വാരണാസിയില് മോദി അപ്സര പോരാട്ടം; ലോക്സഭാ തിരഞ്ഞെടുപ്പില് കോണ്ഗ്രസിന്റെ ടിക്കറ്റിനായി മഹിളാ കോണ്ഗ്രസ് ദേശീയ ജനറല് സെക്രട്ടറി രംഗത്ത്
അപ്സര മോദിയെ തോല്പിക്കുമോ. അതോ തോല്ക്കുമോ. ജീവിതത്തിലെ പോരാട്ടം മുന്പേ ജയിച്ചവളാണ് അപ്സര റെഡ്ഡി. 15 വയസ്സുവരെ അജയ് റെഡ്ഡിയായി ആണ്ശരീരത്തില് കഴിഞ്ഞശേഷം പെണ്ണായി മാറിയവള്. ലോക്സഭാ തിരഞ്ഞെടുപ്പില് കോണ്ഗ്രസിന്റെ ടിക്കറ്റിനായി മഹിളാ കോണ്ഗ്രസ് ദേശീയ ജനറല് സെക്രട്ടറി രംഗത്തുണ്ട്. ആറണി, കരൂര് മണ്ഡലങ്ങളിലാണു സ്ഥാനാര്ഥിത്വത്തിനു അപേക്ഷ നല്കിയിരിക്കുന്നത്. തമിഴ്നാട്ടില് വേണമെന്നില്ല, പ്രധാനമന്ത്രി നരേന്ദ്ര മോദിക്കെതിരെ വാരാണസിയിലും പോരാട്ടത്തിനു തയാര്. മാസങ്ങള്ക്കു മുന്പ് മാത്രമാണ് കോണ്ഗ്രസിലെത്തിയത്. അതിനു പിന്നാലെ മഹിളാ കോണ്ഗ്രസ് ദേശീയ ജനറല് സെക്രട്ടറി പദവിയെത്തി. ദേശീയ പാര്ട്ടിയുടെ പ്രധാന പദവിയിലെത്തുന്ന ആദ്യത്തെ ട്രാന്സ്ജെന്ഡര്. രാജ്യത്തെ മുഴുവന് ട്രാന്സ്ജെന്ഡറുകള്ക്കും വേണ്ടിയാണു താന് സീറ്റ് ചോദിക്കുന്നതെന്നാണു അപ്സരയുടെ ന്യായം.
ആന്ധ്രയില് വേരുകളുള്ള യാഥാസ്ഥിതിക കുടുംബത്തില് ചെന്നൈയിലാണു ജനനം. പെണ്ണായി മാറാനുള്ള ആഗ്രഹത്തിനു കുടുംബത്തിന്റെ എതിര്പ്പു മറികടന്ന് അമ്മ ഒപ്പം നിന്നു. ഓസ്ട്രേലിയയിലും ലണ്ടനിലും പത്രപ്രവര്ത്തനം പഠിച്ച അപ്സര ബിബിസി, ദ് ഹിന്ദു തുടങ്ങിയ മാധ്യമങ്ങളില് പ്രവര്ത്തിച്ചു. തമിഴ് ചാനലില് അന്പുടന് അപ്സരയെന്ന പരിപാടിയുടെ അവതാരകയായി ശ്രദ്ധേയയായി രാഷ്ട്രീയത്തിലേക്ക്. തുടക്കം ബിജെപിയില്. ഒരു മാസം പിന്നിടും മുന്പേ അണ്ണാഡിഎംകെയില്. ദേശീയ വക്താവെന്ന നിലയില് ചാനല് ചര്ച്ചകളില് തിളങ്ങി. ജയലളിതയിലേക്കുള്ള വഴി തുറന്നതു ശശികലയായിരുന്നു. ശശികല ജയിലിലായ ശേഷം ദിനകരന് കടിഞ്ഞാണ് ഏറ്റെടുത്തതോടെ പാര്ട്ടിയുമായി അകന്നു. പിന്നീടായിരുന്നു കോണ്ഗ്രസ് പ്രവേശം.
https://www.facebook.com/Malayalivartha
