കര്‍ണാടകയില്‍ ധാര്‍വാഡ് ജില്ലയിലെ കുമാരേശ്വര നഗറില്‍ നിര്‍മാണത്തിലിരിക്കുന്ന നാലുനില കെട്ടിടം തകര്‍ന്ന് മരിച്ചവരുടെ എണ്ണം മൂന്നായി. കെട്ടിടാവശിഷ്ടങ്ങള്‍ക്കിടയില്‍ 15ഓളം പേര്‍ കുടുങ്ങിക്കിടക്കുന്നതായി സംശയിക്കുന്നു. പരിക്കേറ്റ 18 പേരെ രക്ഷപ്പെടുത്തി. 16 പേരെ ധാര്‍വാഡ് ജില്ല ആശുപത്രിയിലും രണ്ടു പേരെ കിംസ് ആശുപത്രിയിലും പ്രവേശിപ്പിച്ചു. ചൊവ്വാഴ്ച വൈകീട്ട് 3.30ഓടെയാണ് അപകടം. 20 ആംബുലന്‍സ്, നാല് എക്‌സ്‌കവേറ്ററുകള്‍, മൂന്ന് ക്രെയിനുകള്‍ എന്നിവ ഉപയോഗിച്ച് പൊലീസും അഗ്‌നിരക്ഷാസേനയും ദുരന്തനിവാരണ സേനയും നാട്ടുകാരും ഒന്നിച്ച് രക്ഷാപ്രവര്‍ത്തനം തുടരുകയാണ്.

ധാര്‍വാഡില്‍ തെരഞ്ഞെടുപ്പ് സുരക്ഷ ചുമതലയിലുണ്ടായിരുന്ന ഒരു യൂനിറ്റ് ബി.എസ്.എഫ് ജവാന്മാരും രക്ഷാപ്രവര്‍ത്തനത്തില്‍ പങ്കാളികളായി. ബംഗളൂരുവില്‍നിന്ന് വിമാനത്തില്‍ പ്രത്യേക രക്ഷാദൗത്യ സംഘത്തെയും ധാര്‍വാഡിലെത്തിച്ചു. രക്ഷാപ്രവര്‍ത്തനം സുഗമമാക്കാന്‍ കെട്ടിടപരിസരത്ത് പൊലീസ് നിരോധനാജ്ഞ ഏര്‍പ്പെടുത്തി. പണിപൂര്‍ത്തിയാവാത്ത കെട്ടിടത്തിന്റെ ആദ്യ രണ്ടു നിലകളില്‍ വാടകക്ക് കടകള്‍ പ്രവര്‍ത്തിക്കുന്നുണ്ട്.
മറ്റു നിലകളില്‍ നിര്‍മാണം നടക്കുന്നതിനിടെയാണ് കെട്ടിടം തകര്‍ന്നുവീണത്. ഇതിനാല്‍ കടകളിലുള്ളവരും ഷോപ്പിങ്ങിനെത്തിയവരും നിര്‍മാണത്തൊഴിലാളികളുമടക്കം നിരവധി പേര്‍ സംഭവ സ്ഥലത്തുണ്ടായിരുന്നുവെന്നാണ് വിവരം.

സമീപത്ത് നിര്‍ത്തിയിട്ടിരുന്ന വാഹനങ്ങളും കെട്ടിടത്തിനടിയില്‍പെട്ടു. ബസവരാജ് നിഗാഡി, ഗംഗാധര്‍ ഷിന്‍ട്രെ, രവി സൊബ്‌റാദ് എന്നിവരുടെ ഉടമസ്ഥതയിലുള്ളതാണ് അപകടത്തില്‍പെട്ട കെട്ടിടം. മുന്‍ മന്ത്രിയും കോണ്‍ഗ്രസ് നേതാവുമായ വിനയ് കുല്‍കര്‍ണിയുടെ ഭാര്യാപിതാവാണ് ഉടമകളിലൊരാളായ ഗംഗാധര്‍ ഷിന്‍ട്രെ. അപകടം ഞെട്ടലുണ്ടാക്കിയെന്നും രക്ഷാപ്രവര്‍ത്തനത്തിന് മേല്‍നോട്ടം വഹിക്കാന്‍ ചീഫ് സെക്രട്ടറിയെ ചുമതലപ്പെടുത്തിയിട്ടുണ്ടെന്നും മുഖ്യമന്ത്രി പറഞ്ഞു.