ഇങ്ങനെയായാല്‍ ഇനി മലയാളികള്‍ക്ക് ടിക്കറ്റ് നല്‍കില്ല എന്ന തീരമാനം അറബികള്‍ എടുക്കാന്‍ സാധ്യതയുണ്ട്. തുടര്‍ച്ചയായി മലയാളികള്‍ക്കാണ് വമ്പന്‍ സമ്മാനങ്ങള്‍ അടിക്കുന്നത്. ഈ വര്‍ഷം നിരവധി മലയാളികള്‍ക്കാണ് അബുദാബിയിലും ദുബയിലുമൊക്കെയായി ലോട്ടറി അടിച്ചത്.

ഭാഗ്യദേവത കനിഞ്ഞ് അനുഗ്രഹിച്ച ആ മലയാളികളുടെ പട്ടികയില്‍ അവസാനമായി എത്തിയിരിക്കുന്നത് ഷാര്‍ജയിലെ രണ്ട് മലയാളി യുവാക്കളാണ്. ദുബായ് ഡ്യൂട്ടി ഫ്രീ നറുക്കെടുപ്പില്‍ 10 ലക്ഷം ഡോളര്‍ (ഏകദേശം 6.5 കോടി രൂപ) ആണു സമ്മാനമായി ലഭിച്ചത്.

ചെറുപ്പം മുതലേ കൂട്ടുകാരായിരുന്ന പിന്റോ പോള്‍ തൊമ്മന, ഫ്രാന്‍സിസ് സെബാസ്റ്റ്യന്‍ എന്നിവരെയാണ് ചൊവ്വാഴ്ച ഭാഗ്യ ദേവത കനിഞ്ഞ് അനുഗ്രഹിച്ചത്. ഇരിങ്ങാലക്കുട സ്വദേശികളും കളിക്കൂട്ടുകാരുമായ ഇരുവരേയും തേടി ദുബായ് ഡ്യൂട്ടി ഫ്രീയില്‍ നിന്നും ഇന്നലെയാണ് ലോട്ടറി അടിച്ചതായ കോള്‍ വന്നത്.

ആരോ തങ്ങളെ കളിയാക്കുന്നതാണെന്നാണ് ഇരുവരും ആദ്യം വിചാരിച്ചത്. ഒടുവില്‍ ദുബായ് ഡ്യൂട്ടിഫ്രീ ഉദ്യോഗസ്ഥരെ കണ്ട് നിരവധി തവണ ഒത്തു നോക്കിയപ്പോഴാണ് ടിക്കറ്റ് അടിച്ചു എന്ന കാര്യം ഇരുവര്‍ക്കും വിശ്വസിക്കാനായത്. നിനച്ചിരിക്കാതെ കിട്ടിയ ഭാഗ്യത്തില്‍ സന്തോാഷം അടക്കാനാവാത്തതാണെന്നും ഇരുവരും പറയുന്നു.

12 വര്‍ഷം മുന്‍പ് യുഎഇയില്‍ എത്തിയ പിന്റോ ഷാര്‍ജയില്‍ ഓട്ടമൊബൈല്‍ വര്‍ക്‌ഷോപ്പ് നടത്തുന്നു. ഭാര്യ ധന്യ നഴ്‌സാണ്. രണ്ട് മക്കളും ഈ ദമ്ബതികള്‍ക്ക് ഉണ്ട്. കഴിഞ്ഞ മാസം ആദ്യമാണ് തൊമ്മനയും ഫ്രാന്‍സിസും ചേര്‍ന്ന് ടിക്കറ്റ് എടുക്കുന്നത്. കുട്ടിക്കാലം മുതലേ കളിക്കൂട്ടുകാരായിരുന്ന ഇരുവരും പത്താം ക്ലാസ് വരെ പഠിച്ചതും ഒരുമിച്ചാണ്. 12 വര്‍ഷം മുന്‍പ് പിന്റോ യുഎഇയിലേക്ക് പോന്നു. പിന്നാലെ കൂട്ടുകാരനുള്ള നാട്ടിലേക്ക് ഫ്രാന്‍സിസു പോന്നു. ഇവിടെയും ഇരുവരും അയല്‍ക്കാരാണ്.

അറേബ്യന്‍ ഓട്ടോമൊബൈലില്‍ ജീവനക്കാരനായ ഫ്രാന്‍സിസിന് ഏപ്രില്‍ പത്ത് ഇരട്ടി സന്തോഷമാണ് നല്‍കിയിരിക്കുന്നത്. ഭാര്യ ലിയോണിന്റെ പിറന്നാള്‍ ദിനത്തിലാണ് കുടുംബത്തെ തേടി ഭാഗ്യം എത്തിയിരിക്കുന്നത് എന്നതാണ് ഇവരുടെ സന്തോഷം ഇരട്ടിയാക്കിയിരിക്കുന്നത്. ഭാര്യയോട് തനിക്ക് ലോട്ടറി അടിക്കുമെന്ന് തമാശക്ക് പറഞ്ഞെങ്കിലും അത് യാഥാര്‍ത്ഥ്യമായതിന്റെ സന്തോഷത്തിലാണ് ഫ്രാന്‍സിസ്. ഇനി ഭാര്യക്ക് ഒരു വിലപിടിപ്പുള്ള സമ്മാനം നല്‍കണം. അതാണ് ഫ്രാന്‍സിസിന്റെ ആഗ്രഹം.

ലോട്ടറി അടിച്ച വിവരം നാട്ടിലുള്ള അമ്മയെ വിളിച്ചു പറഞ്ഞു. എന്നാല്‍ അത് വിശ്വസിക്കാന്‍ കഴിയാത്ത അമ്മ ഫോണ്‍ കട്ട് ചെയ്ത് പോവുകയാണ് ചെയ്തതെന്നും ഫ്രാന്‍സിസ് പറയുന്നു. അഞ്ച് പ്രാവശ്യം ഫ്രാന്‍സിസ് ഇതിന് മുമ്ബ് ടിക്കറ്റ് എടുത്തിരുന്നു. സമ്മാനം അടിച്ചില്ലെങ്കിലും എല്ലാത്തവണയും അമ്മയെ വിളിച്ച് സമ്മാനമടിച്ചതായി പറഞ്ഞ് വിശ്വസിപ്പിക്കുമായിരുന്നു. പതിവ് പോലെ മകന്‍ പറ്റിക്കുകയാണെന്ന് കരുതിയ അമ്മ ശുണ്ഠി പിടിച്ച് ഇതോടെ ഫോണും കട്ട് ചെയ്തു. പിന്നീട് സുഹൃത്തുക്കള്‍ വിളിച്ച് പറയുമ്‌ബോള്‍ മാത്രമാണ് അമ്മ വിശ്വസിക്കാന്‍ തയ്യാറായത്. ലോട്ടറി അടിച്ചെങ്കിലും നാട്ടില്‍ പോയി സെറ്റില്‍ ആവാനില്ല. യുഎഇയില്‍ തന്നെ തുടരാനാണ് ഇരുവരുടേയും തീരുമാനം.

ഇതിന് മുമ്ബ് നിരവധി മലയാളികള്‍ക്ക് ഇവിടെ ലോട്ടറി അടിച്ചു. കോടികളുടെ സമ്മാനമാണ് ഇവര്‍ക്കെല്ലാം നറുക്കെടുപ്പിലൂടെ ലഭിച്ചത്. എല്ലാവര്‍ക്കും ഒന്നാം സമ്മാനം തന്നെയാണ് അടിച്ചത്.