മാവോയിസ്റ്റുകളെ പിടികൂടാന്‍ വനിതാ സംഘത്തെ നിയമിക്കുകയാണ് ഇന്ത്യന്‍ സേന. ഇന്ത്യയുടെ ചരിത്രത്തില്‍ ആദ്യമായാണ് വനാന്തരത്തിലെ മാവോയിസ്റ്റ് പ്രൊട്ടക്ഷനായി പ്രത്യേക വനിതാ സ്‌ക്വാഡിനെ വിന്യസിക്കുന്നത്. കുറച്ചുകാലം വനത്തില്‍ താമസിച്ച് പോരാടാനുള്ള സംവിധാനങ്ങളോടെയാണ് ഛത്തീസ്ഗഢ്, ജാര്‍ഖണ്ഡ് എന്നിവിടങ്ങളിലെ വനങ്ങളില്‍ വനിതാസംഘത്തെ വിന്യസിച്ചിരിക്കുന്നത്. സി.ആര്‍.പി.എഫ് സേനയാണ് വനിതാ സംഘത്തിനെ വിന്യസിച്ചിരിക്കുന്നത്.

ഛത്തീസ്ഗഢില്‍ മാവോവാദികളുടെ ശക്തികേന്ദ്രമായ ബസ്തറിലാണ് വനിതാസംഘമുള്ളത്. ജാര്‍ഖണ്ഡില്‍ എവിടെയാണ് ഇവരെ അയച്ചിരിക്കുന്നതെന്ന് സി.ആര്‍.പി.എഫ്. വെളിപ്പെടുത്തിയിട്ടില്ല. രണ്ടിടങ്ങളിലും രണ്ടാഴ്ചമുമ്പ് വനിതാകമാന്‍ഡോകള്‍ പ്രവര്‍ത്തനം തുടങ്ങി. സി.ആര്‍.പി.എഫിലെ പുരുഷ കമാന്‍ഡോകള്‍ക്കൊപ്പം മാവോവാദികള്‍ക്കെതിരെ തോക്കെടുത്ത് പോരാടാനും റോന്തുചുറ്റാനും ഇവരെ ചുമതലപ്പെടുത്തിയിട്ടുണ്ട്. വനത്തിനുള്ളില്‍ സ്ത്രീകള്‍ക്കാവശ്യമായ അടിസ്ഥാനസൗകര്യം ഒരുക്കിയശേഷമാണ് ഇവരെ അയച്ചത്.
ഇവരുടെ പ്രവര്‍ത്തനമേഖലയെപ്പറ്റി കൃത്യമായ വിവരം നല്‍കാന്‍ സി.ആര്‍.പി.എഫ്. ഒരുക്കമല്ല. വിന്യസിച്ച വിവരവും ആദ്യദിവസങ്ങളില്‍ പുറത്തുവിടാന്‍ സേന തയ്യാറായില്ല. പ്രത്യേക കാരണങ്ങളാലാണ് ഇതെന്ന് സി.ആര്‍.പി.എഫ്. അധികൃതര്‍ പറഞ്ഞു. നാട്ടുകാരികളോട് ഇടപഴകി വിവരം ശേഖരിക്കാനും അതുവഴി സൈന്യത്തിന് ഗ്രാമങ്ങളുമായി അടുപ്പം സ്ഥാപിക്കാനും സ്ത്രീകളുടെ സാന്നിദ്ധ്യം ഉപകരിക്കുമെന്നാണ് പ്രതീക്ഷ.
മൂന്ന് ലക്ഷത്തിലേറെ സി.ആര്‍.പി.എഫുകാരാണ് മാവോയിസ്റ്റ് വിരുദ്ധ സൈനികനടപടിയില്‍ ഏര്‍പ്പെട്ടിരിക്കുന്നത്. ഇതില്‍ സ്ത്രീകളെയും ഉള്‍പ്പെടുത്താനുള്ള തീരുമാനം കഴിഞ്ഞവര്‍ഷമാണുണ്ടായത്. സ്ത്രീകളെ വനത്തില്‍ വിന്യസിക്കുംമുമ്പ് സി.ആര്‍.പി.എഫ്. േകന്ദ്ര ആഭ്യന്തരമന്ത്രാലയത്തിന്റെ അനുമതി വാങ്ങിയിരുന്നു. ശത്രുവുമായി നേരിട്ടുള്ള പോരാട്ടത്തിന് വനിതാ സുരക്ഷാ ഉദ്യോഗസ്ഥരെ വിന്യസിക്കരുതെന്നാണ് നിയമം. എന്നാല്‍, നക്‌സലുകളെ ഇല്ലായ്മ ചെയ്യുക എന്ന ലക്ഷ്യം നേടാന്‍ ഈ നിയമത്തിന് ഇളവു നല്‍കുകയായിരുന്നുവെന്ന് ബന്ധപ്പെട്ട കേന്ദ്രങ്ങള്‍ പറഞ്ഞു. അഞ്ചുവര്‍ഷംകൊണ്ട് സി.ആര്‍.പി.എഫിലെ സ്ത്രീകളുടെ എണ്ണം 5000 ആക്കും. ഇപ്പോള്‍ ഇത് 3000 ആണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha