ഇന്ധന വില വര്‍ധനയില്‍ ബിജെപിയുടെ പ്രചാരണങ്ങളെ ട്രോളി മുന്‍ എംപിയും കോണ്‍ഗ്രസ് സോഷ്യല്‍ മീഡിയ വിഭാഗം മേധാവിയുമായ നടി ദിവ്യ സ്പന്ദന. ലോകത്തെ മാറ്റിമറിച്ച സമവാക്യങ്ങള്‍ക്കൊപ്പം ഇനി നമോയുമുണ്ടെന്ന് പരിഹസിച്ച് ദിവ്യ ട്വീറ്റ് ചെയ്തു. പെെതഗോറസ് സിദ്ധാന്തവും ആല്‍ബര്‍ട്ട് ഐന്‍സ്റ്റീന്‍റെയും ന്യൂട്ടന്‍റെയും സമവാക്യവും ഇന്ധന വില വര്‍ധനയില്‍ ബിജെപിയുടെ ബാര്‍ ഡയഗ്രവും ഉള്‍പ്പെടുത്തിയാണ് ട്രോൾ. ഇതിനൊപ്പം ലോകത്തെ മാറ്റിമറിച്ച സമവാക്യങ്ങളെന്ന് അടിക്കുറിപ്പും നല്‍കി.

യുപിഎ കാലത്തെയും മോദി ഭരണത്തിലെയും ഇന്ധന വില കാണിച്ച് കൊണ്ടാണ് കഴിഞ്ഞ ദിവസം ബിജെപി ട്വീറ്റ് ചെയ്തത്. പെെതഗോറസ്, ആല്‍ബര്‍ട്ട് ഐന്‍സ്റ്റീന്‍, ഐസക് ന്യൂട്ടന്‍ എന്നിവരോടൊപ്പം പ്രധാനമന്ത്രി നരേന്ദ്ര മോദിയുടെ ചിത്രവും ഉള്‍പ്പെടുത്തിയ ട്വീറ്റ് ഇതിനകം തരംഗമായി കഴിഞ്ഞു.

മോദി ഭരണകാലത്ത് പെട്രോള്‍ വില 13 ശതമാനം മാത്രമാണ് വര്‍ധിച്ചതെന്നും 42ഉം 83.7 ശതമാനവുമുള്ള വില വര്‍ധനയാണ് കുറഞ്ഞതെന്നായിരുന്നു ബിജെപിയുടെ വാദം. ഇതിനെതിരെയാണ് ദിവ്യ സ്പന്ദനയുടെ ട്വീറ്റ്.