ഞെട്ടലോടെ നാട്ടുകാർ., കൊളക്കാട് താന്നിക്കുന്നിൽ അമ്മയെ കഴുത്തറത്ത്‌ കൊലപ്പെടുത്തിയശേഷം മകൻ കേളകം പോലീസ് സ്റ്റേഷനിലെത്തി കീഴടങ്ങി. താന്നിക്കുന്നിലെ മഠത്തിപ്പറമ്പിൽ തങ്കച്ചന്റെ ഭാര്യ ഗീതമ്മ (55) യെയാണ് മകൻ ക്രിസ്റ്റി (25) കഴുത്തറത്ത് കൊലപ്പെടുത്തിയത്. വെള്ളിയാഴ്ച രാത്രിയായിരുന്നു സംഭവം.

ഗീതമ്മയുമായുള്ള വാക്‌തർക്കത്തിനൊടുവിൽ കിടപ്പുമുറിയിൽ വെച്ചാണ് ക്രിസ്റ്റി ആക്രമിച്ചത്. കത്തികൊണ്ട് കഴുത്തിലേറ്റ മാരകമുറിവാണ് മരണകാരണമെന്ന് പോലീസ്. ബി.ജെ.പി. ജില്ലാ കമ്മിറ്റിയംഗമാണ് ഗീതമ്മ. ബെംഗളൂരുവിൽ ബി.സി.എ. വിദ്യാർഥിയായിരുന്ന ക്രിസ്റ്റി പഠനം പാതിവഴിയിൽ ഉപേക്ഷിച്ച് നാട്ടിലെത്തിയശേഷം കുറച്ചുകാലം വിദേശത്തുമായിരുന്നു. ഇയാൾ ലഹരിമരുന്നിന് അടിമയായിരുന്നുവെന്നും സംഭവം നടക്കുമ്പോൾ പ്രതി മദ്യലഹരിയിലായിരുന്നുവെന്നും പോലീസ് .

കൊലപാതകം നടക്കുന്ന സമയത്ത് തങ്കച്ചൻ വീട്ടിലുണ്ടായിരുന്നില്ല. കൊലയ്ക്കുശേഷം വീട്ടിൽ തങ്ങിയ ക്രിസ്റ്റി പിതാവിനെയും വകവരുത്തണമെന്ന് നിരന്തരം ആവശ്യപ്പെട്ടുകൊണ്ടേയിരുന്നുവെന്ന് പരിസരവാസികൾ പറയുന്നു. പിന്നീട് സമീപവാസിയായ യുവാവിനെ വിളിച്ചുവരുത്തി അയാളുടെ സ്കൂട്ടറിൽ കേളകം പോലീസ് സ്റ്റേഷനിലെത്തി കീഴടങ്ങുകയായിരുന്നു. പോലീസെത്തിയാണ് ഗീതമ്മയുടെ മൃതദേഹം പേരാവൂർ താലൂക്കാശുപത്രിയിലേക്ക് മാറ്റിയത്‌.