റിസര്‍വ് ബാങ്ക് ഗവര്‍ണര്‍ ഊര്‍ജിത് പട്ടേല്‍ രാജിവെച്ചു. കേന്ദ്രസര്‍ക്കാരുമായുള്ള പ്രശ്‌നങ്ങളുടെ പേരിലാണ് രാജിയെന്നാണ് സൂചന. മുന്‍ ഗവര്‍ണര്‍ രഘുറാം രാജനും സമാനമായ രീതിയിലാണ് രാജിവെച്ചത്. നോട്ട്‌ നിരോധനത്തിലും സാമ്പത്തിക ഇടപാടുകളിലുമുള്ള അഭിപ്രായ വ്യത്യാസങ്ങളെത്തുടര്‍ന്നായിരുന്നു രഘുറാം രാജന്റെ രാജി.

വ്യക്തിപരമായ കാരണങ്ങളെത്തുടര്‍ന്നാണ് രാജിയെന്നാണ് ഊര്‍ജിതിന്റെ വിശദീകരണം. ബാങ്കിന്റെ ആഭ്യന്തര കാര്യങ്ങളിൽ അടക്കം കേന്ദ്രസർക്കാരിന് നേരിട്ട് ഇടപെടാവുന്ന സൗകര്യം പ്രയോഗിച്ചതാണ് ഉർജിതിന്റെ രാജിക്ക് പിന്നിലെന്നാണ് വിവരം.. കഴിഞ്ഞ രണ്ടു മാസമായി ഊര്‍ജിത് രാജിവെയ്ക്കുമെന്ന അഭ്യൂഹം നിലനില്‍ക്കുന്നുണ്ട്.

നോട്ട് നിരോധനം അടക്കമുള്ള കാര്യങ്ങളിൽ പ്രധാനമന്ത്രി നരേന്ദ്ര മോദിയുടെ വിശ്വസ്‌തനായ ഉർജിത് പട്ടേൽ പടിയിറങ്ങുന്നത് കേന്ദ്രസർക്കാരിന് കനത്ത തിരിച്ചടിയാണെന്നാണ് വിലയിരുത്തൽ. എന്നാൽ ഇക്കാര്യത്തിൽ കേന്ദ്രസർക്കാർ വൃത്തങ്ങളൊന്നും തന്നെ ഇതുവരെ ഔദ്യോഗികമായി പ്രതികരിച്ചിട്ടില്ല.

അഞ്ച് സംസ്ഥാനങ്ങളിലെ തിരഞ്ഞെടുപ്പ് ഫലം നാളെ പുറത്തു വരാനിരിക്കെയാണ് 2019 സെപ്‌തംബർ വരെ കാലാവധിയുണ്ടായിരുന്ന ഉർജിത് പട്ടേൽ പടിയിറങ്ങുന്നത്. ബാങ്കിന്റെ സ്വയം ഭരണാവകാശത്തിൽ സർക്കാർ ഇടപെടുന്നതിൽ ആർ.ബി.ഐ തലപ്പത്തുള്ളവരും ഇതിനോടകം തന്നെ പ്രതിഷേധം അറിയിച്ചിട്ടുണ്ട്. കഴിഞ്ഞ ദിവസങ്ങളിൽ കേന്ദ്രധനമന്ത്രി അരുൺ ജയ്‌റ്റ്‌ലി നടത്തിയ പരാമർശങ്ങളും പട്ടേലിനെ ചൊടിപ്പിച്ചതായാണ് അദ്ദേഹവുമായി ബന്ധപ്പെട്ട വൃത്തങ്ങൾ സൂചിപ്പിക്കുന്നത്.