കഠ്‌വയില്‍ പീഡനത്തിനിരയായി പെണ്‍കുട്ടി കൊല്ലപ്പെട്ടസംഭവത്തില്‍ നിരവധി പ്രതികരണങ്ങളാണ് ഈ അടുത്ത ദിവസങ്ങളിലായി പുറത്തുവന്നുകൊണ്ടിരിക്കുന്നത്. പ്രധാനമന്ത്രി നരേന്ദ്രമോദിയും ഈ വിഷയത്തില്‍ തന്റെ മൗനം വെടിഞ്ഞിരുന്നു. മനുഷ്യമനസ്സാക്ഷിയെ ഞെട്ടിച്ച അതിക്രൂരമായ ബലാത്സംഗം കാരണം ലോകത്തിനുമുന്നിലും ഇന്ത്യാരാജ്യം ലജ്ജിച്ച് തലതാഴ്ത്തി നില്‍ക്കുന്ന സാഹചര്യമാണ് ഇപ്പോഴുള്ളത്. യുഎന്നിലും വിഷയം ചര്‍ച്ചയായതോടെ ഇന്ത്യ മൊത്തത്തില്‍ നാണംകെട്ട അവസ്ഥയിലാണ്. കൂടാതെ പെണ്‍കുട്ടിയെ അപമാനിച്ച് സമൂഹമാധ്യമത്തില്‍ പോസ്റ്റിട്ട കൊച്ചി സ്വദേശി വിഷ്ണു നന്ദകുമാറിനുമെതിരെ ജാമ്യമില്ലാക്കുറ്റത്തിന് കേസെടുത്തിരിക്കുകയും ചെയ്തിരിക്കുന്ന ഈ സാഹചര്യത്തിലാണ് ജയസൂര്യയുടെ ഫേസ്ബുക് പോസ്റ്റും പുറത്തുവന്നിരിക്കുന്നത്. hang them എന്ന് ഒരു വെള്ള കടലാസില്‍ എഴുതി തന്റെ മകളുമായി നില്‍ക്കുന്ന ഫോട്ടോയാണ് ജയസൂര്യ തന്റെ ഒഫീഷ്യല്‍ പേജില്‍ പോസ്റ്റ് ചെയ്തിരിക്കുന്നത്. എന്തായാലും ആ ഫേസ്ബുക്ക് പോസ്റ്റ് ഇപ്പോള്‍ സോഷ്യല്‍മീഡിയ ഏറ്റെടുത്തിരിക്കുകയാണ്. 

ഇന്ത്യന്‍ ഭരണഘടനാ നിയമം അനുസരിച്ച് തൂക്കിക്കൊല്ലുന്നത് നിരോധിച്ചിരിക്കുന്ന ഈ സാഹചര്യത്തില്‍ ഇത്തരത്തിലുള്ള കുറ്റകൃത്യങ്ങള്‍ക്കുള്ള ശിക്ഷനടപ്പാക്കാന്‍ നിയമം തന്നെ പോളിച്ചെഴുതണമെന്ന ആവശ്യമാണ് ഈ പോസ്റ്റിന് ലഭിക്കുന്ന പിന്തുണയില്‍ നിന്ന് മനസ്സിലാക്കാന്‍ സാധിക്കുന്നത്.

അതേസമയം, എട്ടുവയസ്സുകാരിക്കെതിരായ കൊടുംക്രൂരതയുടെ പശ്ചാത്തലത്തില്‍ രാജ്യവ്യാപകമായി വലിയ പ്രതിഷേധമാണ് ഉയരുന്നത്. അതുപോലെതന്നെ രാജ്യമെങ്ങും പ്രതിഷേധമുയര്‍ത്തിയ കഠ്‌വയിലെ പീഡനത്തില്‍ സുപ്രീംകോടതി സ്വമേധയാ ഇടപെട്ട് അന്വേഷണ പുരോഗതി വിലയിരുത്തും. ചീഫ് ജസ്റ്റിസ് ദീപക് മിശ്ര അധ്യക്ഷനായ ബെഞ്ചണ് തീരുമാനമെടുത്തത്. അതിക്രൂരമായി മാനഭംഗം നടന്ന സംഭവത്തില്‍ സുപ്രീംകോടതിയുടെ ഇടപെടല്‍ ആവശ്യപ്പെട്ട് ഒരുവിഭാഗം അഭിഭാഷകര്‍ ചീഫ് ജസ്റ്റിസിനെയും വിവിധ സുപ്രീംകോടതി ജഡ്ജിമാരെയും സമീപിച്ചിരുന്നു.