ജാതിവ്യവസ്ഥ ശപിക്കപ്പെട്ട ഒന്നാണെന്ന് തെളിയിച്ചുകൊണ്ട് വീണ്ടുമൊരു ഞെട്ടിക്കുന്ന സംഭവം. മറ്റൊരു സമുദായക്കാരനെ പ്രണയിച്ച് വിവാഹം ചെയ്ത മകളെ സ്വന്തം മാതാപിതാക്കള്‍ കൊലപ്പെടുത്തി. ഡല്‍ഹിയിലാണ് രാജ്യത്തെ നടുക്കിയ ദുരഭിമാനക്കൊല നടന്നത്. ഡല്‍ഹി ശ്രീ വെങ്കടേശ്വര കോളജിലെ മൂന്നാം വര്‍ഷ ബിരുദ വിദ്യാര്‍ത്ഥിനിയായ ഭാവന (21)യാണ് കൊല്ലപ്പെട്ടത്. ഭാവനയുടെ മാതാപിതാക്കളായ ജഗ്‌മോഹനും സാവിത്രി യാദവുമാണ് കൊലപാതകത്തിനു പിന്നിലെന്ന് പോലീസ് പറഞ്ഞു. ഇവര്‍ പോലീസ് കസ്റ്റഡിയിലാണ്.
വിവാഹിതയായതിന്റെ മൂന്നാം നാളാണ് യുവതി കൊല്ലപ്പെട്ടത്. രാഷ്ട്രപതി ഭവനിലെ അസിസ്റ്റന്റ് പ്രോഗ്രാമറായ അഭിഷേക് സേത്തു (24)വുമായായിരുന്നു ഭാവനയുടെ വിവാഹം. വീട്ടുകാരുടെ എതിര്‍പ്പ് വകവയ്ക്കാതെ കൊനാട്ട് പ്ലേസിലെ ആര്യസമാജം മന്ദിരത്തില്‍ നവംബര്‍ 12നാണ് ഇവര്‍ വിവാഹിതരായത്. വിവാഹ ശേഷം വളരെ സന്തോഷമായി എത്തിയ ജഗ്‌മോഹനും സാവിത്രിയും ആഡംബരമായി വിവാഹം നടത്താമെന്നു പറഞ്ഞ് മകളെ വീട്ടിലേക്ക് കൂട്ടിക്കൊണ്ടു പോകുകയായിരുന്നു.
എന്നാല്‍ വീട്ടിലെത്തിയ ശേഷം വിവാഹബന്ധം ഒഴിയാന്‍ ഇവര്‍ നിര്‍ബന്ധിച്ചു. ഇതിനു ഭാവന വഴങ്ങാതെ വന്നതോടെ കൊലപ്പെടുത്തുകയായിരുന്നുവെന്ന് പോലീസ് പറയുന്നു. രണ്ടു വര്‍ഷം മുന്‍പാണ് ഇവര്‍ പ്രണയത്തിലായത്. ഇവരുടെ ബന്ധത്തെ എതിര്‍ത്ത മാതാപിതാക്കള്‍ തങ്ങളുടെ സമുദായത്തിലുള്ള മറ്റൊരു യുവാവുമായി വിവാഹം നിശ്ചയിച്ചിരുന്നു. ഈ മാസം 22ന് ആ വിവാഹം നടത്താനിരിക്കേയാണ് ഭാവനയും സേത്തുമായുള്ള വിവാഹം നടന്നത്.
കൊലപതകത്തിനു ശേഷം മൃതദേഹവുമായി മാതാപിതാക്കള്‍ രാജസ്ഥാനിലേക്ക് കടന്നു. മകളെ പാമ്പുകടിച്ചുവെന്നും ചികിത്സയ്ക്കായി സ്വദേശത്തുള്ള ആയുര്‍വേദ വൈദ്യന്റെ അടുത്തേക്ക് പോകുകയാണെന്നുമാണ് ഇവര്‍ അയല്‍ക്കാരോട് പറഞ്ഞത്. നാട്ടിലെത്തിയ ഇവര്‍ മകള്‍ യാത്രമധ്യേ മരണപ്പെട്ടുവെന്നും അയല്‍ക്കാരെ വിളിച്ച് അറിയിച്ചു. മൃതദേഹം സംസ്‌കരിച്ചശേഷം ഇവര്‍ ഡല്‍ഹിയില്‍ തിരിച്ചെത്തി.
അതെസമയം ഭാര്യയുടെ വിവരം ഒന്നുമില്ലാതായതോടെ നവംബര്‍ 16ന് അഭിഷേക് പരാതി നല്‍കി. പോലീസിന്റെ ചോദ്യം ചെയ്യലില്‍ പാമ്പുകടിയേറ്റാണ് മകള്‍ മരിച്ചതെന്ന നിലപാടില്‍ മാതാപിതാക്കള്‍ ഉറച്ചുനിന്നു. ഇവരെ വെവ്വേറെ ചോദ്യം ചെയ്തതോടെയാണ് കൊലപാതക വിവരം പുറത്തുവന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha