ഉരുള്‍പൊട്ടലില്‍ വീട് തകര്‍ന്ന് രണ്ടുപേര്‍ മരിച്ചു. എടപ്പുഴയിലെ വട്ടംതൊട്ടിയില്‍ ഷൈനി (41), ഇവരുടെ ഭര്‍തൃപിതാവ് ഇമ്മട്ടിക്കല്‍ തോമസ് (70) എന്നിവരാണ് മരിച്ചത്. ബുധനാഴ്ച വൈകീട്ടുണ്ടായ ഉരുള്‍പൊട്ടലിലാണ് ഇവരുടെ വീടിന് മുകളിലേക്ക് കല്ലും മണ്ണും പാറയും ഒഴുകിയെത്തിയത്. അപകടത്തില്‍ വീട് പൂര്‍ണമായും തകര്‍ന്നു. ഉരുള്‍പൊട്ടലിനെ തുടര്‍ന്ന് തകര്‍ന്നടിഞ്ഞ വീടിനടിയില്‍ ഷൈനിയും തോമസും അകപ്പെടുകയായിരുന്നു.

കനത്ത മഴ മൂലം രക്ഷാപ്രവര്‍ത്തനം വേഗത്തില്‍ നടത്താനായില്ല. വിവരമറിഞ്ഞ് ഇരിട്ടിയില്‍നിന്നെത്തിയ ഫയര്‍ഫോഴ്‌സും കരിക്കോട്ടക്കരി പൊലീസും നാട്ടുകാരും നടത്തിയ രക്ഷാപ്രവര്‍ത്തനത്തിനൊടുവില്‍ ഇരുവരെയും പുറത്തെടുത്ത് ആശുപത്രിയിലെത്തിച്ചെങ്കിലും മരിച്ചു. ഷൈനിയുടെ ഭര്‍ത്താവ് ജയ്‌സണ്‍ അയ്യങ്കുന്നിലെ ലോഡിങ് തൊഴിലാളിയാണ്.

ശക്തമായ മഴയെത്തുടര്‍ന്ന് റോഡിലേക്ക് മണ്ണിടിഞ്ഞു വീണ് ദേശീയപാതയില്‍ ഒരുമണിക്കൂറോളം നേരം വാഹന ഗതാഗതം തടസ്സപ്പെട്ടു. തളിപ്പുഴക്കടുത്ത ഒരു റിസോര്‍ട്ടിനോട് ചേര്‍ന്ന സ്ഥലമാണ് ഇടിഞ്ഞു റോഡിലേക്ക് പതിച്ചത്. ലക്കിടിയില്‍നിന്നും രക്ഷാപ്രവര്‍ത്തനം കഴിഞ്ഞു തിരിച്ചുപോകുകയായിരുന്ന അഗ്‌നിശമന ജീവനക്കാര്‍ സ്ഥലത്തെത്തി റെഡ്‌ക്രോസ് വളണ്ടിയര്‍മാരോടൊപ്പം റോഡിലെ മണ്ണ് നീക്കം ചെയ്തു. കഴിഞ്ഞ രണ്ടുദിവസമായി വയനാടിന്റെ പലഭാഗങ്ങളിലും ശക്തമായ മഴയാണ് അനുഭവപ്പെടുന്നത്.