ചെങ്ങന്നൂരിൽ തിരിച്ചടിച്ചത് ഉമ്മൻ ചാണ്ടിയുടെ എ ഐ സി സി നിയമനവും ചെന്നിത്തലയുടെ ഹൈന്ദവ മുഖവും കോൺഗ്രസിന്റെ ന്യൂനപക്ഷ വിരുദ്ധയും. ഇലക്ഷന് തലേന്നാണ് ഉമ്മൻ ചാണ്ടിയെ എ ഐ സി സിയിലെ മഹാ ബുദ്ധിമാൻമാർ ആന്ധ്രയുടെ ചുമതലയുള്ള എഐസിസി ജനറൽ സെക്രട്ടറിയാക്കിയത്.

കേരളം വലിയൊരു മാറ്റത്തിന്റെ വക്കിലാണെന്ന് കോൺഗ്രസും ബിജെപിയും മനസിലാക്കാതെ പോയതാണ് അവരുടെ സമീപകാല ദുരന്തം. തെരഞ്ഞടുപ്പിന് തലേന്നാണ് കുമ്മനത്തെ ഗവർണറാക്കിയത്. ഒരു പാർട്ടിയുടെ സംസ്ഥാന പ്രസിഡന്റിനെ സംസ്ഥാന നേതാവ് മത്സരിക്കുന്ന ഇലക്ഷൻ ഗോദയിൽ നിന്നും മടക്കി വിളിക്കുമ്പോൾ അത് നൽകുന്ന സൂചന ബി ജെ പി മനസിലാക്കിയില്ല.

ചെങ്ങന്നൂർ പോലെ ക്രൈസ്തവാധിക്യമുള്ള സ്ഥലത്ത് തെരത്തടുപ്പ് രംഗത്ത് സജീവമായിരിക്കുമ്പോഴാണ് ഉമ്മൻ ചാണ്ടിയെ മടക്കി വിളിച്ചത്. അത് എ ഐ സി സി ആസ്ഥാനത്തെ മന്ദബുദ്ധികൾ മനസിലാക്കിയില്ല.

കേരളത്തിലെ ന്യൂനപക്ഷങ്ങൾ സിപിഎം ആയിക്കഴിഞ്ഞു എന്നതിന്റെ തെളിവാണ് ചെങ്ങന്നൂർ. ന്യൂനപക്ഷങ്ങളുടെ മുഖ്യശത്രു ബിജെപിയാണ്. അതിനെ നേരിടാൻ ഇടതു ശക്ഷികൾക്ക് മാത്രമേ കഴിയൂ എന്ന് ക്രൈസ്തവ, ഇസ്ലാം മതവിശ്വാസികൾ കരുതുന്നു. ന്യൂനപക്ഷങ്ങൾക്ക് പിന്തുണ നൽകുന്നത് ഇടതുപാർട്ടികളാണ്. അവർ ഇടതിൽ സുരക്ഷിതത്വം കണ്ടെത്തുന്നു. പണ്ട് ക്രൈസ്തവരും ഇസ്ലാം മത വിശ്വാസികളും കോൺഗ്രസിനൊപ്പമായിരുന്നു. കെ എം മാണിയും ഉമ്മൻ ചാണ്ടിയും പി കെ കുഞ്ഞാലിക്കുട്ടിയും അവർക്ക് സംരക്ഷണം നൽകിയിരുന്നു. കഴിഞ്ഞ യുഡിഎഫ് സർക്കാരിന്റെ കാലത്ത് ന്യൂനപക്ഷങ്ങളുടെ സർക്കാരാണ് കേരളം ഭരിക്കുന്നതെന്ന് പറഞ്ഞു കേട്ടിരുന്നു.

എന്നാൽ കാലാവസ്ഥ മാറി. രമേശ് ചെന്നിത്തലയുടെ നേതൃത്വത്തിൽ കോൺഗ്രസ് മാറിയതോടെയാണ് ന്യൂനപക്ഷങ്ങൾ കോൺഗ്രസിൽ നിന്നകന്നത്. ചെന്നിത്തലയുടെ ഹൈന്ദവ മുഖം കേരളത്തിൽ പാർട്ടിയെ തകർത്തു. യഥാർത്ഥത്തിൽ സജി ചെറിയാൻ നന്ദി പറയേണ്ടത് ചെന്നിത്തലയോടാണ്. അമിത് ഷായും രാഹുൽ ഗാന്ധിയും സജി ചെറിയാന് നൽകിയ പിന്തുണ വിവരണാതീതമാണ്. പിണറായി വിജയന്റെ ചങ്കൂറ്റത്തിന് മുന്നിൽ കേരളം തപ്പടിക്കുന്നു. മാധ്യമങ്ങളുടെ അതിരുവിട്ട ആക്റ്റിവിസം പിണറായിക്ക് കൂടുതൽ ആരാധകരെ നൽകി എന്നു വേണം മനസിലാക്കാൻ.

സജി ചെറിയാനെ പോലെ ഒരു ക്രൈസ്തവന് മുന്നിൽ അയ്യപ്പസേവാസംഘത്തിന്റെ നേതാവിനെ നിർത്തി കൊടുക്കാൻ കോൺഗ്രസിന്റെ നേതാക്കൾ കാണിച്ച വിവേകം എടുത്തു പറയേണ്ട കാര്യമാണ്. ചുരുക്കത്തിൽ സജി ചെറിയാനെ ജയിച്ചത് എൽഡിഎഫ് അല്ല ,യു ഡി എഫും ബി ജെ പിയുമാണ്.