പാക് വ്യോമ പാതയിലൂടെയുള്ള സർവീസുകൾ നിരോധിച്ചതിനെ തുടർന്ന് എയർ ഇന്ത്യക്ക് കോടികളുടെ നഷ്ടമെന്ന് റിപ്പോർട്ട്. ബാലക്കോട്ട് ഭീകരാക്രമണ ക്യാമ്പുകളിൽ ഇന്ത്യൻ വ്യോമസേന നടത്തിയ ആക്രമണത്തിനു പിന്നാലെയാണ് പാക് വ്യോമ പാതയിലൂടെയുള്ള സർവീസുകൾ നിരോധിച്ചത്. കഴിഞ്ഞ ഫെബ്രുവരി 27നാണ്​ പാകിസ്​താന്‍ വ്യോമപാതയില്‍ ഇന്ത്യക്ക്​ നിരോധനം ഏര്‍പ്പെടുത്തിയത്​.

തുടര്‍ന്ന്​ എയര്‍ ഇന്ത്യയുടെ വിമാനങ്ങള്‍ ഗുജറാത്ത്​ തീരം വഴി അറബികടല്‍ കടന്നാണ്​ യൂറോപ്പ്​ - നോര്‍ത്ത്​ അമേരിക്കന്‍ സര്‍വീസുകള്‍ നടത്തിയിരുന്നത്​. ഇതുമൂലം മാര്‍ച്ച്‌​ 16 വരെ 60 കോടിയിലധികം രൂപയുടെ നഷ്ടം എയര്‍ ഇന്ത്യയ്ക്ക് ഉണ്ടായിട്ടുണ്ടെന്നാണ് റിപ്പോര്‍ട്ടുകള്‍. യു.എസിലേക്കുള്ള വിമാന സര്‍വീസുകളെയാണ് സാരമായി ബാധിച്ചത്.

ഇതോടെ വാഷിംഗ്ടണ്‍, ന്യൂയോര്‍ക്ക്​, ന്യൂവാര്‍ക്​, ചിക്കാഗോ എന്നിങ്ങനെയുള്ള യു.എസ്​ ഈസ്​റ്റ്​ കോസ്​റ്റ്​ നഗരങ്ങളിലേക്കുള്ള സര്‍വീസുകളുടെ ദൈര്‍ഘ്യം വര്‍ധിക്കുകയും ഇന്ധന ചെലവ്​ വര്‍ധിക്കുകയും ചെയ്തതാണ് എയര്‍ ഇന്ത്യയ്ക്ക് ബാദ്ധ്യതയായി മാറിയത്.

പാകിസ്ഥാനിലൂടെ അല്ലാതെ സര്‍വീസുകള്‍ വഴിമാറ്റി വിടുമ്പോൾ ഇന്ധനം നിറയ്ക്കുന്നതിനായി വിമാനങ്ങള്‍ ഷാര്‍ജയിലോ,​ വിയന്നയിലോ ഇറക്കേണ്ടി വരും. ഇത്തരത്തില്‍ ഇന്ധനം നിറക്കുന്നതിനുള്ള ലാന്‍ഡിങ്ങിനായി 50 ലക്ഷം രൂപയാണ്​ എയര്‍ ഇന്ത്യയ്ക്ക് ചെലവായത്. കൂടാതെ പൊസിഷന്‍ ക്രൂ, എഞ്ചിനിയറുമാരെ നിയമിക്കല്‍ എന്നിവക്കായി ആകെ 60കോടിയിലധികം രൂപയും ചെലവഴിച്ചിട്ടുണ്ട്. ഇന്ധനം നിറയ്ക്കുന്നതിനായി ഇടയ്ക്ക് വിമാനം നിലത്തിറക്കുന്നത് മൂലം യാത്രക്കാര്‍ക്ക് സമയനഷ്ടം ഉണ്ടാവുകയും ചെയ്യുന്നുണ്ട്.