ഇന്ത്യന്‍ യുദ്ധ ചരിത്രത്തില്‍ പ്രധാന പങ്കു വഹിച്ച സീ ഹോക് വിമാനത്തെ തിരുവനന്തപുരം വെള്ളയമ്പലത്തില്‍ സ്ഥിതിചെയ്യുന്ന ജവഹര്‍ബാലഭവനിലെത്തുന്നവര്‍ക്ക് ഇനി കൂടുതല്‍ മനോഹരമായി കാണാം . കഴിഞ്ഞ 26 വര്‍ഷമായി ജവഹര്‍ബാലഭവനില്‍ പ്രദര്‍ശിപ്പിച്ചിട്ടുള്ള ഈ യുദ്ധ വിമാനത്തിന്റെ ചുറ്റുപാടും മനോഹരമാക്കി മേല്‍ക്കൂര സ്ഥാപിച്ചു. വൈകുന്നേരങ്ങളില്‍ നീലവെളിച്ചത്തിന്റെ പശ്ചാത്തലത്തില്‍ ഇനി വിമാനം കാണാം.

വിമാനത്തിനു ചുറ്റും നടത്തിയ സൗന്ദര്യവത്ക്കരണത്തിന്റെ ഉദ്ഘാടനം മന്ത്രി എകെ ബാലന്‍ നിര്‍വഹിച്ചു. ഹാക്കര്‍ സീ ഹോക് വിഭാഗത്തില്‍പ്പെടുന്ന ഈ യുദ്ധ വിമാനം ഇന്ത്യയുടെ സൈനിക ചരിത്രത്തിന്റെ തിളക്കമുള്ള ഭാഗമാണ്. 1971 ലെ ഇന്ത്യ പാകിസ്ഥാന്‍ യുദ്ധത്തില്‍a പങ്കെടുത്തിട്ടുള്ള വിമാനമാണിത്. അന്ന് ചിറ്റഗോങ് തുറമുഖത്ത് ബോംബ് വര്‍ഷിച്ചത് ഇതില്‍ നിന്നുമാണ്.

ഐഎന്‍എസ് വിക്രാന്ത് എന്ന കപ്പലില്‍ നിന്നു പറന്നുയര്‍ന്നായിരുന്നു ഈ ഒറ്റ സീസര്‍ വിമാനം ചരിത്രം രചിച്ചത്. 40,000 അടി ഉയരത്തില്‍ പറക്കാന്‍ കഴിവുള്ള വിമാനത്തിന് 40 എംഎം വിഭാഗത്തിലുള്ള നാലു തോക്കുകള്‍ വഹിക്കാന്‍ ശേഷിയുണ്ടായിരുന്നു.

ഒപ്പം ബോംബുകളും വഹിക്കാന്‍ കഴിയും. കൂടാതെ 24 റോക്കറ്റുകളും വഹിക്കാനുള്ള ശേഷിയുണ്ടായിരുന്നു. ദക്ഷിണനാവിക സേനാ കമാന്‍ഡാണ് 1980 ല്‍ ജവഹര്‍ബാലഭവന് സീ ഹോക് വിമാനം നല്‍കിയത്. ഇത്തരം വിമാനങ്ങള്‍ കുട്ടികളില്‍ പ്രതിരോധ മേഖലകളെ കുറിച്ചു താത്പര്യമുണ്ടാക്കുമെന്നതായിരുന്നു ഇതിനു കാരണം.

ജവഹര്‍ ബാലഭവനില്‍ എയ്‌റോ മോഡലിങ് കോഴ്‌സ് നടത്തുന്നതിനാലാണ് ഇവിടെ വിമാനം ലഭിച്ചത്. ഇന്ത്യയിലെ ജവഹര്‍ബാലഭവനുകളില്‍ ഇവിടെ മാത്രമാണ് എയ്‌റോമോഡലിങ് കോഴ്‌സുള്ളത്. 1980ല്‍ ലഭിച്ച സീ ഹോക് വിമാനം കുട്ടികളെ മാത്രമല്ല മുതിര്‍ന്നവരെപ്പോലും വളരെയധികം ആകര്‍ഷിക്കുന്നതാണ്. 

വിമാനം പ്രദര്‍ശിപ്പിച്ചിരിക്കുന്നിടത്ത് മേല്‍ക്കൂര നിര്‍മ്മിക്കുന്നതിനൊപ്പം പൂന്തോട്ടവും നടപ്പാതയും നിര്‍മ്മിച്ചിട്ടുണ്ട്. വിമാനത്തില്‍ ലൈറ്റുകള്‍ പിടിപ്പിച്ച് ആകര്‍ഷമാക്കിയിട്ടുമുണ്ട്. വിമാനത്തിന്റെ അറ്റകുറ്റപ്പണിയും പെയിന്റിങ്ങും നാവികസേന നേരിട്ടാണ് ചെയ്യുന്നത്.