ആയിരത്തോളം നിര്‍ദ്ധനരായ കാന്‍സര്‍ രോഗികള്‍ക്ക് വിഷു കിറ്റ് നല്‍കി കാരുണ്യയുടെ സേവനം മാതൃകയായി കോഴിക്കോട് അത്തോളി കേന്ദ്രീകരിച്ച്‌ പ്രവര്‍ത്തിക്കുന്ന "ദി സൊസൈറ്റി ഫോര്‍ പുവര്‍ കാന്‍സര്‍ പേഷ്യന്റ്‌സ്" പ്രവര്‍ത്തകരാണ് കാരുണ്യ പ്രവര്‍ത്തനം നടത്തി വിഷുവിനെ വരവേറ്റത്. കഴിഞ്ഞ പത്ത് വര്‍ഷമായി കാരുണ്യ സേവനം മലബാറിലെ നിര്‍ധനരായ ക്യാന്‍സര്‍ രോഗികള്‍ക്ക് ആശ്വാസമാകുന്നു. സാമൂഹ്യ സേവനസന്നദ്ധരായ കുറച്ച്‌ ചെറുപ്പക്കാരുടെ ശ്രമഫലമായാണ് 2008 ആഗസ്റ്റ് മാസത്തില്‍ സംഘടനക്ക് രൂപം നല്‍കിയത്. സമാന ചിന്താഗതിക്കാര്‍ ചേർന്നതോടെ കാരുണ്യത്തിന്റെ സഹായം മലബാറിലുടനീളം വ്യാപിപ്പിക്കാന്‍ സാധിച്ചു.

മലബാറിലെ പാലക്കാടു മുതല്‍ കാസര്‍ഗോഡ് വരെയുള്ള 3500 ലേറെ പേര്‍ കാരുണ്യയുടെ സഹായത്തിനായി രജിസ്റ്റർ ചെയ്തുകഴിഞ്ഞു .ലഭ്യമായ വിവരത്തിന്റെ അടിസ്ഥാനത്തില്‍ 1200 ലേറെ പേര്‍ക്ക് വിഷു കിറ്റ് നല്‍കി ഇത്തവണത്തെ വിഷുവിനെയും ഇവര്‍ വരവേറ്റു. അത്തോളി വൊക്കേഷണല്‍ ഹയര്‍ സെക്കണ്ടറി സ്‌കൂളില്‍ നടന്ന ചടങ്ങില്‍ കാക്കൂര്‍ ഗ്രാമപഞ്ചായത്ത് പ്രസിഡണ്ട് കെ ജമീല കിറ്റ് വിതരണം ഉദ്ഘാടനം ചെയ്തു. ജില്ലാ പഞ്ചായത്ത് മെമ്പർ എ എം വേലായുധന്‍ അധ്യക്ഷനായിരുന്നു.

ചടങ്ങില്‍ സമൂഹത്തില്‍ വ്യക്തിമുദ്ര പതിപ്പിച്ചവരെ ആദരിച്ചു. പഞ്ചായത്തിലെ 50 ഓളം വനിതാ വളണ്ടിയര്‍മാര്‍ ശേഖരിക്കുന്ന പണം സ്വരൂപിച്ചും സേവന സദ്ധരായവര്‍ നല്‍കുന്ന സാമ്ബത്തികവും വിനിയോഗിച്ചാണ് പദ്ധതി നടപ്പിലാക്കിയത് . മൂന്ന് മാസത്തിനിടയില്‍ ചികികിത്സ സഹായവും നല്‍കിവരുന്നു. ഡോക്ടര്‍ രജിത് സി സെക്രട്ടറിയും സി ടി റജി ട്രഷറുമായ 21 അംഗ ഭരണസമിതിയാണ കാരുണ്യയുടെ പ്രവര്‍ത്തനത്തിന് നേതൃത്വം നല്‍കുന്നത്.