മലയാളം ഔദ്യോഗിക ഭാഷയാക്കാനുള്ള ബില് രാഷ്ട്രപതി തിരിച്ചയച്ചു, പ്രാദേശിക ഭാഷകള് ഔദ്യോഗികമാക്കുന്നത് ഫെഡറല് സംവിധാനത്തെ തകര്ക്കുമെന്ന് കേന്ദ്രം
മലയാളം ഔദ്യോഗിക ഭാഷയാക്കാനുള്ള ബില് രാഷ്ട്രപതി തിരിച്ചയച്ചു. രണ്ടേകാല് വര്ഷം പരിഗണിക്കാതെ വച്ച ശേഷമാണ് തിരിച്ചയച്ചത്. 2015 ഡിസംബര് 17ന് കെ.സി. ജോസഫ് നിയമസഭയില് അവതരിപ്പിച്ച് പാസാക്കിയതാണ് മലയാള ഭാഷയുടെ വ്യാപനവും പരിപോഷണവും' ബില്. തുടര്ന്ന് രാഷ്ട്രപതിയുടെ അനുമതിക്ക് കേന്ദ്ര സര്ക്കാരിന് സമര്പ്പിക്കുകയായിരുന്നു.
പ്രാദേശിക ഭാഷകള് ഔദ്യോഗികമാക്കുന്നത് ഫെഡറല് സംവിധാനത്തെ തകര്ക്കുമെന്ന ന്യായമാണ് ബില് മടക്കാന് കേന്ദ്രം ചൂണ്ടിക്കാട്ടുന്നതെന്ന് നിയമവകുപ്പ് വൃത്തങ്ങള് പറഞ്ഞു. ജില്ലാ കോടതികളിലെ വിധിന്യായത്തിനുള്പ്പെടെ ഉപയോഗിക്കേണ്ട ഭാഷ മലയാളമാക്കിയാണ് ബില് തയ്യാറാക്കിയത്. നിയമസഭയിലെ ബില്ലുകള്, നടപടിക്രമങ്ങള് എന്നിവയും മലയാളത്തിലായിരിക്കണം, സര്ക്കാര്, എയ്ഡഡ് സ്കൂളുകളില് പത്താംക്ലാസ് വരെ ഒന്നാംഭാഷ മലയാളമായിരിക്കണം, സംസ്ഥാനത്ത് വില്ക്കുന്നതും നിര്മ്മിക്കുന്നതുമായ എല്ലാ വ്യാവസായിക ഉത്പന്നങ്ങളുടെയും പേര് മലയാളത്തിലാക്കണം.
കേന്ദ്രസംസ്ഥാന നിയമങ്ങളുടെ അടിസ്ഥാനത്തില് തയ്യാറാക്കുന്ന ഉത്തരവുകളും ചട്ടങ്ങളും മലയാളത്തിലായിരിക്കണം. ഇംഗ്ളീഷില് പ്രസിദ്ധീകരിച്ച പ്രധാനപ്പെട്ട കേന്ദ്ര നിയമങ്ങള് മലയാളത്തിലേക്ക് തര്ജ്ജമ ചെയ്യണം. വിവരസാങ്കേതിക രംഗത്ത് മലയാളത്തിന്റെ ഉപയോഗം കാര്യക്ഷമമാക്കാന് സ്വതന്ത്ര സോഫ്റ്റ്വെയറുകള് വികസിപ്പിക്കണം എന്നിവയും ബില്ലിലുണ്ട്.
ഹൈക്കോടതി, സുപ്രീംകോടതി എന്നിവിടങ്ങളിലേക്കുള്ള കത്തിടപാടുകള് ഇംഗ്ളീഷിലാവാം. എന്നാല് കന്നഡ, തമിഴ് ഭാഷാ ന്യൂനപക്ഷങ്ങള്ക്ക് അവരുടെ മാതൃഭാഷയില് സര്ക്കാരുമായി ആശയവിനിമയം നടത്താം. മറുപടി ആ ഭാഷയിലോ ഇംഗ്ലീഷിലോ നല്കണം. പി.എസ്.സി വഴിയല്ലാതെ നിയമനം നടത്തുന്ന അര്ദ്ധസര്ക്കാര്, സ്വയംഭരണ സ്ഥാപനങ്ങള് എന്നിവ പരീക്ഷാചോദ്യം മലയാളത്തില് കൂടി തയ്യാറാക്കണം. സര്ക്കാരിന്റെ വിജ്ഞാപനങ്ങളും മലയാളത്തില് വേണം എന്നിങ്ങനെ നിര്ദ്ദേശങ്ങളടങ്ങിയതാണ് ബില്.
മെഡിക്കല് പ്രവേശനപരീക്ഷയായ നീറ്റ് ' മലയാളത്തില് എഴുതാന് അനുമതിയില്ല. എന്നാല് തമിഴ്, കന്നഡ, ആസാമീസ്, ബംഗാളി, ഗുജറാത്തി, മറാത്തി, തെലുങ്ക്, ഹിന്ദി ഭാഷകളില് എഴുതാം. മലയാളത്തില് എഴുതാനായെങ്കില് ഗ്രാമീണമേഖലയിലെ വിദ്യാര്ത്ഥികള്ക്ക് ഗുണകരമാവുമായിരുന്നു.
ഭാഷയെ സംരക്ഷിക്കാന് ശക്തമായ നിയമനം അത്യാവശ്യമാണ്. കേന്ദ്രത്തിന് താത്പര്യമില്ലെങ്കില് സംസ്ഥാന സര്ക്കാര് തന്ത്രപരമായി പ്രവര്ത്തിച്ച്, ഗവര്ണറുടെ അനുമതിയോടെ നിയമമുണ്ടാക്കണം.
https://www.facebook.com/Malayalivartha
