തെരഞ്ഞെടുപ്പു പ്രചരണത്തില് ചട്ടലംഘനം കണ്ടാല് ആപ്പിലിടാന് തെരഞ്ഞെടുപ്പു കമ്മീഷന്റെ നിര്ദ്ദേശം
ഒറ്റയ്ക്കോ കൂട്ടമായോ കോളജുകളില് എത്തി വോട്ട് ചോദിക്കുന്നത് പെരുമാറ്റച്ചട്ട ലംഘനമാണെന്ന് മുഖ്യ തെരഞ്ഞെടുപ്പ് കമ്മീഷണര് ടിക്കാറാം മീണ. കോളജുകള് സര്ക്കാര് നിയന്ത്രണത്തിലുള്ള സ്ഥാപനങ്ങളാണ്. സര്ക്കാര്, അര്ധ സര്ക്കാര് സ്ഥാപനങ്ങളില് തെരഞ്ഞെടുപ്പ് പ്രചാരണം പാടില്ല.
കേരളത്തില് പതിവായി ഇത്തരം പ്രചാരണം നടക്കാറുണ്ടെന്നു മാധ്യമ പ്രവര്ത്തകര് ശ്രദ്ധയില്പ്പെടുത്തിയപ്പോള് കീഴ്വഴക്കങ്ങള് ലംഘിക്കാനില്ലെന്നും ആലോചിച്ചു നടപടി സ്വീകരിക്കുമെന്നും അദ്ദേഹം പറഞ്ഞു.
ശബരിമല വിഷയം പ്രചാരണായുധമാക്കരുതെന്ന് പറഞ്ഞിട്ടില്ല. ശബരിമലയുമായി ബന്ധപ്പെട്ടുള്ള ഏതു വിഷയവും തെരഞ്ഞെടുപ്പില് ഉയര്ത്താം. അയ്യപ്പന്റെ പേരു പറഞ്ഞു വോട്ടു ചോദിക്കാന് പാടില്ല. പെരുമാറ്റച്ചട്ടലംഘനങ്ങള് ശ്രദ്ധയില്പ്പെട്ടാല് പൊതുജനങ്ങള്ക്കു വിവരം കൈമാറാന് സിവിജില്('cVIGIL') എന്ന മൊബൈല് ആപ്ലിക്കേഷന് തെരഞ്ഞെടുപ്പ് കമ്മീഷന് പുറത്തിറക്കിയിട്ടുണ്ട്.
പെരുമാറ്റച്ചട്ടലംഘനങ്ങള് മൊബൈല്ഫോണില് പകര്ത്തി കണ്ട്രോള് റൂമിലേക്ക് അയയ്ക്കാം. സന്ദേശം ലഭിച്ച് അഞ്ച് മിനിറ്റിനുള്ളില് കേസ് രജിസ്റ്റര് ചെയ്യും. നൂറു മിനിറ്റിനുള്ളില് നടപടി കൈക്കൊള്ളും.
ഗ്രീന് പ്രോട്ടോക്കോള് കര്ശനമായി നടപ്പാക്കാന് ശുചിത്വമിഷനുമായി ആലോചിച്ചു മാര്ഗനിര്ദേശം തയാറാക്കി സര്ക്കാര് ഉത്തരവായി ഇറക്കുമെന്നും അദ്ദേഹം പറഞ്ഞു.
https://www.facebook.com/Malayalivartha
