ദലിത് സംഘടനകള്‍ ആഹ്വാനം ചെയ്ത ഹര്‍ത്താലിനിടെ ഗീതാനന്ദന്‍ ഉള്‍പ്പെടെയുള്ള നേതാക്കളെ എന്തിനാണ് അറസ്റ്റു ചെയ്യുന്നതെന്നും ഇവരെ വിട്ടയയ്ക്കണമെന്നും മുതിര്‍ന്ന കോണ്‍ഗ്രസ് നേതാവ് എ.കെ.ആന്റണി ആവശ്യപ്പെട്ടു. അതേസമയം അറസ്റ്റില്‍ അസ്വഭാവികതയില്ലെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍ പറഞ്ഞു. പട്ടികജാതി, പട്ടികവര്‍ഗ പീഡന വിരുദ്ധ നിയമം ലഘൂകരിച്ച സുപ്രീം കോടതി വിധി റദ്ദാക്കണമെന്നും കോണ്‍ഗ്രസ് നേതാവ് എ.കെ.ആന്റണി. ഇതിനായി ഭരണഘടനയുടെ കുടക്കീഴില്‍ നിന്ന് ഏത് തരത്തിലുള്ള സമരപരിപാടികളും സ്വീകരിക്കും. ഇന്ദിരാഭവനില്‍ ദളിത് ഐക്യദാര്‍ഢ്യ കൂട്ടായ്മ ഉദ്ഘാടനം ചെയ്യുകയായിരുന്നു ആന്റണി.

പട്ടികജാതി പട്ടികവര്‍ഗ വിഭാഗങ്ങളോടു ബിജെപി പൈശാചികമായ നിലപാടാണ് സ്വീകരിക്കുന്നത്. അവര്‍ ഭരിക്കുന്ന സംസ്ഥാനങ്ങളിലെ സംഭവങ്ങള്‍ പരിശോധിച്ചാല്‍ ഇക്കാര്യം വ്യക്തമാകും. പ്രധാനമന്ത്രി നരേന്ദ്രമോദിക്ക് ആത്മാര്‍ത്ഥതയുണ്ടായിരുന്നെങ്കില്‍ നിയമം ലഘൂകരിച്ച സുപ്രീം കോടതി വിധി വന്ന അന്ന് തന്നെ പ്രശ്‌നത്തില്‍ ഇടപെടണമായിരുന്നെന്നും ആന്റണി പറഞ്ഞു.