കുടുംബാരോഗ്യ കേന്ദ്രങ്ങളിൽ മതിയായ ഡോക്ടർമാരെ നിയമിക്കണമെന്നാവശ്യപ്പെട്ടു സർക്കാർ ഡോക്ടർമാർ നാലുദിവസമായി നടത്തുന്ന ഒപി ബഹിഷ്കരണ സമരം പിൻവലിച്ചു. കേരള ഗവ.മെഡിക്കൽ ഓഫിസേഴ്സ് അസോസിയേഷൻ (കെജിഎംഒഎ) ഭാരവാഹികളുമായി മന്ത്രി കെ.കെ.ശൈലജ നടത്തിയ ചർച്ചയെത്തുടർന്നാണു തീരുമാനം.

സമരം അവസാനിപ്പിച്ചശേഷം അനുരഞ്ജന ചർച്ചയ്ക്കു തയാറായാൽ മതിയെന്നായിരുന്നു മന്ത്രിസഭായോഗത്തിന്റെ തീരുമാനം. നോട്ടീസ് പോലും നൽകാതെ ആരംഭിച്ച അനിശ്ചിതകാല സമരത്തെ ജനകീയമായി നേരിടുമെന്നും പ്രൊബേഷൻ കാലാവധി കഴിയാത്ത ഡോക്ടർമാർ സമരത്തിൽ പങ്കെടുക്കുന്നുണ്ടെങ്കിൽ അവരെ പിരിച്ചുവിടുമെന്നും മന്ത്രി കെ. കെ. ശൈലജ തുടർന്നു മുന്നറിയിപ്പു നൽകി. ഇതേത്തുടർന്നാണു സമരം അവസാനിപ്പിക്കാൻ കെജിഎംഒഎ മുൻകൈയെടുത്തത്.

പ്രധാന തീരുമാനങ്ങൾ: കുടുംബാരോഗ്യ കേന്ദ്രങ്ങളിൽ വൈകുന്നേരം വരെയുള്ള ഒപിയുമായി ഡോക്ടർമാർ സഹകരിക്കും. കേന്ദ്രങ്ങളിൽ കുറഞ്ഞതു മൂന്നു ഡോക്ടർമാരുടെ സേവനം ഉറപ്പുവരുത്തും. ഇവർ അവധിയെടുക്കുന്ന ദിവസങ്ങളിൽ പകരം സംവിധാനം ഏർപ്പെടുത്തുന്നതിനു ജില്ലാ മെഡിക്കൽ ഓഫിസറും ജില്ലാ പ്രോഗ്രാം മാനേജരും നേതൃത്വം നൽകുന്ന റിസർവ് ടീം ഉണ്ടാക്കും.

കുടുംബാരോഗ്യ കേന്ദ്രങ്ങളുടെ നടത്തിപ്പുമായി ബന്ധപ്പെട്ട പ്രായോഗിക വിഷമതകൾ പരിഹരിക്കാൻ ആരോഗ്യ വകുപ്പ് അഡീഷനൽ ചീഫ് സെക്രട്ടറി രാജീവ് സദാനന്ദന്റെ നേതൃത്വത്തിൽ കമ്മിറ്റിയെ നിയോഗിച്ചിട്ടുണ്ട്. കെജിഎംഒഎ പ്രതിനിധികൾ അടക്കമുള്ളവരുമായി ചർച്ച നടത്തും. മേയ് ആദ്യവാരം മന്ത്രിതല ചർച്ച നടത്തും. സമരത്തിന്റെ ഭാഗമായി അനധികൃതമായി ജോലിയിൽ പ്രവേശിക്കാത്തതിനു സസ്‌പെൻഡ് ചെയ്യപ്പെട്ടവർ വിശദീകരണം നൽകിയാൽ നടപടി ഒഴിവാക്കും.

ആവശ്യത്തിനുള്ള ഡോക്ടര്‍മാരെയും ജീവനക്കാരെയും നിയമിക്കാതെ പുതുതായി ആരംഭിച്ച കുടുംബാരോഗ്യകേന്ദ്രങ്ങളില്‍ സായാഹ്‌ന ഒ.പി ആരംഭിച്ചതില്‍ പ്രതിഷേധിച്ചാണ് സംസ്ഥാനത്തെ സര്‍ക്കാര്‍ ഡോക്ടര്‍മാര്‍ അനിശ്ചിതകാല സമരം ആരംഭിച്ചത്. അത്യാഹിത വിഭാഗങ്ങള്‍ ഒഴികെ ഒ.പികള്‍ പ്രവര്‍ത്തിക്കില്ലെന്ന് കേരള ഗവണ്‍മെന്റ് മെഡിക്കല്‍ ഓഫിസേഴ്‌സ് അസോസിയേഷന്‍ (കെ.ജി.എം.ഒ.എ) നിലപാട് എടുത്തു.

മുന്നൊരുക്കമില്ലാതെ കുടുംബാരോഗ്യകേന്ദ്രങ്ങളില്‍ സായാഹ്‌ന ഒ.പികള്‍ തുടങ്ങിയതില്‍ പ്രതിഷേധിച്ച് ജോലിയില്‍നിന്ന് വിട്ടുനിന്ന പാലക്കാട് കുമരംപുത്തൂര്‍ കുടുംബാരോഗ്യകേന്ദ്രത്തിലെ ഡോ. ലതികയെ സസ്‌പെന്റ് ചെയ്യുകയും രണ്ട് ഡോക്ടര്‍മാര്‍ക്ക് നോട്ടീസ് നല്‍കുകയും ചെയ്തതിനെത്തുടര്‍ന്നാണ് സര്‍ക്കാര്‍ ഡോക്ടര്‍മാരുടെ സംഘടന അനിശ്ചിതകാല സമരത്തിലേക്ക് കടന്നത്.

ആശുപത്രികളിലെത്തുന്ന രോഗികളുടെ എണ്ണം അനുസരിച്ച് ഒന്നുമുതല്‍ നാലുവരെ ഡോക്ടര്‍മാരാണ് ഒ.പിയില്‍ ഡ്യൂട്ടി ചെയ്യുന്നത്. ഇത്രയും ഡോക്ടര്‍മാരെ വെച്ച് ഒ.പി വൈകുന്നേരം ആറുവരെ നീട്ടണമെന്നാണ് ആരോഗ്യവകുപ്പ് ഉത്തരവിറക്കിയത്. ഈ സാഹചര്യത്തിലായിരുന്നു സമരം.