കോൺഗ്രസ്സിലെ ഗ്രൂപ്പ് രാഷ്ട്രീയ പ്രശ്നങ്ങൾ തുറന്ന് പറഞ്ഞ് കെ.മുരളീധരൻ MLA. നിയമസഭയ്ക്കുള്ളിൽ ഒറ്റക്കെട്ടാണെങ്കിലും പുറത്ത് ഒരേ വിഷയത്തിൽ വിവിധ അഭിപ്രായങ്ങൾ പറയുന്നത് കോൺഗ്രസ്സിന്റെ കെട്ടുറപ്പില്ലായ്മയാണ് വെളിവാക്കുന്നതെന്ന് കെ മുരളീധരൻ കോഴിക്കോട് പറഞ്ഞു.

കോഴിക്കോട് മുൻ മേയർ പി.ടി.മധുസൂദന കുറുപ്പിന്റെ സ്മരണാർത്ഥം ഏർപ്പെടുത്തിയ ഏറ്റവും മികച്ച സാമൂഹിക പ്രവർത്തകനുള്ള പുരസ്കാരം എം.കെ.മുനീർ MLA ക്ക് നൽക്കുന്ന ചടങ്ങിലാണ് മുൻ കെ.പി.സി.സി പ്രസിഡണ്ടും MLA യുമായ കെ. മുരളീധരൻ കോൺഗ്രസ്സിലെ ഗ്രൂപ്പുകൾ തമ്മിലുള്ള അഭിപ്രായ ഭിന്നതകൾ തുറന്നു പറഞ്ഞത്.

കെ.കരുണാകരനും സി.എച്ച് മുഹമ്മദ് കോയയും മുന്നണിക്ക് നേതൃത്വം നൽകിരുന്നപ്പോൾ സ്ഥാനാർത്ഥിത്വം സംബന്ധിച്ച് മാത്രമാണ് മുന്നണികൾ തമ്മിൽ അഭിപ്രായ ഭിന്നതകൾ ഉണ്ടായിരുന്നത് അതാവട്ടെ കോൺഗ്രസ്സിനെ ബാധിച്ചിരുന്നില്ല. എന്നാൽ ഇന്ന് എല്ലാ സമയവും ഏത് കാര്യത്തിനും കോൺഗ്രസ്സിലെ ഗ്രൂപ്പുകൾ തമ്മിൽ വഴക്കിടുകയാണെന്ന് മുരളീധരൻ തുറന്നു സമ്മതിച്ചു. നിയമസഭയ്ക്കുള്ളിൽ എല്ലാവരും ഒരുമിച്ചാണ് പ്രവർത്തിക്കുന്നത് എന്നാൽ ആ കെട്ടുറപ്പ് പുറത്ത് പ്രകടമാവുന്നില്ല.

പലപ്പോഴും പൊതു പ്രശനങ്ങളിൽ പ്രതികരിക്കാൻ പോലും നേതാക്കൾ മറന്നു പോവുന്നുണ്ടെന്നും 8 വയസ്സുകാരിയുടെ കൊലപാതകത്തിൽ മുതിർന്ന കോൺഗ്രസ്സ് നേതാക്കൾ പ്രതികരിക്കാത്തത് സമയം ലഭിക്കാത്തതിനാലാണെന്നും മുരളീധരൻ പരിഹസിച്ചു. കോൺഗ്രസ്സിലെ വിള്ളലുകളും പ്രശ്നങ്ങളും ചൂണ്ടിക്കാട്ടിയ കെ.മുരളീധരൻ ലീഗിലെ ഒത്തൊരുമായ പ്രശംസിച്ചു കൊണ്ടാണ് പ്രസംഗം അവസാനിപ്പിച്ചത്