മദ്യത്തിന്റെ ഗുണനിലവാരവും സുരക്ഷയും ഭക്ഷ്യസുരക്ഷയുടെ പരിധിയില് ഉള്പ്പെടുത്തി ഭക്ഷ്യസുരക്ഷാ ഗുണനിലവാര നിയമഭേദഗതി നിലവില് വന്നു
രാജ്യത്ത് വില്ക്കുന്ന മദ്യത്തിന്റെ ഗുണനിലവാരവും സുരക്ഷയും ഭക്ഷ്യസുരക്ഷയുടെ പരിധിയില് ഉള്പ്പെടുത്തി ഭക്ഷ്യസുരക്ഷാ ഗുണനിലവാര നിയമഭേദഗതി നിലവില് വന്നു. ബ്രാണ്ടി, വിസ്കി, റം, ജിന്, വൈന്, ബിയര് തുടങ്ങിയവയുടെ കാര്യത്തില് വിശദമായ നിയന്ത്രണങ്ങളാണ് നിയമത്തിലുള്ളത്. അരശതമാനം മുതല് ആള്ക്കഹോള് അംശമുള്ള എന്തും ആല്ക്കഹോള് ബിവറേജ് എന്ന ഗണത്തില് പെടും. മദ്യത്തിന്റെ നിലവാരം സംബന്ധിച്ച മാനദണ്ഡങ്ങള്ക്കു പുറമേ ഉത്പാദകര് ഭക്ഷ്യസുരക്ഷാ ലൈസന്സും നേടണം.
മദ്യക്കുപ്പികളില് ഭക്ഷ്യസുരക്ഷയുടെ ലോഗോയും ലൈസന്സ് നമ്പറും പ്രദര്ശിപ്പിക്കണം. മദ്യം ആരോഗ്യത്തിന് ഹാനികരം എന്ന് അച്ചടിക്കുന്നതിനു പുറമേ മദ്യപിച്ച് വാഹനമോടിക്കരുത് എന്ന സന്ദേശവും ഉള്പ്പെടുത്തണം. മദ്യനിര്മാണത്തിന് ഉപയോഗിക്കുന്ന വസ്തുക്കളുടെ കാര്യത്തിലും നിബന്ധനകളുണ്ട്. വെള്ളം, നിറങ്ങള്, മറ്റു വസ്തുക്കള് എന്നിവ ഭക്ഷ്യസുരക്ഷാ മാനദണ്ഡങ്ങള് പാലിക്കുന്നതായിരിക്കണം. അനുവദനീയമല്ലാത്ത തരത്തിലുള്ള നിറങ്ങളോ മറ്റ് ഘടകങ്ങളോ ഉള്പ്പെട്ടാല് നിയമനടപടികള് നേരിടേണ്ടിവരും
മറ്റു പ്രധാന നിബന്ധനകള്
ഓരോ ഇനം മദ്യത്തിലും ആല്ക്കഹോളിന്റെ അളവിലും ലോഹസാന്നിധ്യത്തിന്റെ അളവിലും കൃത്യമായ നിയന്ത്രണം. മദ്യക്കുപ്പികളില് എന്തൊക്കെ വിവരങ്ങള് രേഖപ്പെടുത്തണമെന്ന് നിര്വചിച്ചിട്ടുണ്ട്. മദ്യം ഉത്പാദിപ്പിക്കുന്ന സ്ഥലത്തിന്റെ വിവരം കുപ്പികളില് ഉണ്ടായിരിക്കണം. ഇറക്കുമതി ചെയ്യുന്നതാണെങ്കിലും ഇത് ബാധകമായിരിക്കും. മദ്യത്തിന് പോഷകഗുണമുണ്ട് എന്ന തരത്തിലുള്ള വിവരങ്ങള് രേഖപ്പെടുത്തരുത്. ആരോഗ്യത്തിന് ഗുണകരമാകുമെന്ന തരത്തിലുള്ള ഒരു അവകാശവാദവുമുണ്ടാകരുത്. വൈനിന്റെ കാര്യത്തില് ഏതു തരത്തിലുള്ളതാണെന്ന് രേഖപ്പെടുത്തണം. ഒരു ലിറ്റര് മദ്യത്തില് സള്ഫര് ഡയോക്സൈഡ് പത്ത് മില്ലിഗ്രാമില് കൂടുതലുണ്ടെങ്കില് പ്രത്യേകം രേഖപ്പെടുത്തണം. മദ്യത്തിന്റെ കാലാവധി സംബന്ധിച്ച വിവരങ്ങള് ഉണ്ടായിരിക്കണം. ഭക്ഷ്യസുരക്ഷാ നിയമം അനുശാസിക്കുന്ന കുപ്പികളില് മാത്രമേ മദ്യം വില്പ്പനയ്ക്കെത്തിക്കാവൂ ഗുണനിലവാരം ഭക്ഷ്യസുരക്ഷാവിഭാഗം നോക്കും
ഭക്ഷ്യ സുരക്ഷാനിയമം ബാധകമായതോടെ മദ്യത്തിന്റെ ഗുണനിലവാരം, സുരക്ഷ എന്നിവ സംബന്ധിച്ചുള്ള പരിശോധനകള് ഭക്ഷ്യ സുരക്ഷാവിഭാഗമായിരിക്കും നിര്വഹിക്കുക. പരാതികളുടെ അടിസ്ഥാനത്തില് സാംപിളുകള് ശേഖരിച്ച് പരിശോധന നടത്തി നിയമനടപടിയെടുക്കുന്നതിനുള്ള അധികാരവും വകുപ്പിനുണ്ടാകും. പരിശോധനകളും മറ്റും നടക്കുമ്പോള് എക്സൈസ്, ഭക്ഷ്യസുരക്ഷാ വിഭാഗങ്ങള് യോജിച്ചുള്ള പ്രവര്ത്തനത്തിനും പുതിയ നിയമം സാധ്യതകള് നല്കുന്നു. അബ്കാരി നിയമമനുസരിച്ചുള്ള കാര്യങ്ങളുടെ നിര്വഹണം എക്സൈസ് വിഭാഗത്തിനുതന്നെയായിരിക്കും. രണ്ടുവര്ഷത്തോളമെടുത്താണ് പുതിയ നിയന്ത്രണങ്ങള് ഉള്പ്പെടുത്തി മദ്യത്തെ ഭക്ഷ്യസുരക്ഷാ നിയമത്തിന്റെ പരിധിയില് കൊണ്ടുവന്നത്.
https://www.facebook.com/Malayalivartha
