ഗുജറാത്തില്‍ വോട്ടുചെയ്യല്‍ നിയമംമൂലം നിര്‍ബന്ധമാക്കുന്നു. വോട്ടര്‍മാര്‍ സമ്മതിദാനാവകാശം വിനിയോഗിച്ചില്ലെങ്കില്‍ കുറ്റംചുമത്തി ശിക്ഷിക്കാന്‍ പുതിയ നിയമപ്രകാരം സര്‍ക്കാറിന് അധികാരമുണ്ടാകും. വരുന്ന തദ്ദേശ സ്വയംഭരണസ്ഥാപനങ്ങളിലേക്കുള്ള തിരഞ്ഞെടുപ്പിലാണ് വോട്ടര്‍മാര്‍ നിര്‍ബന്ധമായി വോട്ടുചെയ്യേണ്ടിവരിക. ഇതോടെ വോട്ടുചെയ്യല്‍ നിയമത്തിലൂടെ നിര്‍ബന്ധമാക്കുന്ന ആദ്യ സംസ്ഥാനമാവുകയാണ് ഗുജറാത്ത്. ബില്ലില്‍ പറഞ്ഞിട്ടുള്ള കാരണങ്ങളോടെയല്ലാതെ ആരെങ്കിലും വോട്ടുചെയ്തിട്ടില്ലെങ്കില്‍ കുറ്റമായി കണക്കാക്കുമെന്നാണ് വ്യവസ്ഥയുള്ളത്. എന്നാല്‍ ശിക്ഷ എന്താണെന്ന് ബില്ലില്‍ വ്യവസ്ഥചെയ്തിട്ടില്ല.
ഈ വ്യവസ്ഥ ഉള്‍പ്പെടുത്തിക്കൊണ്ട് ഗുജറാത്ത് നിയമസഭ 2009ല്‍ പാസ്സാക്കിയ വിവാദമായ ബില്‍ പുതിയ ഗവര്‍ണര്‍ ഒ.പി. കോഹ്ലി ഒപ്പിട്ടതോടെയാണ് നിയമം നിലവില്‍വന്നത്. ഗുജറാത്ത്് തദ്ദേശ സ്വയം ഭരണ നിയമം എന്നാണ് വിവാദ ബില്ലിന്റെ പേര്. തദ്ദേശസ്ഥാപനങ്ങളിലേക്കുള്ള സീറ്റുകളില്‍ അമ്പത് ശതമാനം സ്ത്രീകള്‍ക്ക് സംവരണം ചെയ്തുകൊണ്ടുള്ള ഭേദഗതിയും പുതിയ ബില്ലിലുണ്ട്. പൗരന്റെ ഭരണഘടനാ അവകാശത്തിന്മേലുള്ള കടന്നുകയറ്റമാണ് ഇതെന്ന് ചൂണ്ടിക്കാട്ടി മുന്‍ഗവര്‍ണര്‍ ഡോ. കമല ബെനിവാല്‍ ഒപ്പിടാതെ നീട്ടിക്കൊണ്ടു പോയ ബില്ലാണ് ഇപ്പോള്‍ നിയമമായിരിക്കുന്നത്. കേന്ദ്രത്തില്‍ ബി.ജെ.പി അധികാരത്തില്‍ എത്തിയ ശേഷം ഗവര്‍ണറെ സ്ഥലം മാറ്റുകയും പിന്നീട് പുറത്താക്കുകയും ചെയ്തിരുന്നു.
എന്നാല്‍ ഈ നിയമം എങ്ങനെ പ്രായോഗികമാക്കുമെന്നറിയാന്‍ തങ്ങള്‍ കാത്തിരിക്കുകയാണെന്നാണ് ഡല്‍ഹിയില്‍ ഇതുസംബന്ധിച്ച് കോണ്‍ഗ്രസ് വക്താവ് മനു അഭിഷേക് സിങ്വി പ്രതികരിച്ചത്. നിയമം നടപ്പാക്കാന്‍ വേണ്ട നിബന്ധനകള്‍ ഉള്‍പ്പെടുത്തി ആവശ്യമായ ഘട്ടത്തില്‍ ഉത്തരവിറക്കുമെന്ന് സര്‍ക്കാര്‍വൃത്തങ്ങള്‍ അറിയിച്ചു.
നരേന്ദ്രമോദി ഗുജറാത്ത് മുഖ്യമന്ത്രിയായിരിക്കെയാണ് ഗുജറാത്ത് തദ്ദേശ സ്വയംഭരണസ്ഥാപന നിയമഭേദഗതി ബില്‍ നിയമസഭ പാസ്സാക്കിയത്. തദ്ദേശ സ്ഥാപനങ്ങളില്‍ വോട്ടിങ് ശതമാനം കുറയുന്നതിനാല്‍ യഥാര്‍ഥ ജനഹിതം തിരഞ്ഞെടുപ്പിലൂടെ പ്രതിഫലിക്കുന്നില്ലെന്ന കാരണമാണ് സര്‍ക്കാര്‍ പറഞ്ഞിരുന്നത്. വോട്ടുചെയ്യല്‍ നിര്‍ബന്ധമാക്കുന്ന വ്യവസ്ഥയെ പ്രതിപക്ഷമായ കോണ്‍ഗ്രസ് എതിര്‍ത്തിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha