മഹാരാഷ്ട്ര തെരഞ്ഞെടുപ്പുമായി ബന്ധപ്പെട്ട് വേര്‍പെട്ടുപോയ ശിവസേനയെ അനുനയിപ്പിക്കാന്‍ ബിജെപി ശ്രമം തുടങ്ങി. തൊട്ടടുത്ത മന്ത്രിസഭാ വികസനത്തില്‍ ശിവസേനയെ പരിഗണിക്കുമെന്ന് മഹാരാഷ്ട്ര പൊതുമരാമത്ത് വകുപ്പ് മന്ത്രിയും ബിജെപി നേതാവുമായ ചന്ദ്രകാന്ത് പാട്ടീല്‍ വ്യക്തമാക്കി. ഡിസംബര്‍ 8 ന് സഭയുടെ ശൈത്യകാല സെഷന് മുമ്പായി മന്ത്രിസഭാ പുന: സംഘടിപ്പിക്കല്‍ ഉണ്ടാകും.സംസ്ഥാനത്തിന് വേണ്ടത് സുസ്ഥിരമായ ഒരു സര്‍ക്കാരാണെന്നും അതുകൊണ്ടു തന്നെ ശിവസേന സര്‍ക്കാരിന്റെ പങ്കാളികളാകേണ്ടത് ആവശ്യമാണ്.
രണ്ടോ മൂന്നോ ദിവസത്തിനുള്ളില്‍ തീരുമാനം ഉണ്ടാകും. എന്തായാലും നവംബര്‍ 25 നും 30 നും ഇടയില്‍ ഉണ്ടായേക്കാവുന്ന മന്ത്രിസഭാ വികസനത്തില്‍ ശിവസേന ഉണ്ടാകുമെന്ന് ഉറപ്പാണെന്ന് പാട്ടീല്‍ പറഞ്ഞു. ഇപ്പോള്‍ ഡല്‍ഹിയിലുള്ള മുഖ്യമന്ത്രി ഫട്‌നാവീസ് ഇന്നലെ ബിജെപി അദ്ധ്യക്ഷന്‍ അമിത്ഷായുമായി കൂടിക്കാഴ്ച നടത്തി ഇക്കാര്യം ചര്‍ച്ച ചെയ്ത് ശിവസേനയുടെ കാര്യത്തില്‍ നിര്‍ണ്ണായക തീരുമാനം എടുത്തതായിട്ടാണ് വിവരം. ശിവസേന എന്നും ബിജെപിയുടെ സുഹൃത്താണ്. ഇന്നും നാളെയും ഭാവിയിലും അങ്ങനെയായിരിക്കുമെന്ന് ഫട്‌നാവീസും പറഞ്ഞു.
അതേസമയം ഉപമുഖ്യമന്ത്രി എന്ന തങ്ങളുടെ ആവശ്യത്തില്‍ ഉറച്ച് തന്നെ നില്‍ക്കുകയാണ് ശിവസേന. നേരത്തേ തങ്ങള്‍ മികച്ച പങ്കാളിത്തം നല്‍കിയിട്ടുള്ള ബിജെപി ഇപ്പോള്‍ സ്വാര്‍ത്ഥരായി മാറിയിരിക്കുകയാണെന്നാണ് ശിവസേനയുടെ പരിഭവം.തങ്ങളാണ് ഭരണത്തിലെങ്കില്‍ ഉപമുഖ്യമന്ത്രി സ്ഥാനവും മന്ത്രിസഭയിലെ നിര്‍ണ്ണായക വകുപ്പുകളും ബിജെപിയ്ക്ക് നല്‍കുമായിരുന്നെന്നും ശിവസേന നേതാക്കള്‍ പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha