അഴിമതിക്കേസില്‍ മുന്‍ തമിഴ്‌നാട് വിദ്യാഭ്യാസ മന്ത്രി അറസ്റ്റില്‍
നൂറ് കോടിരൂപയുടെ അഴിമതിക്കേസില്‍ മുന്‍ ഡിംഎംകെ മന്ത്രിയെ സിബിഐ അറസ്റ്റുചെയ്തു. തമിഴ്‌നാട് മുന്‍ വിദ്യാഭ്യാസ മന്ത്രിയായിരുന്ന അന്‍ബില്‍ മഹേഷ് പൊയ്യമൊഴിയെയാണ് സെന്‍ട്രല്‍ ക്രൈംബ്രാഞ്ച് അറസ്റ്റുചെയ്തത്. അതേസമയം ഭരണകക്ഷിയായ ടിവികെ എതിരാളികളെ നേരിടാന്‍ അന്വേഷണ ഏജന്‍സികളെ ഉപയോഗിക്കുകയാണെന്ന് ഡിഎംകെ ആരാേപിച്ചു.
അറസ്റ്റില്‍നിന്ന് സംരക്ഷണം തേടി സമര്‍പ്പിച്ച മുന്‍കൂര്‍ ജാമ്യാപേക്ഷ മദ്രാസ് ഹൈക്കോടതി ഇന്ന് തള്ളിയിരുന്നു. ഇതിന് പിന്നാലെയായിരുന്നു അറസ്റ്റ് രേഖപ്പെടുത്തിയത്. മുന്‍ മന്ത്രി സമര്‍പ്പിച്ച ഹര്‍ജി ജസ്റ്റിസ് വി ലക്ഷ്മിനാരായണന്‍ തള്ളുകയായിരുന്നു. തനിക്കെതിരെ രജിസ്റ്റര്‍ ചെയ്ത എഫ്‌ഐആര്‍ റദ്ദാക്കണമെന്ന് ആവശ്യപ്പെട്ട് മഹേഷ് കോടതിയെ സമീപിച്ചിട്ടുണ്ട്.
സര്‍ക്കാര്‍ അംഗീകാരം നല്‍കാമെന്ന് വാഗ്ദാനം ചെയ്ത് സ്വകാര്യ വിദ്യാഭ്യാസ സ്ഥാപനങ്ങളില്‍ നിന്ന് പണം പിരിച്ചുവെന്ന ആരോപണത്തെ തുടര്‍ന്ന് നടത്തിയ അന്വേഷണത്തിലാണ് അറസ്റ്റ്. ഇത്തരത്തില്‍ 177 സ്‌കൂളുകളില്‍ നിന്ന് പണം പിരിച്ചെടുത്തെന്ന് അന്വേഷണത്തില്‍ കണ്ടെത്തി. തമിഴ്‌നാട്ടിലെ സ്വകാര്യ സ്‌കൂളുകളുടെ അസോസിയേഷന്‍ സെക്രട്ടറി ഇളങ്കോവന്‍ നല്‍കിയ പരാതിയിലാണ് അന്വേഷണം ആരംഭിച്ചത്.
സ്വകാര്യ വിദ്യാഭ്യാസ സ്ഥാപനങ്ങള്‍ക്ക് സ്ഥിരാംഗീകാരം, സ്‌കൂള്‍ അപ്ഗ്രഡേഷന്‍, കെട്ടിട നിര്‍മാണത്തിനുള്ള പ്ലാനിംഗ് അനുമതി തുടങ്ങിയവ ലഭ്യമാക്കാമെന്ന് വാഗ്ദാനം ചെയ്ത് പണം വാങ്ങിയെന്നാണ് പരാതി. തമിഴ്‌നാട് െ്രെപവറ്റ് സ്‌കൂള്‍സ് അസോസിയേഷന്‍ പ്രസിഡന്റ് ബി.ടി. അരസുകുമാറും മറ്റ് ഭാരവാഹികളും സ്വകാര്യ സ്‌കൂളുകളില്‍നിന്ന് അംഗത്വഫീസും വരിസംഖ്യയും അടക്കം പിരിച്ചെടുത്തെന്നും പരാതിയില്‍ ആരോപിക്കുന്നു. സര്‍ക്കാര്‍ അനുമതികള്‍ ലഭ്യമാക്കാന്‍ സഹായിക്കാമെന്നായിരുന്നു ഇവരുടെ വാഗ്ദാനം.
നോ ഒബ്ജക്ഷന്‍ സര്‍ട്ടിഫിക്കറ്റ് (എന്‍ഒസി), ലൈസന്‍സ്, അംഗീകാരം അടക്കമുള്ള ഔദ്യോഗിക അനുമതികള്‍ നേടിക്കൊടുക്കാമെന്ന് ഉറപ്പുനല്‍കിയെങ്കിലും പണം നല്‍കിയ സ്ഥാപനങ്ങള്‍ക്ക് വാഗ്ദാനം പാലിച്ചില്ലെന്നാണ് പരാതിക്കാരന്റെ ആരോപണം. ഈ ആരോപണങ്ങളുമായി ബന്ധപ്പെട്ട അന്വേഷണത്തിനൊടുവിലാണ് മുന്‍ മന്ത്രിയെയും പ്രതിപ്പട്ടികയില്‍ ഉള്‍പ്പെടുത്തിയതും അറസ്റ്റിലേക്ക് കടന്നതും. എന്നാല്‍ മഹേഷ് ആരോപണങ്ങള്‍ നിഷേധിച്ചു. കേസിന്റെ നിയമസാധുത ചോദ്യംചെയ്ത് അദ്ദേഹം കോടതിയെ സമീപിച്ചിട്ടുണ്ട്.
https://www.facebook.com/Malayalivartha
