ഛത്തീസ്ഗഢിലെ ബലോഡ ബസാര്‍ ജില്ലയില്‍ ഗ്രാമപ്പഞ്ചായത്ത് ഗോശാലയില്‍ അടച്ചിട്ട 18 പശുക്കള്‍ ശ്വാസംമുട്ടി ചത്തു. അലഞ്ഞു തിരിയുന്ന കന്നുകാലികള്‍ കൃഷി നശിപ്പിച്ചതിനെ തുടര്‍ന്ന് നാട്ടുകാര്‍ പിടികൂടി ഗോശാലയില്‍ പൂട്ടിയിടുകയായിരുന്നു. ചിലതിനെ പുറത്തും കെട്ടിയിട്ടു. തീറ്റ നല്‍കാന്‍ കഴിയാത്തതിനാല്‍ തുറസ്സായ സ്ഥലത്ത് കെട്ടിയിട്ട പശുക്കളെ പിന്നീട് അഴിച്ചുവിട്ടു. മുറിയില്‍ പൂട്ടിയിട്ടവയെ ആരും ശ്രദ്ധിച്ചില്ല.

രൂക്ഷഗന്ധം വന്നതിനെത്തുടര്‍ന്ന് മുറി തുറന്നപ്പോഴാണ് പശുക്കള്‍ ചത്തതായി അറിയുന്നത്. സംഭവത്തില്‍ അന്വേഷണം തുടങ്ങിയതായി കളക്ടര്‍ ജനക് പ്രസാദ് പഠക് പറഞ്ഞു. 2017 ഓഗസ്റ്റില്‍ പട്ടിണിമൂലവും സംരക്ഷണം കിട്ടാതെയും ചത്തീസ്ഗഢിലെ മൂന്നു സര്‍ക്കാര്‍ ഗോശാലകളിലായി ഇരുനൂറോളം പശുക്കള്‍ ചത്തിരുന്നു. ഇത് സര്‍ക്കാരിനെതിരേ കടുത്ത വിമര്‍ശനത്തിന് ഇടയാക്കിയിരുന്നു.