വിരമിക്കാന്‍ ദിവസങ്ങള്‍ മാത്രമുള്ളപ്പോള്‍ ടു ജി സ്‌പെക്ട്രം കേസില്‍ നിന്ന് സിബിഐ ഡയറക്ടര്‍ രഞ്ജിത് സിന്‍ഹയെ സുപ്രീംകോടതി നീക്കി. കേസ് രഞ്ജിത് സിന്‍ഹക്ക് തൊട്ടുതാഴെയുള്ള ഉദ്യോഗസ്ഥന്‍ അന്വേഷിക്കാനും സുപ്രീംകോടതി നിര്‍ദ്ദേശിച്ചു. ടു ജി കേസില്‍ ആരോപണം നേരിടുന്ന കമ്പനിയിലെ ജീവനക്കാരുമായി കൂടിക്കാഴ്ച നടത്തിയതിലെ അപാകത ചൂണ്ടിക്കാട്ടിയാണ് സുപ്രീംകോടതിയുടെ ഇടപെടല്‍.
രഞ്ജിത് സിന്‍ഹക്ക് പകരം അദ്ദേഹത്തിന് തൊട്ടുതാഴെയുള്ള ഉദ്യോഗസ്ഥന്‍ കേസിന്റെ അന്വേഷണ ചുമതല ഏറ്റെടുക്കണമെന്നും കോടതി ഉത്തരവിട്ടു. അന്വേഷണ റിപ്പോര്‍ട്ട് രഞ്ജിത് സിന്‍ഹക്ക് കൈമാറാതെ കോടതിയില്‍ സമര്‍പ്പിക്കുകയും ചെയ്യണം. സിബിഐ ഡയറക്ടര്‍ സ്ഥാനത്ത് നിന്ന് വിരമിക്കാന്‍ ഒരുമാസം മാത്രം ബാക്കി നില്‍ക്കെ രഞ്ജിത് സിന്‍ഹയെ സംബന്ധിച്ച് വലിയ തിരിച്ചടിയാണ് സുപ്രീംകോടതി ഇടപെടലോടെ ഉണ്ടായിരിക്കുന്നത്. ടു ജി കേസില്‍ ഈ തീരുമാനം എടുത്ത സാഹചര്യത്തില്‍ സമാപനമായ സാഹചര്യങ്ങള്‍ നിലനില്‍ക്കുന്ന കല്‍ക്കരി അഴിമതി കേസില്‍ നിന്നും രഞ്ജിത് സിന്‍ഹക്ക് മാറിനില്‍ക്കേക്കേണ്ടിവരും.
ഇതിനിടെ കല്‍ക്കരി കേസില്‍ അന്വേഷണം അവസാനിപ്പിക്കുന്നതായി സിബിഐ അറിയിച്ച കേസുകള്‍ വീണ്ടും അന്വേഷിക്കാന്‍ പ്രത്യേക കോടതി ഉത്തരവിട്ടു. മുന്‍കല്‍ക്കരി സെക്രട്ടറി പി.സി.പരാഖ്, വ്യവസായി കുമാരമംഗലം ബിര്‍ള എന്നിവര്‍ക്കെതിരെ രജിസ്റ്റര്‍ ചെയ്ത കേസുകളിലാണ് വീണ്ടും അന്വേഷണം നടത്തുക.അന്വേഷണം മുന്‍പ്രധാനമന്ത്രിയിലേക്ക് നീളാനും സാധ്യതയുണ്ട്.
ടു ജി സ്‌പെക്ട്രം കേസ് അന്വേഷിക്കുന്ന ഉദ്യോഗസ്ഥന്‍ ആരോപണം നേരിടുന്ന കമ്പനിയിലെ ജീവനക്കാരുമായി കൂടിക്കാഴ്ച നടത്തിയത് ദുരൂഹമാണെന്ന് ചൂണ്ടിക്കാട്ടി അഭിഭാഷകന്‍ പ്രശാന്ത് ഭൂഷണ്‍ നടത്തിയ വാദങ്ങള്‍ അംഗീകരിച്ചുകൊണ് സുപ്രീംകോടതിയുടെ നടപടി. രാവിലെ കേസ് പരിഗണിച്ചപ്പോള്‍ തന്നെ സിബിഐ ഇദ്യോഗസ്ഥര്‍ക്ക് നേരെ സുപ്രീംകോടതി രൂക്ഷവിമര്‍ശനം ഉന്നയിച്ചിരുന്നു. സിബിഐ ഡയറക്ടര്‍ക്ക് വേണ്ടി മുഴുവന്‍ ഉദ്യോഗസ്ഥരും കോടതിയില്‍ എത്തേണ്ടകാര്യമെന്തെന്ന് ചോദിച്ച കോടതി ഉദ്യോഗസ്ഥര്‍ രഞിജ് സിന്‍ഹയുടെ ഏജന്റുമാരാണോ എന്നും ചോദിച്ചു. അതിന് ശേഷമാണ് രഞിജ് സിന്‍ഹ കേസന്വേഷണത്തില്‍ സ്വയം മാറിനില്‍ക്കണമെന്ന് കോടതി നിര്‍ദ്ദേശിച്ചത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha