ബി.ജെ.പിക്കെതിരെ വിശാല സഖ്യത്തിനൊരുങ്ങി മമത; സോണിയയുമായും രാഹുലുമായും ചര്‍ച്ച നടത്തി
ബി.ജെ.പിക്കെതിരെ വിശാല എെക്യം രൂപീകരിക്കാന്‍ പ്രതിപക്ഷ പാര്‍ട്ടികളുമായി കൂടിക്കാഴ്ച നടത്തി ബംഗാള്‍ മുഖ്യമന്ത്രി മമതാ ബാനര്‍ജി. ഇതിന്റെ ഭാഗമായി കോണ്‍ഗ്രസ് അദ്ധ്യക്ഷന്‍ രാഹുല്‍ ഗാന്ധി, സോണിയ ഗാന്ധി എന്നിവരുമായി മമത ചര്‍ച്ച നടത്തി. കൂടാതെ ബി.ജെ.പിയില്‍ പാര്‍ട്ടിയുടെ നയവുമായി ഇടഞ്ഞു നില്‍ക്കുന്ന നേതാക്കളുമായും മൂന്ന് ദിവസത്തെ ഡല്‍ഹി സന്ദര്‍ശനത്തിനിടെ മമത ചര്‍ച്ച നടത്തും. 2019ലെ തിരഞ്ഞെടുപ്പ് പടിവാതില്‍ക്കല്‍ എത്തി നില്‍ക്കെ മമതയുടെ സന്ദര്‍ശനത്തെ ഏറെ പ്രാധാന്യത്തോടെയാണ് രാഷ്ട്രീയ നിരീക്ഷകര്‍ നോക്കിക്കാണുന്നത്.
വിശാലസഖ്യത്തിന്റെ പ്രധാനമന്ത്രി സ്ഥാനാര്‍ത്ഥി മമതയാവുമെന്ന് നേരത്തെ റിപ്പോര്‍ട്ടുകളുണ്ടായിരുന്നു. എന്നാല്‍ ബി.ജെ.പിയെ തോല്‍പ്പിക്കുകയാണ് പ്രധാനലക്ഷ്യമെന്നും അതിന് ശേഷം പ്രധാനമന്ത്രിയെ തീരുമാനിക്കുമെന്നും മാദ്ധ്യമങ്ങളുടെ ചോദ്യത്തിന് മമത പറഞ്ഞു. നിലവിലെ രാഷ്ട്രീയ സാഹചര്യവും ഭാവിയില്‍ ഒരുമിച്ച്‌ തിരഞ്ഞെടുപ്പിനെ നേരിടുന്നതിനെ കുറിച്ചും തങ്ങള്‍ ചര്‍ച്ച ചെയ്‌തെ‌ന്ന് കോണ്‍ഗ്രസ് നേതാക്കളുമായുള്ള ചര്‍ച്ചയ്ക്ക് ശേഷം മമത പറഞ്ഞു.
''പ്രതിപക്ഷത്തിന്റെ യോജിച്ച നേതൃത്വമാവും 2019ല്‍ ബി.ജെ.പിയെ നേരിടുക. ബി.ജെ.പിയെ തുടച്ചു നീക്കുക എന്നതാണ് ആദ്യലക്ഷ്യം. ഓരോ സംസ്ഥാനത്തും ഏത് പാര്‍ട്ടിയാണോ ശക്തമായി നില്‍ക്കുന്നത് അവര്‍ പോരാട്ടം നയിക്കും. ബംഗാളില്‍ ഞങ്ങള്‍ക്കാണ് ശക്തി. അവിടെ സ്വന്തം നിലയില്‍ പോരാട്ടം നടത്താന്‍ ഞങ്ങള്‍ക്ക് സാധിക്കും''-മമത പറഞ്ഞു.
https://www.facebook.com/Malayalivartha
