കടുവയുടെ ആക്രമണത്തില് ഒരാള് കൊല്ലപ്പെട്ട കോന്നി വനമേഖലയില് നിരീക്ഷണത്തിന് ടൈഗര് ട്രാപ്പ് കാമറകള്
കടുവയുടെ ആക്രമണത്തില് ഒരാള് കൊല്ലപ്പെട്ട കോന്നി വനമേഖലയില് നിരീക്ഷണത്തിന് ടൈഗര് ട്രാപ്പ് കാമറകള് സ്ഥാപിക്കുന്നു. കഴിഞ്ഞ ദിവസം കല്ലേലി വനമേഖലയിലും കടുവയുടെയും പുള്ളിപ്പുലിയുടെയും സാന്നിദ്ധ്യം ഉള്ളതായി വനപാലകര് കണ്ടെത്തിയിരുന്നു. ഇതേ തുടര്ന്നാണ് അത്യാധുനിക സംവിധാനങ്ങളോടുകൂടിയ ടൈഗര് ട്രാപ്പ് കാമറകള് സ്ഥാപിക്കുന്നത്. കഴിഞ്ഞ ദിവസങ്ങളില് വനാതിര്ത്തിയിലെ വിവിധ കേന്ദ്രങ്ങളില് 30 ക്ളോസ്ഡ് സര്ക്യൂട്ട് കാമറകള് സ്ഥാപിച്ചിരുന്നു. ഇതിനുപുറമേയാണ് ട്രാപ്പ് കാമറകളും എത്തിക്കുന്നത്.
പെരിയാര് കടുവാ സങ്കേതത്തിലെ വിദഗ്ദ്ധരായ ഇക്കോളജിസ്റ്റ് രമേശ്, ടൈഗര് മോണിട്ടറിംഗ് അസിസ്റ്റന്റ് രാഹുല്, ടൈഗര് ഫോറസ്റ്റ് വാച്ചര് പൊന്നച്ചന് എന്നിവരുടെ നേതൃത്വത്തിലുള്ള സംഘമാണ് പ്രവര്ത്തനങ്ങള്ക്ക് നേതൃത്വം നല്കുന്നത്.
ഒരാഴ്ച മുമ്പ് വനസംരക്ഷണ സമിതി പ്രവര്ത്തകന് രവിയെ കൊന്നുതിന്നത് ഒന്നില് കൂടുതല് കടുവകളാണെന്ന് പോസ്റ്റുമോര്ട്ടത്തിലും ഫോറന്സിക് പരിശോധനയിലും സ്ഥിരീകരിച്ചിരുന്നു. എന്നാല് ഇവ ഇണകളാണോ, കുഞ്ഞുങ്ങള് ഉള്പ്പെടുന്ന കുടുംബമാണോ എന്ന് ഉറപ്പിക്കാനായിട്ടില്ല. ട്രാപ്പ് കാമറകള് സ്ഥാപിക്കുന്നതിലൂടെ ഈ സംശയങ്ങള് ദൂരീകരിക്കാന് കഴിയുമെന്നാണ് പ്രതീക്ഷ. വിവിധ കാമറകളില് ലഭിക്കുന്ന ദൃശ്യങ്ങളിലെ കടുവകളുടെ ശരീരത്തിലെ വരകളും മറ്റ് ചില വ്യത്യാസങ്ങളും കണ്ടെത്തി എണ്ണം മനസിലാക്കാന് കഴിയും.
കഴിഞ്ഞ ഞായറാഴ്ചയാണ് കോന്നി വനമേഖലയില് കടുവയുടെ സാന്നിദ്ധ്യം വനം വകുപ്പ് ഉറപ്പിച്ചത്. ഇതിന് പിന്നാലെ കഴിഞ്ഞ ദിവസം കല്ലേലിയിലും സമീപങ്ങളിലും കടുവയെ കണ്ടതായി അഭ്യൂഹങ്ങളുണ്ട്.
ടൈഗര് ട്രാപ്പ് കാമറ
സാധാരണ കാമറകളില് നിന്ന് വ്യത്യസ്തമായി വന്യമൃഗം കാമറയുടെ മുന്നില്പ്പെടുമ്പോള് മാത്രം സെന്സര് പ്രവര്ത്തിച്ച് ചിത്രം പകര്ത്തുന്നു. കാമറകള് മൃഗങ്ങളുടെ ശരീരത്തിലെ ഊഷ്മാവ് തിരിച്ചറിഞ്ഞ് സ്വയം പ്രവര്ത്തിക്കും. 50 അടി ദൂരത്തില് വരെ വ്യക്തമായ ചിത്രങ്ങളെടുക്കാന് സാധിക്കും. 200,00 രൂപയാണ് ഒരു കാമറയുടെ വില. ഒരു മാസം വരെ ബാറ്ററി ചാര്ജ് നില്ക്കും. ഇതില് ഘടിപ്പിച്ചിരിക്കുന്ന മെമ്മറി കാര്ഡുകള് പരിശോധിച്ചാണ് മൃഗങ്ങളുടെ സാന്നിദ്ധ്യവും എണ്ണവും ഉറപ്പിക്കുന്നത്.
https://www.facebook.com/Malayalivartha
