മന്ത്രിയല്ലാത്തതിനാല് സുപ്രീം കോടതിയിലെ കേസ് പിന്വലിച്ച് ഹൈകോടതിയിലെ കേസുമായി മുന്നോട്ടുപോകാന് അനുവദിക്കണമെന്ന അഭിഭാഷകന്റെ ആവശ്യം അംഗീകരിച്ചു ; തോമസ് ചാണ്ടി സുപ്രീം കോടതിയില് നല്കിയ ഹര്ജി പിന്വലിച്ചു
കായല് കയ്യേറ്റ ആരോപണത്തില് ഹൈക്കോടതി പരാമര്ശങ്ങള്ക്കെതിരെ മുന് മന്ത്രി തോമസ് ചാണ്ടി സുപ്രീം കോടതിയില് നല്കിയ ഹര്ജി പിന്വലിച്ചു. ഹൈക്കോടതി ഉത്തരവ് സ്റ്റേ ചെയ്യണമെന്നാവശ്യപ്പെട്ടാണ് സുപ്രീം കോടതിയില് അപ്പീല് നല്കിയത്.
കേസ് നല്കുമ്പോള് തോമസ് ചാണ്ടി സംസ്ഥാന മന്ത്രിയാണ്. എന്നാല് ഇപ്പോള് മന്ത്രിസ്ഥാനമില്ല. അതിനാല് കേസുമായി മുന്നോട്ടു പോകാന് താത്പര്യമില്ലെന്ന് അഭിഭാഷകന് കോടതിയെ അറിയിക്കുകയായിരുന്നു. മന്ത്രിയല്ലാത്തതിനാല് സുപ്രീം കോടതിയിലെ കേസ് പിന്വലിച്ച് ഹൈകോടതിയിലെ കേസുമായി മുന്നോട്ടുപോകാന് അനുവദിക്കണമെന്ന് അഭിഭാഷകന് ആവശ്യപ്പെട്ടു. ഇത് അംഗീകരിച്ചുകൊണ്ട് തോമസ് ചാണ്ടിയുടെ ഹർജി പിന്വലിക്കാന് സുപ്രീം കോടതി അനുമതി നല്കി. തുടര്ന്ന് കേസ് പിന്വലിക്കുകയായിരുന്നു.
മന്ത്രി എന്ന നിലയിലല്ല വ്യക്തി എന്ന നിലയിലാണ് ഹൈക്കോടതിയില് ഹര്ജി നല്കിയത് എന്ന് സുപ്രീം കോടതിയില് നല്കിയിരിക്കുന്ന അപ്പീലില് തോമസ് ചാണ്ടി വ്യക്തമാക്കിയിരുന്നു. സര്ക്കാര് ഉത്തരവായി ഇറങ്ങുന്ന ഒരു കാബിനറ്റ് തീരുമാനത്തെ ചോദ്യം ചെയ്താല് മാത്രമാണ് അത് മന്ത്രിസഭയുടെ കൂട്ടുത്തരവാദിത്തത്തിന്റെ ലംഘനമോ അല്ലെങ്കില് മന്ത്രിസഭയുടെ കൂട്ടുത്തരവാദിത്തത്തെ ചോദ്യം ചെയ്യലോ ആവുക. ഇത് അത്തരത്തില് ഇറങ്ങിയ സര്ക്കാര് ഉത്തരവല്ല. കളക്ടറുടെ റിപ്പോര്ട്ടാണ്. റവന്യൂ വകുപ്പിന്റെ ഒരു നടപടി മാത്രമാണ്. ഒരു വകുപ്പിന്റെ നടപടി ചോദ്യം ചെയ്യുക മാത്രമാണ് താന് ചെയ്തിരിക്കുന്നതെന്നും അപ്പീലില് പറഞ്ഞിരുന്നു.
https://www.facebook.com/Malayalivartha
