മഹാരാഷ്ട്ര ബന്ദില് പരക്കെ അക്രമം... ബസുകള്ക്ക് നേരെ കല്ലേറ്, അഗ്നിശമന സേനയുടെയും പൊലിസിന്റെയും വാഹനങ്ങളും ട്രക്കും സമരക്കാര് അഗ്നിക്ക് ഇരയാക്കി
മറാത്ത സമുദായക്കാര് മുംബൈ, നവി മുംബൈ, പാല്ഘര്, റായ്ഗഡ്, താണെ, എന്നിവിടങ്ങളില് പ്രഖ്യാപിച്ച ബന്ദില് പരക്കെ അക്രമം. സര്ക്കാര് ജോലിക്കും വിദ്യാഭ്യാസത്തിനും സംവരണം ആവശ്യപ്പെട്ട് തുടരുന്ന പ്രക്ഷോഭം പലയിടുത്തും അക്രമാസക്തമായി. സമരക്കാര് ബസുകള്ക്ക് നേരെ കല്ലെറിയുകയും റോഡില് ടയര് കൂട്ടിയിട്ട് കത്തിക്കുകയും ചെയ്തു. പലയിടങ്ങളില് കടകള് ബലമായി അടപ്പിച്ചു. മഹാരാഷ്ട്ര മുഖ്യമന്ത്രി ദേവേന്ദ്ര ഫട്നാവിസിനെതിരെ മുദ്രാവാക്യം മുഴക്കിയാണ് സമരക്കാര് രംഗത്തുവന്നത്.
പ്രക്ഷോഭത്തിന്റെ ഭാഗമായി കഴിഞ്ഞ ദിവസമുണ്ടായ കല്ലേറില് ഒരു പൊലീസുകാരന് മരിക്കുകയും രണ്ട് ജനപ്രതിനിധികള്ക്ക് മര്ദനമേല്ക്കുകയും ചെയ്തിരുന്നു. സംവരണം ആവശ്യപ്പെട്ട് ഔറംഗാബാദിലെ കായ്ഗാവില് വഴിതടയുന്നതിനിടെ മറാത്ത യുവാവ് കാകാസാഹെബ് ഷിണ്ഡെ ഗോദാവരി നദിയില് ചാടി ആത്മഹത്യ ചെയ്തതില് പ്രകോപിതരായാണ് മറാത്തി ക്രാന്തി മോര്ച്ച ചൊവ്വാഴ്ച ബന്ദിന് ആഹ്വാനം ചെയ്തത്.കായ്ഗാവില് ആത്മഹത്യ ചെയ്ത യുവാവിന്റെ സംസ്കാര ചടങ്ങിന് എത്തിയ ഔറംഗാബാദ് എം.പി ശിവസേനയിലെ ചന്ദ്രകാന്ത് ഖൈറെ, കോണ്ഗ്രസ് എം.എല്.സി സുഭാഷ് സമ്പദ് എന്നിവരെ മറാത്തകള് മര്ദിക്കുകയുമുണ്ടായി. ഇവരെ പൊലിസ് പിന്നീട് രക്ഷപ്പെടുത്തുകയായിരുന്നു.
ഉസ്മാനാബാദ് പൊലിസ് സ്റ്റേഷനിലെ കോണ്സ്റ്റബിള് ശ്യാം കട്ഗവങ്കറാണ് കല്ലേറില് പരിക്കേറ്റ് മരിച്ചത്. അഗ്നിശമന സേനയുടെയും പൊലിസിന്റെയും വാഹനങ്ങളും ട്രക്കും സമരക്കാര് അഗ്നിക്ക് ഇരയാക്കി.
https://www.facebook.com/Malayalivartha
