വിവാഹത്തിന് ബന്ധുക്കള്‍ എതിര്‍ത്തു... കമിതാക്കള്‍ കൊക്കയില്‍ ചാടി ആത്മഹത്യ ചെയ്തു
വിവാഹത്തിന് ബന്ധുക്കള്‍ എതിര്‍ത്തതിനെതുടര്‍ന്ന് കണ്ണൂര്‍ കാഞ്ഞിരക്കൊല്ലി ശശിപ്പാറ കൊക്കയില്‍ കമിതാക്കള്‍ ആത്മഹത്യ ചെയ്ത നിലയില്‍ കണ്ടെത്തി. കണ്ണൂര്‍ പാപ്പിനിശേരി ധര്‍മക്കിണറിനടുത്ത് ടികെ ഹൗസില്‍ വിനോദ് കുമാറിന്റെ മകന്‍ കമല്‍കുമാര്‍ (23), പാപ്പിനിശേരി വെസ്റ്റിലെ പുതിയപുരയില്‍ രമേശന്റെ മകള്‍ പിപി അശ്വതി (20) എന്നിവരെയാണ് മരിച്ചനിലയില്‍ കണ്ടെത്തിയത്.
മൃതദേഹങ്ങള്‍ യുവതിയുടെ ഷാള്‍ ഉപയോഗിച്ച് പരസ്പരം കെട്ടിയനിലയിലാണ് ഉണ്ടായിരുന്നത്. കമല്‍കുമാറും അശ്വതിയും വ്യത്യസ്ത ജാതിയില്‍പ്പെട്ടവരായതിനാല്‍ വിവാഹത്തിന് ബന്ധുക്കള്‍ എതിര് നിന്നതിനെതുടര്‍ന്ന് ഇരുവരും ആത്മഹത്യ ചെയ്യുകയായിരുന്നുവെന്നാണ് വിവരം.
രണ്ടാംവര്‍ഷ ബിരുദ വിദ്യാര്‍ഥിനിയാണ് അശ്വതി. ചൊവ്വാഴ്ച രാവിലെ എംപ്ലോയ്‌മെന്റ് എക്‌സ്‌ചേഞ്ചില്‍ പോകണമെന്നുപറഞ്ഞ് വീട്ടില്‍നിന്നിറങ്ങിയ അശ്വതി തിരിച്ചെത്തിയില്ലെന്നു കാണിച്ച് ബന്ധുക്കള്‍ വളപട്ടണം പൊലീസില്‍ പരാതി നല്‍കിയിരുന്നു. പൊലീസ് അന്വേഷണം നടത്തുന്നതിനിടെയാണ് കമല്‍കുമാറിനെയും കാണാതായ വിവരം ലഭിച്ചത്. മൊബൈല്‍ഫോണ്‍ പരിശോധിച്ചപ്പോള്‍ ഇവര്‍ ഇരിട്ടി മേഖലയില്‍ ഉള്ളതായി പൊലീസിന് വിവരം ലഭിച്ചിരുന്നു.
ഇതിനിടെ കാഞ്ഞിരക്കൊല്ലിയിലെത്തിയ യുവാവും യുവതിയും സഞ്ചരിച്ച ബൈക്ക് ഉപേക്ഷിച്ചനിലയില്‍ കണ്ടെത്തിയതോടെ നാട്ടുകാര്‍ നടത്തിയ തെരച്ചിലിലാണ് ശശിപ്പാറ വ്യൂ പോയിന്റിനു താഴെയുള്ള വനത്തിലെ കൊക്കയില്‍ ഇരുവരുടെയും മൃതദേഹം കണ്ടെത്തിയത്. പയ്യാവൂര്‍, ശ്രീകണ്ഠപുരം, വളപട്ടണം പൊലീസും ഇരിട്ടിയില്‍ നിന്നെത്തിയ അഗ്‌നിരക്ഷസേനയും ചേര്‍ന്നാണ് മൃതദേഹങ്ങള്‍ പുറത്തെടുത്തത്. ഇന്‍ക്വസ്റ്റ് നടത്തിയ മൃതദേഹം പോസ്റ്റ് മോര്‍ട്ടത്തിനായി പരിയാരം മെഡിക്കല്‍ കോളേജ് മോര്‍ച്ചറിയിലേക്ക് മാറ്റി.
https://www.facebook.com/Malayalivartha
