കാശ്മീരിലെ കത്വയില്‍ എട്ട് വയസുകാരിയെ അതിക്രൂരമായി ബലാത്സംഘം ചെയ്ത ശേഷം കൊലപ്പെടുത്തയ സംഭവത്തില്‍ പെണ്‍കുട്ടിക്കും കുടുംബത്തിനും നീതി ലഭിക്കുന്നതിന് ഉപരിയായി വര്‍ഗീയ വിദ്വേഷം പടര്‍ത്താന്‍ സോഷ്യല്‍ മീഡിയയിലൂടെ വ്യാപകശ്രമം. സോഷ്യല്‍ മീഡിയയിലൂടെ കേരളത്തില്‍ ചിലര്‍ ആഹ്വാനം ചെയ്ത ഹര്‍ത്താല്‍ ഇതിന്റെ ശ്രമമെന്നാണ് രഹസ്യാന്വേഷണ വിഭാഗം കരുതുന്നത്. ഒരു മുസ്്‌ലിം സംഘടനകളും ഹര്‍ത്താലിന് ആഹ്വാനം ചെയ്തില്ലെങ്കിലും അവരുടെ പേരില്‍ സംസ്ഥാനത്തുടനീളം വ്യാപകമായി കടകള്‍ അടപ്പിക്കുകയും ഗതാഗതം തടസപ്പെടുത്തുകയും ചെയ്തു. അവസാനം മുസ്്‌ലിംലീഗ് നേതാക്കള്‍ ഉള്‍പ്പെടെ ഹര്‍ത്താലിനെതിരെ രംഗത്തെത്തി.

ക്ഷേത്രത്തിനുള്ളില്‍ ഒളിപ്പിച്ച ശേഷം പെണ്‍കുട്ടിയെ പീഡിപ്പിച്ച് കൊന്നതിനാല്‍ ഹിന്ദുക്കള്‍ക്കും ആര്‍.എസ്.എസിനും ബി.ജെ.പിക്കും എതിരെ അതിരുകടന്ന ആക്ഷേപവും പ്രതിഷേധവും സോഷ്യല്‍മീഡിയയിലൂടെ പലരും പ്രചരിപ്പിക്കുന്നു. മതവിദ്വേഷം വളര്‍ത്തുന്ന ഇത്തരം പോസ്റ്റുകള്‍ക്കും ട്രോളുകള്‍ക്കും എതിരെ സംസ്ഥാന സര്‍ക്കാര്‍ യാതൊരു നടപടിയും സ്വീകരിക്കുന്നില്ല. ന്യൂനപക്ഷങ്ങളെ പ്രീണിപ്പിക്കുന്നതിന്റെ ഭാഗമായാണ് ഇതെന്ന് ആക്ഷേപം ഉയര്‍ന്നിട്ടുണ്ട്.

കശ്മീരില്‍ കൊല്ലപ്പെട്ടത് മുസ്ലീം നാമധാരിയായതിനാല്‍ കേരളത്തിലെ ഹിന്ദുക്കളെ മുഴുവന്‍ ഇവിടെ നിന്ന് തുടച്ചു നീക്കണമെന്ന തരത്തിലുള്ള ഉറഞ്ഞു തുള്ളലുകള്‍ നടക്കുന്നതായി ബി.ജെ.പിയുടെ സംസ്ഥാന മീഡിയാ കോ-ഓഡിനേറ്റര്‍ സന്ദീപ് വചസ്പദി ഫെയിസ്ബുക്കിലൂടെ ചൂണ്ടിക്കാട്ടി. ഇന്ത്യയില്‍ ശരീഅത്ത് നിയമം നടപ്പാക്കണമെന്ന് ചിലര്‍ ആഹ്വാനം ചെയ്യുന്നുണ്ട്. രാജ്യത്തെ മുഴുവന്‍ ബിജെപി അനുഭാവികളേയും വംശഹത്യ ചെയ്യണമെന്ന് ശങ്കര്‍ എന്നയാള്‍ പോസ്റ്റിട്ടു. ഇത് ദീപാ നിശാന്ത് എന്ന അധ്യാപികയും ഏറ്റുപിടിച്ചു. സംഭവം വിവാദമായതോടെ ശങ്കര്‍ പോസ്റ്റ് പിന്‍വലിച്ചു.

