സിബിഎസ്ഇ പത്താം ക്ലാസ് കണക്കു പരീക്ഷയില്‍ ചോദ്യപേപ്പര്‍ മാറിക്കിട്ടിയ കോട്ടയത്തെ വിദ്യാര്‍ഥിനിക്കുവേണ്ടി പ്രത്യേകം പരീക്ഷ നടത്താന്‍ ഹൈക്കോടതി ഉത്തരവ്. പരീക്ഷ നടത്തുന്നുണ്ടെങ്കില്‍ ഈ വര്‍ഷത്തെ മൂല്യനിര്‍ണയത്തിന് മുമ്പാകണമെന്നും കോടതി പറഞ്ഞു. ചോദ്യപേപ്പര്‍ മാറിക്കിട്ടിയ കോട്ടയം സ്വദേശിനി അമീയ സലീമിന്റെ ഹര്‍ജിയിലാണ് കോടതി ഇടപെടല്‍. ഇതോടെ അമീയയ്ക്ക് മാത്രമായി ക്വസ്റ്റ്യന്‍ പേപ്പര്‍ തയ്യാറാക്കണം; പരീക്ഷ നടത്തിക്കണം.

മാര്‍ച്ച് 28 ന് നടന്ന പത്താം ക്ലാസ് കണക്കു പരീക്ഷ എഴുതാനെത്തിയ മൗണ്ട് കാര്‍മല്‍ വിദ്യാനികേതന്‍ സ്‌കൂളിലെ അമീയ സലീമിന് കിട്ടിയത് രണ്ടു വര്‍ഷം മുമ്ബത്തെ ചോദ്യപേപ്പറായിരുന്നു. ഇത് അന്നുതന്നെ അധികൃതരുടെ ശ്രദ്ധയില്‍പെടുത്തി. എന്നാല്‍ സിബിഎസ്ഇ ഇത് ആരോപണം മാത്രമായി തള്ളി. അമീയക്ക് മാത്രമായി കണക്ക് പരീക്ഷ വീണ്ടും നടത്താമെന്നാണ് ഇപ്പോള്‍ ഹൈക്കോടതി നിലപാടെടുത്തിരിക്കുന്നത്. അമീയക്ക് പരീക്ഷക്ക് കിട്ടിയത് 2016 ലെ ചോദ്യപേപ്പറായിരുന്നു. 2016 ലെ ഉത്തര സൂചികയുടെ അടിസ്ഥാനത്തില്‍ മൂല്യ നിര്‍ണയം നടത്തണമെന്ന് ആവശ്യപ്പെട്ടാണ് അമീയ ഹൈക്കോടതിയെ സമീപിച്ചത്. ഇക്കാര്യത്തില്‍ സിബിഎസ്ഇയുടെ അഭിപ്രായം കൂടികേട്ട് കോടതി വിധി പറയും.

കോട്ടയം നവോദയയിലാണ് അമീയ പരീക്ഷ എഴുതിയത്. മറ്റു വിദ്യാര്‍ഥികള്‍ക്കെല്ലാം ശരിയായ ചോദ്യപേപ്പര്‍ കിട്ടിയപ്പോള്‍ അമീയക്കു മാത്രമാണ് പഴയത് കിട്ടിയത്. എന്നാല്‍ അബദ്ധം അംഗീകരിക്കാന്‍ സിബിഎസ്ഇ തയ്യാറാകാത്തതിനെ തുടര്‍ന്നായിരുന്നു കോടതിയെ സമീപിച്ചത്.

അതേസമയം താന്‍ പറഞ്ഞത് സത്യമെന്ന് തെളിഞ്ഞിരിക്കുന്നെന്ന് അമീയ പറഞ്ഞു. ഞാന്‍ നുണ പറയുന്നു എന്നായിരുന്നു സിബിഎസ്ഇ പറഞ്ഞത്. അത് ഏറെ വിഷമമുണ്ടാക്കി. കോടതിവിധി വന്നതോടെ ഞാന്‍ പറഞ്ഞത് സത്യമാണെന്നു തെളിഞ്ഞു. വളരെ സന്തോഷം. കുമ്മനത്തെ വീട്ടില്‍ ഉമ്മ റസീനക്കും സഹോദരന്‍ അല്‍ത്താഫിനും ബന്ധുക്കള്‍ക്കുമൊപ്പം അമീയ സന്തോഷം പങ്കിട്ടു.