രൂപ കൈപ്പറ്റി എന്നാണ് ആരോപണം.

നാട്ടുക്കോട്ടയിലെ രാജകുമാരനാണ് ചിദംബരം. രാജാ സർ അണ്ണാമല ചെട്ട്യാരുടെ ദൗഹിത്രൻ. സുപ്രീംകോടതിയിലെ മുൻനിര അഭിഭാഷകൻ.കുടുംബ സ്വത്ത് കടലോളം; ധനമന്ത്രി ആയിരുന്നപ്പോൾ അടിച്ചു മാറ്റിയത് മഹാസമുദ്രം.

അങ്ങനെയുളള ചിദംബരത്തിൻ്റെ മകൻ ഏതോ ഒരു മുഖർജിയോട് വെറും പത്തു ലച്ചം കൈപ്പറ്റി എന്ന് പറയുന്നത് ശുദ്ധ അസംബന്ധമാണ്. അണ്ണാമല ചെട്ട്യാരെ അപമാനിക്കുന്നതിനു തുല്യമാണ്.

സിബിഐ ലക്ഷ്യം വെക്കുന്നത് കാർത്തിയെയല്ല, ചിദംബരത്തെയാണ്. ഇനി ഏതെങ്കിലും ബിപിഎൽ കാർഡുകാരനോട് നൂറു രൂപ ചോദിച്ചുവാങ്ങി എന്ന ആരോപണം ഉന്നയിച്ചിട്ടാവും ചിദംബരത്തെ അറസ്റ്റു ചെയ്യാൻ പോകുന്നത്.