മാതാപിതാക്കളെ സംരക്ഷിക്കാത്ത സര്ക്കാര് ഉദ്യോഗസ്ഥര്ക്ക് ഇനി രക്ഷയില്ല, പുതിയ നിയമം വരുന്നു
മാതാപിതാക്കളെ സംരക്ഷിക്കാത്ത സര്ക്കാര് ഉദ്യോഗസ്ഥര്ക്ക് ഇനി രക്ഷയില്ല.ഇതിനായി പുതിയ നിയമമൊരുക്കുകയാണ് അസം സര്ക്കാര്. ജോലി കിട്ടി കഴിഞ്ഞാല് സ്വന്തം കാര്യം മാത്രം നോക്കുന്നവര്ക്ക് ഉഗ്രന് പണിയാണ് സര്ക്കാര് നടപ്പാക്കുന്നത്.
സ്വന്തമായി വരുമാനമില്ലാത്ത പ്രായമായ മാതാപിതാക്കളെയും ഭിന്നശേഷിക്കാരായ സഹോദരങ്ങളേയും പരിപാലിക്കാത്ത സര്ക്കാര് ഉദ്യോഗസ്ഥന്മാരുടെ ശമ്പളം വെട്ടിച്ചുരുക്കുന്നതാണ് നിയമം. ഒക്ടോബര് രണ്ടു മുതല് ഇത് നടപ്പിലാക്കാനാണ് തീരുമാനം.
തെരുവുകളിലും വൃദ്ധസദനങ്ങളിലുമായി എന്തുമാത്രം വയോജനങ്ങളാണ് താമസിക്കുന്നത്. മിക്കവരും നല്ല രീതിയില് മുമ്പ് കഴിഞ്ഞിരുന്നവരാണ്. സാഹചര്യങ്ങള് മാറിയപ്പോള് മക്കള്ക്ക് സ്വന്തം മാതാപിതാക്കള് അന്യരായി മാറുകയാണ്. അതിന് കടിഞ്ഞാണിടുന്നതിനാണ് ഈ പുതിയ നിയമം വരുന്നത്.
മാതാപിതാക്കളെ പരിപാലിച്ചില്ലെങ്കില് ഉദ്യോഗസ്ഥരുടെ ശമ്പളത്തില് നിന്ന് പത്ത് ശതമാനം വെട്ടിക്കുറക്കുകയും അത് മാതാപിതാക്കളുടെ അക്കൗണ്ടിലേക്ക് മാറ്റുകയും ചെയ്യുമെന്ന് അസം മന്ത്രി ഹിമന്ദ ബിശ്വ ശര്മ പറഞ്ഞു. ഏതെങ്കിലും സഹോദരങ്ങളും ഇത്തരത്തില് മാതാപിതാക്കള്ക്കൊപ്പം പരിപാലിക്കപ്പെടാതിരിക്കുന്നുണ്ടെങ്കില് 15 ശതമാനം വരെ ശമ്പളത്തില്നിന്ന് വെട്ടിക്കുറക്കുമെന്നും മന്ത്രി വ്യക്തമാക്കി.
സര്ക്കാര് ഉദ്യോഗസ്ഥര് മാതാപിതാക്കളെ പരിപാലിക്കുന്നത് ഉറപ്പാക്കുന്നതിനുള്ള 'പ്രണാം'(അസം എംപ്ലോയീസ് പാരന്റ്സ് റെസ്പോന്സിബ്ലിറ്റി ആന്റ് നോംസ് ഫോര് അക്കൗണ്ടബ്ലിറ്റി ആന്റ് മോണിറ്ററിങ്) എന്ന നിയമം കഴിഞ്ഞ വര്ഷം സംസ്ഥാന നിയമസഭ പാസാക്കിയിരുന്നു. ഒക്ടോബറില് കര്ശനമായ പുതിയ നിയമം നടപ്പിലാവുന്നതോടെ ഇത്തരത്തില് നിയമം നടപ്പാക്കുന്ന രാജ്യത്തെ ആദ്യ സംസ്ഥാനമായി അസം മാറും.
https://www.facebook.com/Malayalivartha