പ്രധാനമന്ത്രി നരേന്ദ്ര മോദിയുടെ 'മേം ഭീ ചൗക്കീദാര്‍' പ്രചാരണത്തെ പരിഹസിച്ച് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി
പ്രധാനമന്ത്രി നരേന്ദ്ര മോദിയുടെ 'മേം ഭീ ചൗക്കീദാര്‍' പ്രചാരണത്തെ പരിഹസിച്ച് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. പിടിക്കപ്പെട്ടപ്പോള്‍ മോദി രാജ്യത്തെ മുഴുവന്‍ 'ചൗക്കീദാര്‍മാര്‍' ആക്കിയെന്നായിരുന്നു രാഹുലിന്റെ പരിഹാസം. വടക്കന്‍ കര്‍ണാടകയിലെ കലബുറഗിയില്‍ പൊതുറാലിയെ അഭിസംബോധന ചെയ്തു സംസാരിക്കുകയായിരുന്നു രാഹുല്‍.
റഫാല്‍ ഇടപാടിലെ ക്രമക്കേടുകള്‍ പുറത്തുവന്നതിനു പിന്നാലെയാണു രാജ്യത്തിന്റെ കാവല്‍ക്കാരന്‍ കള്ളനാണ് (ചൗക്കീദാര്‍ ചോര്‍ ഹെ) എന്നു പ്രധാനമന്ത്രിയെ വിശേഷിപ്പിച്ച് രാഹുല്‍ രംഗത്തെത്തിയത്. ഈ വാക്കുകള്‍ മോദിക്ക് അനുകൂലമാക്കി മാറ്റാനുള്ള ബിജെപിയുടെ തന്ത്രത്തിനുപിന്നാലെ ട്വിറ്ററില്‍ മോദിയുടെ ഔദ്യോഗിക പേജിന്റെ പേര് ചൗക്കീദാര്‍ നരേന്ദ്ര മോദി എന്നാക്കി മാറ്റിയിരുന്നു. മാത്രമല്ല, മോദിയുടെ ആഹ്വാനം അനുസരിച്ച് ബിജെപി പ്രവര്‍ത്തകര്‍ 'മേം ഭീ ചൗക്കീദാര്‍' എന്ന പ്രചാരണം നടത്തുകയും ചെയ്തു.
പ്രധാനമന്ത്രിയായിട്ടല്ല തന്നെ ചൗക്കീദാര്‍ ആയി കാണണമെന്നാണ് മോദി ജനങ്ങളോടു നേരത്തേ ആവശ്യപ്പെട്ടത്. എന്നാല്‍ ഇപ്പോള്‍ അദ്ദേഹം രാജ്യത്തെ മുഴുവന്‍ കാവല്‍ക്കാരാക്കി മാറ്റി. അദ്ദേഹം ആരുടെയാണു കാവല്‍ക്കാരനായത്? അനില്‍ അംബാനിയെയും മെഹുല്‍ ചോക്‌സിയെയും നീരവ് മോദിയെയും പോലുള്ളവരെയാണ് മോദി കാവല്‍ക്കാരനായിനിന്നു സംരക്ഷിച്ചത്' രാഹുല്‍ കൂട്ടിച്ചേര്‍ത്തു. 500, 1000 നോട്ടുകള്‍ നിരോധിച്ചതുപോലെ ഭരണഘടനയെയും ഇല്ലാതാക്കാനാണ് മോദിയുടെ ശ്രമമെന്നും രാഹുല്‍ ആരോപിച്ചു.നരേന്ദ്ര മോദിയെ വെല്ലുവിളിച്ച് പ്രിയങ്ക ഗാന്ധിയുടെ ഗംഗാ യാത്ര. പ്രയാഗ് രാജില്‍ നിന്ന് വാരാണസിയിലേക്കാണ് തിരഞ്ഞെടുപ്പു പ്രചാരണ യാത്ര.
ബഡാ ഹനുമാന്‍ ക്ഷേത്രത്തിലെ പ്രാര്‍ഥനയോടെയാണ് പ്രിയങ്ക ഗാന്ധിയുടെ മൂന്നു ദിവസത്തെ ഗംഗാ യാത്രയ്ക്ക് തുടക്കമായത്.ഗംഗ ,യമുന ,സരസ്വതി നദികളുടെ സംഗമ സ്ഥലമായ സംഗമിലാണ് ബടാ ഹനുമാന്‍ ക്ഷേത്രം. 40 വര്‍ഷം മുമ്പ് ഇന്ദിരാഗാന്ധിയും ഈ ക്ഷേത്രത്തില്‍ സന്ദര്‍ശനം നടത്തിയിട്ടുണ്ട്.
മന്യയില്‍ ബോട്ട് യാത്ര തുടങ്ങാനെത്തിയ പ്രിയങ്കയെ പ്രവര്‍ത്തകര്‍ ആവേശത്തോടെ വരവേറ്റു. ആദ്യഘട്ട യാത്രയില്‍ വിദ്യാര്‍ഥി സംഘവുമായി എഐസിസി ജനറല്‍ സെക്രട്ടറി സംവദിച്ചു. ദും ദുമാ ഘട്ടില്‍ പൊതുയോഗത്തെ അഭിസംബോധന ചെയ്ത പ്രിയങ്ക നരേന്ദ്ര മോദിക്കെതിരെ ആഞ്ഞടിച്ചു. രാജ്യത്തിന്റെ കാവല്‍ക്കാരന്‍ സമ്പന്നര്‍ക്ക് വേണ്ടി മാത്രമാണെന്നും കര്‍ഷകര്‍ക്ക് വേണ്ടിയല്ലെന്നും അവര്‍ പറഞ്ഞു.
ഗംഗാമാതാവിന്റെ മടിത്തട്ടിലൂടെ സാധാരണക്കാരിലേക്ക് എന്നതാണ് ഗംഗ യാത്രയുടെ പ്രമേയം. 2014ല്‍ നരേന്ദ്ര മോദിയും താന്‍ ഗംഗാമാതാവിന്റെ പുത്രന്നെന്നു പറഞ്ഞാണ് പ്രചാരണം തുടങ്ങിയത്. മോദിയുടെ മണ്ഡലമായ വാരണസിയിലാണ് പ്രിയങ്കയുടെ യാത്ര സമാപിക്കുന്നത്.
https://www.facebook.com/Malayalivartha
