പൊലീസ് ഡ്രൈവര്‍ ഗവാസ്‌കറെ മര്‍ദ്ദിച്ച കേസില്‍ എഡിജിപിയുടെ മകള്‍ക്കെതിരെ തെളിവില്ലെന്ന് പൊലീസ്. കേസില്‍ നിയമോപദേശം തേടണമെന്നാണ് പൊലീസ് വ്യക്തമാക്കുന്നത്. എ.ഡി.ജി.പിയുടെ മകള്‍ക്കെതിരെ ചുമത്തിയിരിക്കുന്ന മൂന്ന് വകുപ്പുകളില്‍ ഔദ്യോഗിക കൃത്യനിര്‍വഹണം തടസപ്പെടുത്തിതിന് ജാമ്യം ലഭിക്കില്ല. ഇതെല്ലാം മുന്‍കൂട്ടിക്കണ്ടാണ് ഇത്തരത്തിലൊരു തീരുമാനം പൊലീസ് എടുത്തതെന്ന് അറിയുന്നു. എ.ഡി.ജി.പിയുടെ മകള്‍ക്കെതിരെ ശക്തമായ തെളിവുകള്‍ ഉണ്ടെന്ന വിവരം ചികിത്സിച്ച ഡോക്ടര്‍ ഉള്‍പ്പെടെയുള്ളവരുടെ മൊഴികളില്‍ നിന്ന് വ്യക്തമാണ്. തുടര്‍ന്ന് എ.ഡി.ജി.പി മകള്‍ക്ക് മുന്‍കൂര്‍ ജാമ്യംലഭിക്കാന്‍ ഹൈക്കോടതിയെ സമീപിച്ചിരുന്നു. 

അതേസമയം ക്യാമ്പിലെ നാല് ദിവസ വേതനക്കാരായ ക്യാമ്പ് ഫോളോവേഴ്‌സിനെ ഉപയോഗിച്ച് വീട്ടിലെ ടൈല്‍സ് പണി ചെയ്യിപ്പിച്ച എസ്.എ.പി ഡെപ്യൂട്ടി കമന്‍ഡാന്റ് പി.വി. രാജുവിനെ രക്ഷിക്കാന്‍ ശ്രമം നടക്കുന്നതായി ആക്ഷേപം ഉയര്‍ന്നു. നടപടിക്ക് ഡി.ജി.പി ഉത്തരവിട്ടിട്ടും അട്ടിമറിക്കുകയാണെന്നാണ് ആക്ഷേപം. ക്യാമ്പ് ഫോളോവേഴ്‌സിനെ കൊണ്ട് രാജു ജോലി ചെയ്യിച്ചെന്നും ഇയാള്‍ക്കെതിരെ അന്വേഷണത്തിനും സ്ഥലം മാറ്റാനും ഐ.ജി ഇ.ജെ.ജയരാജ് ശുപാര്‍ശ നല്‍കിയിരുന്നു. ഇതുപ്രകാരം രാജുവിനെ സ്ഥലം മാറ്റാന്‍ ഡി.ജി.പി ലോക്‌നാഥ് ബെഹ്‌റ സര്‍ക്കാരിനോട് ശുപാര്‍ശ ചെയ്തു. 

എന്നാല്‍ ശുപാര്‍ശ ഇതുവരേയും നടപ്പായില്ല. ഐ.പി.എസ് അസോസിയേഷന്റെ ശക്തമായ എതിര്‍പ്പാണ് ഇതിന് കാരണമെന്ന് അറിയുന്നു. എന്നാല്‍ പൊലീസ് ആസ്ഥാനത്ത് ഉന്നത പൊലീസ് ഉദ്യോഗസ്ഥരുമായി മുഖ്യമന്ത്രി നടത്തുന്ന യോഗത്തില്‍ ഇക്കാര്യം ചര്‍ച്ചയാകുമെന്ന് അറിയുന്നു. വരാപ്പുഴ ശ്രീജിത്ത് വധം സി.ബി.ഐക്ക് വിടാന്‍ സാധ്യതയുണ്ട്. അത് മുകൂട്ടി കണ്ട് അന്വേഷണം ശക്തമാക്കാന്‍ മുഖ്യമന്ത്രി യോഗത്തില്‍ ആവശ്യപ്പെട്ടേക്കും.