മുപ്പത്തിയൊന്നു ശതമാനം ഹിന്ദുക്കളെ വെടിവെച്ചു കൊല്ലാന്‍ ഞാന്‍ ആഹ്വാനം ചെയ്തത്രേ! ആ പോസ്റ്റ് പിന്‍വലിച്ചതാണത്രേ !!
ഞാനിട്ട കമന്റ് ഇപ്പോഴും ആ പോസ്റ്റില്‍ത്തന്നെയുണ്ട് .. ദീപക് ശങ്കരനാരായണന്റെ കമന്റാണത്.ദീപക്കിന്റെ വാക്കുകളെ വളച്ചൊടിച്ച് മറ്റൊന്നാക്കി മാറ്റുന്ന നിങ്ങളുടെ തന്ത്രത്തിന് നടുവിരല്‍ നമസ്‌ക്കാരം!! എങ്ങനെയാണ് ബലാല്‍'സംഘി'കളേ നിങ്ങള്‍ക്കിങ്ങനെ വ്യാജപ്രചരണം നടത്താന്‍ സാധിക്കുന്നത്? എന്ന് ദീപാ നിശാന്ത് ഫെയിസ്ബുക്കിലൂടെ ചോദിക്കുന്നു 

ഹിന്ദു ധര്‍മ്മം എന്നത് ബലാത്സംഗക്കാരുടെ മതമാണെന്ന് ട്രോളുകള്‍ ഇറങ്ങിയിട്ടുണ്ട്. ഇന്റലിജന്‍സ് വിഭാഗം ഇക്കാര്യങ്ങള്‍ ആഭ്യന്തരവകുപ്പിനെ അറിയിച്ചിട്ടും നടപടിയുണ്ടാകുന്നില്ല. എല്ലാ മതങ്ങളിലും രാഷ്ട്രീയ പാര്‍ട്ടികളിലും ക്രിമിനലുകളും സ്ത്രീകളെയും കുട്ടികളെയും നശിപ്പിക്കുന്നവരുമുണ്ട്. അത്തരക്കാരെ നിയമത്തില്‍ മുന്നില്‍ കൊണ്ടുവരണം. അതിന് പകരം അവരുടെ മതത്തെയും അവര്‍ പ്രവര്‍ത്തിച്ച പ്രസ്ഥാനങ്ങളെയും പ്രതിസ്ഥാനത്ത് നിര്‍ത്തി, അക്രമം അഴിച്ച് വിടുന്നത് രാജ്യത്ത് വലിയ സംഘര്‍ഷങ്ങള്‍ ഉണ്ടാക്കാന്‍ വഴിവയ്ക്കും. കാശ്മീരിലെ പെണ്‍കുട്ടിയെ കൊന്ന പൊലീസുകാര്‍ ഉള്‍പ്പെടെയുള്ളവരെ അറസ്റ്റ് ചെയ്തു. അതിവേഗ വിചാരണയും തുടങ്ങി. പ്രതികളെ അനുകൂലിക്കും വിധം സംസാരിച്ച മന്ത്രിമാരെ ബി.ജെ.പി പുറത്താക്കി. എന്നിട്ടും ചിലര്‍ ഹിന്ദുമത വിശ്വാസികളെയാകെ ആക്ഷേപിക്കുന്ന നിലപാടാണ് സ്വീകരിക്കുന്നത്.

മതവിദ്വേഷം ചീന്തുന്നവര്‍ക്കെതിരെ നിരവധി കേസുകള്‍ വിവിധ പൊലീസ് സ്‌റ്റേഷനുകളിലും ഡിജിപിക്കുമായി പലരും നല്‍കിയിട്ടുണ്ട്. ഒരാളെ പോലും പിടികൂടാനോ കേസെടുക്കാനോ പൊലീസ് തയ്യാറായിട്ടില്ല. ഇക്കാര്യം ചൂണ്ടിക്കാട്ടുന്നവരെ ഒറ്റപ്പെടുത്തി അക്രമിക്കാന്‍ സംഘടിത ശ്രമം നടക്കുന്നുണ്ട്. ഈ വര്‍ഗ്ഗീയ ചേരിതിരിവിന് ചില മാധ്യമങ്ങള്‍ക്ക് പങ്കുണ്ടെന്ന് ആക്ഷേപിക്കുന്ന തരത്തിലുള്ള ചര്‍ച്ചകളും സോഷ്യല്‍ മീഡിയയില്‍ നടക്കുന്നുണ്ട്. ഒരു പിഞ്ചു കുഞ്ഞിനെ അതിദാരുണമായി കൊലപ്പെടുത്തിയവര്‍ക്ക് നീതിപീഡം നല്‍കുന്ന പരമാവധി ശിക്ഷ നല്‍കണം. അതിന്റെ മറവില്‍ നിരപരാധികളുടെ ചോരതെരുവില്‍ വീഴ്ത്തരുത്.