പൂര്‍ണ ഗര്‍ഭിണിയായ യുവതി പ്രസവിക്കാനായി സ്വദേശമായ ജക്കാര്‍ത്തയിലേക്ക് എത്തിഹാദ് വിമാനത്തില്‍ പോകുകയായിരുന്നു. എന്നാല്‍ വിമാനം യാത്ര തിരിച്ച് കുറച്ചു സമയം കഴിഞ്ഞപ്പോള്‍ യുവതിയ്ക്ക് പ്രസവ വേദന ആരംഭിച്ചു. സഹയാത്രികരും വിമാന ജീവനക്കാരും യുവതിയോട് കാര്യങ്ങള്‍ അന്വേഷിക്കുകയും വേണ്ട സഹായം ചെയ്തു കൊടുക്കുകയും ചെയ്തു. ഇതിനിടയ്ക്ക് പ്രസവ വേദന കടുത്തതോടെ വനിത യാത്രക്കാരും എയര്‍ഹോസ്റ്റസുമാരും പ്രത്യേക മറയുണ്ടാക്കി യുവതിയ്ക്ക് പ്രസവിക്കാനുള്ള സൗകര്യമൊരുക്കി.

മിനിറ്റുകള്‍ക്കകം യുവതി പ്രസവിച്ചതോടെ എല്ലാവര്‍ക്കും സന്തോഷമായി. എന്നാല്‍ അമ്മയ്ക്കും കുഞ്ഞിനും അടിയന്തര ശുശ്രൂഷ ആവശ്യമുള്ളതിനാല്‍ എല്ലാവരിലും ആശങ്ക ഉണര്‍ത്തി. ഇക്കാര്യം പൈലറ്റിനെ അറിയിച്ചു. പൈലറ്റ് വിമാനക്കമ്പനി അധികൃതരുമായി ബന്ധപ്പെട്ടു. തൊട്ടടുത്തുള്ള എയര്‍പോര്‍ട്ടില്‍ വിമാനം ഇറക്കി കൊള്ളാനുള്ള അനുമതി നല്‍കി. തിരികെ അബുദാബിയിലോ മറ്റ് ഗള്‍ഫ് രാജ്യങ്ങളിലോ ഇറങ്ങാന്‍ പറ്റാത്ത അവസ്ഥയിലായിരുന്നു. ഏതാണ്ട് ഇന്ത്യ മഹാസമുദ്രത്തിന്റെ മുകളിലായിരുന്നു വിമാനം പറന്നു കൊണ്ടിരുന്നത്. അതിനാല്‍ വിമാനത്തിന് ഏറ്റവും അടുത്തുള്ള എയര്‍പോര്‍ട്ടായിരുന്നു മുംബൈ വിമാനത്താവളം. തുടര്‍ന്ന് മുംബൈ വിമാനത്താവളവുമായി ബന്ധപ്പെടുകയും അടിയന്തര സാഹചര്യം വിമാനത്താവള അധികൃതരെ അറിയിക്കുകയും ചെയ്തു. അങ്ങനെയാണ് മുംബൈയില്‍ ഇറങ്ങാനുള്ള അവസരമൊരുങ്ങിയത്.

അതേസമയം മുംബൈ വിമാനത്താവളത്തില്‍ സര്‍വ സജ്ജമായ ആംബുലന്‍സും ഡോക്ടര്‍മാരും റെഡിയുമായിരുന്നു. യുവതിയെയും കുഞ്ഞിനെയും ആശുപത്രിയില്‍ പ്രവേശിപ്പിച്ചു. അമ്മയും കുഞ്ഞും സുഖമായിരിക്കുന്നതായി ഡോക്ടര്‍മാര്‍ അറിയിച്ചു.