അലീഗഢ് മുസ്ലിം സര്വകലാശാലയുടെ ന്യൂനപക്ഷപദവി സംബന്ധിച്ച തീര്പ്പ് സുപ്രീംകോടതി ഏഴംഗ ഭരണഘടന ബെഞ്ചിന് വിട്ടു
അലീഗഢ് മുസ്ലിം സര്വകലാശാലയുടെ ന്യൂനപക്ഷപദവി സംബന്ധിച്ച തീര്പ്പ് സുപ്രീംകോടതി ഏഴംഗ ഭരണഘടന ബെഞ്ചിന് വിട്ടു. വിദ്യാഭ്യാസ സ്ഥാപനങ്ങള്ക്ക് ന്യൂനപക്ഷപദവി നിശ്ചയിക്കുന്നതിനുള്ള മാനദണ്ഡങ്ങള് ഏഴംഗ ബെഞ്ച് നിര്വചിക്കണമെന്ന് ചീഫ് ജസ്റ്റിസ് രഞ്ജന് ഗൊഗോയി അധ്യക്ഷനായ മൂന്നംഗ ബെഞ്ച് വിധിച്ചു. അലീഗഢ് മുസ്ലിം സര്വകലാശാല ന്യൂനപക്ഷ സ്ഥാപനമല്ല എന്ന അലഹബാദ് ഹൈകോടതി വിധി ചോദ്യം ചെയ്ത് മുന് യു.പി.എ സര്ക്കാര് സമര്പ്പിച്ച അപ്പീലാണ് ചീഫ് ജസ്റ്റിസിന്റെ ബെഞ്ച് വിപുലമായ ബെഞ്ചിന് വിട്ടത്. സര്വകലാശാലയും വിധിക്കെതിരെ അപ്പീല് നല്കിയിരുന്നു.
എന്നാല്, മോദി സര്ക്കാര് അധികാരത്തിലെത്തിയതോടെ നേരത്തേ നല്കിയ അപ്പീല് പിന്വലിക്കുമെന്ന് കേന്ദ്രം സുപ്രീംകോടതിയെ അറിയിച്ചു. അലീഗഢ് മുസ്ലിം സര്വകലാശാല കേന്ദ്ര സര്ക്കാര് സ്ഥാപനമാണെന്നും ന്യൂനപക്ഷ സ്ഥാപനം അല്ലെന്നും അസീസ് ബാഷ കേസില് അഞ്ചംഗ ബെഞ്ച് വിധിച്ചിരുന്നു. ആ വിധി മറികടക്കാന് 1981ല് അലീഗഢ് നിയമത്തില് ഭേദഗതി കൊണ്ടുവന്നു.
ആ ഭേദഗതിയാണ് അലഹബാദ് ഹൈകോടതി റദ്ദാക്കിയത്. അഞ്ചംഗ ബെഞ്ചിന്റെ വിധിയുമായി ബന്ധപ്പെട്ട വിഷയമായതിനാല് സുപ്രീംകോടതി ഇത് ഏഴംഗ ബെഞ്ചിന് വിടുകയും ചെയ്തു.
https://www.facebook.com/Malayalivartha
